16 Jan 2024, 00:53
އިޓާލިއަން ސެރީއާގައި އޭސީ މިލާން އާއި އޭއެސް ރޯމާ ބައްދަލުކުރި މެޗު މިލާންއިން ކާމިޔާބު ކޮށްފިއެވެ.
މިލާންގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ތިން ލަނޑު އެއްލަނޑުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނުނު މިމެޗުގައި ގިނައިރު ރޯމާއިން ބޯޅަ ގެންގުޅުނު އިރު ގިނަ ހަމަލާ އުފައްދާފައިވަނީ މިލާންއިންނެވެ.
އެ މެޗުގެ ފެށުން ރަނގަޅު ވެފައިވަނީވެސް މިލާންގެއެވެ. މިގޮތުން މެޗުގެ 11 ވަނަ މިނެޓްގައި ލަނޑެއް ޖަހައި މިލާން އިންވަނީ މެޗުގެ ލީޑު ނަގާފައެވެ. މިލަނޑު އެޓީމަށް ޖަަހައިދިނީ ޔަސީން އަދްލީއެވެ.
އެ މެޗުގެ ފުރަތަމަ ހާފުގައި އިތުރު ލަނޑެއް ނުފެނު ނަމަވެސް ދެޓީމަށްވެސް ވަނީ ލަނޑު ޖަހާނެ ފުރުސަތު ލިބިފައެވެ. އެ މެޗުގައި މިލާންގެ ދެވަނަ ލަނޑު މެޗުގެ 56 ވަަނަ މިނެޓްގައި އެޓީމަށް ކާމިޔާބު ކޮށްދިނީ އޮލިވާ ޖިރޫއެވެ.
މިމެޗުގައި ރޯމާއިން ކާމިޔާބު ކުރި ހަމައެކަނި ލަނޑު މެޗުގެ 69 ވަނަ މިނެޓްގައި ލިބުނު ޕެނަލްޓީއަކުން ކާމިޔާބު ކޮށްދިނީ ލިއާންޑްރޯ ޕަރެޑޭސްއެވެ. މިމެޗުގައި މިލާންގެ ފަހު ލަނޑު މެޗުގެ 84 ވަނަ މިނެޓްގައި ޖަހައިދިނީ ތިއޯ ހެނާންޑޭޒްއެވެ. މިމެޗުގައި ރޯމާއިން އިތުރު ލަނޑެއް ޖަހައި ދެޓީމްގެ ދެމެދުގައިވާ ތަފާތު ކުޑަކުރެވޭތޯ އެޓީމުން މަސައްކަތް ކުރި ނަމަވެސް މިލާންއިން ވަނީ މިނަތީޖާއަށް އިތުރު ބަދަލެއް އަޔަނުދީ އެގޮތުގައި އޮވެ މެޗު ނިންމާލާފައެވެ.
މިކާމިޔާބީއާއެކު މިލާންއިން މިހާރުވަނީ ކުޅުނު 20 މެޗުން ލިބިފައިވާ 42 ޕޮއިންޓާއެކު ތާވަލްގެ ތިންވަނައިގައި ހަމަޖެހިލާފައެވެ. އަދި ރޯމާ އުޅެނީ 29 ޕޮއިންޓާއެކު ތާވަލްގެ ނުވަ ވަނައިގައެވެ.
މިލާންގެ ކޯޗް ސްޓެފާނޯ ޕިއޯލީ ހާމަކުރިގޮތުގައި މިވަގުތު އޭނާ ސެރީއާ ކާމިޔާބު ކުރުމާމެދު ނުވިސްނައެވެ. މިލާން އާއި ތާވަލްގެ އެއްވަނައިގައި އުޅޭ އިންޓާ މިލާންއާ ދެމެދު ނުވަ ޕޮއިންޓްގެ ތަފާތު އެބަހުއްޓެވެ. ނަމަވެސް ޕިއޯލީ ވަނީ އޭނާގެ ޓީމްގެ ނަން ތިލިސްޓުން ނެގުމަށް ނޫސްވެރިން ގާތު ބުނެފައެވެ. އަދި އޭނާގެ ވިސްނުން މިވަގުތު ހުރީ ލީގަށް ވާދަކުރުމަށްވުރެ ޓީމްގެ މިހާރުގެ ހާލަތަށް ބަލައި މެޗަކަށް ފަހު މެޗަކަށް ވިސްނައިގެން ކުޅެން ކަމަށް އޭނާ ބުންޏެވެ.