15 Jan 2024, 18:20
ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި އިދިކޮޅު އެމްޑީޕީން ވާދަކުރާނެ މެންބަރުން ހޮވުމަށް ބާއްވާ ޕްރައިމަރީގައި ވާދަކުރަން ނުޖެހި، އިތުރު 10 މެންބަރަކަށް ޓިކެޓް ކަށަވަރުވެއްޖެއެވެ.
އެމްޑީޕީގެ ޕްރައިމަރީގައި ކުރިމަތިލުމަށް ހުޅުވާލީ މިދިޔަ މަހުގެ 16ގައެވެ. މިދިޔަ މަހުގެ 25އާ ހަމައަށް ހުޅުވާލި އެ ފުރުސަތުގައި ކުރިމަތިލި މީހުންގެ ތެރެއިން 36 މީހަކު ވަނީ ޕްރައިމަރީގައި ވާދަކުރަން ނުޖެހި ޓިކެޓް ކަށަވަރުކޮށްފައި ކަމަށް މިމަހުގެ ތިނެއްގައި އެ ޕާޓީން ވަނީ އިއުލާންކޮށްފައެވެ. އެއީ އެ ދާއިރާތަކަށް އިތުރު މީހަކު ކުރިމަތިނުލާތީއެވެ.
މިއަދު އެ ޕާޓީން ވަނީ އިތުރު 10 ދާއިރާއަކުން ވެސް ވާދަކުރާނެ ކެންޑިޑޭޓުން މިހާރު ހޮވިފައިވާ ކަމަށް ބުނެފައެވެ. އެއީ:
ކަނޑިތީމު ދާއިރާ - އަމީން ފައިސަލް
- ސަލީމް ހުސައިން - އިނގުރައިދޫ ދާއިރާ
- އަލީ ނިޔާޒް - ކުރެންދޫ ދާއިރާ
- ޝާތިރު އަބްދުއްރަހްމާން - ހުރާ ދާއިރާ
- ރުގިއްޔާ މުޙައްމަދު - ދަނގެތި ދާއިރާ
- މޫސާ ޝިޔާމް ޢަބްދުﷲ ޢަލީ - މުލަކު ދާއިރާ
- ޢަބްދުﷲ ޝަރީފް - ގަމު ދާއިރާ
- އަޙުމަދު ސައީދު - ގެމަނަފުށި ދާއިރާ
- އަޙުމަދު ސައީދު މުޙައްމަދު - ގައްދޫ ދާއިރާ
- އިބްރާހީމް މުއިއްޒު - ހެންވޭރު އުތުރު ދާއިރާ
އެމްޑީޕީން އިއްޔެ ވަނީ އެ ޕާޓީން ޕްރައިމަރީ ބާއްވަންޖެހޭ ދާއިރާތަކާއި، އެދާއިރާތަކަށް ކުރިމަތިލި ކެންޑިޑޭޓުންގެ ނަންތައް އާންމުކޮށްފައެވެ.
އެ ޕާޓީގެ ޕްރައިމަރީ އަންނަ މަހުގެ ތިނެއްގައި ބާއްވަން ހަމަޖެހިފައިވާއިރު، މަޖިލިސް އިންތިޚާބު ތާވަލުކޮށްފައި އޮތީ އަންނަ މާޗު މަހުގެ 17ގައެވެ.
މިހާރު ކުރިއަށްދާ މަޖިލީހަކީ އެމްޑީޕީގެ ތާރީޚުގައި ވެސް އެ ޕާޓީއަށް އެންމެ ބޮޑު އަގުލަބިއްޔަތެއް ލިބުނު މަޖިލީހެވެ. އެންމެ ފަހުން ބޭއްވި ރިޔާސީ އިންތިޚާބު އެމްޑީޕީއަށް ނާކާމިޔާބު ވެފައިވާއިރު ސިޔާސީ ގޮތުން ބާރުވެރިވުމަށް މަޖިލީހުގެ ގިނަ ގޮނޑިތަކެއް އެ ޕާޓީން ހޯދަން ޖެހެއެވެ.