15 Jan 2024, 15:41
ވެރިކަން ކުރާ ޕީއެންސީގެ މަޖިލިސް ޕްރައިމަރީ އަނެއްކާ ވެސް ފަސްކޮށްފިއެވެ.
އެ ޕާޓީގެ ޕްރައިމަރީ މި މަހު 27އަށް ފަސްކޮށްފައިވަނީ މި މަހު 20ގައި ޕްރައިމަރީ ބާއްވާ ގޮތަށް މީގެ ކުރިން ނިންމައިފައިވަނިކޮށެވެ. އެ ތާރީޚަށް ފަސްކުރީ އެންމެ ފުރަތަމަ މިދިޔަ މަހު 23ގައި ބާއްވަން ނިންމައިފައި އޮއްވައެވެ.
އެއާއެކު އަނެއްކާ ވެސް ވެސް މިވަނީ އިތުރު ހަތް ދުވަހަށް ތާރީޚު ފަސްކޮށްފައެވެ. އަދިވެސް އެ ޕާޓީން އަންނަނީ ކެންޑިޑެސީގެ ލިސްޓުތައް ޔަގީންކުރުމުގެ މަސައްކަތް ކުރަމުންނެވެ.
މަޖިލިސް އިންތިޚާބުގެ ޕްރައިމަރީ ފަސްކުރިއިރު، އެންމެ ފަހުން ބޭއްވި މާލޭ މޭޔަރުކަމުގެ ބައި އިލެކްޝަނުން ޕީއެންސީއަށްވަނީ ނާކާމިޔާބާ ކުރިމަތިވެފައެވެ.
އެ ޕާޓީގެ ފަރާތުން ވާދަކުރެެއްވި ކުރީގެ ބަންޑާރަ ނައިބު އައިޝަތު އާޒިމާ ޝަކޫރުގެ މައްޗަށް ކުރި ހޯއްދެވީ، އިދިކޮޅު އެމްޑީޕީގެ އާދަމް އާޒިމެވެ.
އެ ކަމާ ގުޅިގެން ޕީއެންސީގެ ޗެއާޕާސަން އަބްދުއްރަހީމް ވިދާޅުވީ އެ ބައްޔާ ކުރިމަތިލާން ޖެހުނީ އެ ޕާޓީއަށް، އާންމު މެމްބަރުންނާ ރަނގަޅަށް ގުޅުން ނުބޭއްވުމުން ކަމަށެވެ. ނަމަވެސް ކުރިއަށްހުރި އިންތިޚާބުތަކުގައި އެ ކަންކަން ރަނގަޅުކޮށް، ގިނަ ކާމިޔާބީތަކެއް ހޯދާނެކަމަށް ވިދާޅުވިއެވެ.
މީގެ ކުރިން، ސަރުކާރު ކޯލިޝަންގެ ލީޑަރު ރައީސް ޑރ. މުޙައްމަދު މުއިއްޒުވަނީ ކުރިއަށް އޮތް މަޖިލިސް އިންތިޚާބުގައި ޕީޕީއެމް ޕީއެންސީއަށް މަޖިލީހުގެ ފުރިހަމަ މެޖޯރިޓީ ލިބޭނެކަމާމެދު އެއްވެސް ޝައްކެއް ނުކުރައްވާކަމަށް ވިދާޅުވެފައެވެ.
އަދި ރައްޔިތުން ތިބީ އެ ގޮތް ނިންމައިގެން ކަމަށް ވެސް ރައީސް މީގެ ކުރިން ވިދާޅުވެފައިވެއެވެ.