15 Jan 2024, 23:06
ޓެލްއަވީވު (15 ޖަނަވަރީ 2024): އިސްރާއީލުން ތިން މަސް ވަންދެން ޣައްޒާއަށް ބޮންއަޅައި އާންމުންގެ 24 ހާހަށްވުރެ ގިނަމީހުން ޝަހީދުކޮށްލާފައިވީ ނަމަވެސް ހަމާސްގެ މުޖާހިދުންގެ ބާރު ކަނޑުވާލުމުގައި ޔަހޫދީ ސިފައިންނަށް ކާމިޔާބު ނުލިބޭކަމަށް ކަމާބެހޭ ޖާސޫސީ ރިޕޯޓެއް ބުނެފިއެވެ.
އިސްރާއީލުގެ އަސްކަރީ ޖާސޫސީ ރިޕޯޓަކާ ހަވާލާދީ ޔަހޫދީ ނޫހެއްކަމަށްވާ "ޔަދިއޯތު އަހްރަނޯތު" ބުނާގޮތުން ތިން މަސް ތެރޭގައި އިސްރާއީލު ދިން ގަދަ ފަދަ ހަމަލާތަކުން ހަމާސްގެ ބިންގަރާސްތައް ހޯދައި ކޮމާންޑަރުން މަރާލައި ހަމާސްގެ ބާރުކަނޑުވާލެވޭނެކަމަށް އިސްރާއީލުގެ ކޮމާންޑަރުން ލަފާކުރިކުރުން ވަނީ މުޅިން ބިލާހަކަށް ވެފައެވެ.
ބޮންއަޅައި, އެއްގަމު މަގުން ޣައްޒާއަށް އަރައި ޔަހޫދީ ސިފައިން ހަނގުރާމަކުރާތާ ތިން މަސްވީއިރު ވެސް ހަމާސްގެ ބާރުކަނޑުވައެއް ނުލެވެއެވެ. ހަމާސް ބޭނުންވާ ކޮންމެ އިރަކު މިހާރު ވެސް އިސްރާއީލަށް ރޮކެޓް ހަމަލާތައް ދެއެވެ. ހަމާސްގެ ރޮކެޓް ހަމަލާތައް ދިނުން ހުއްޓުވާލުމުގައި ޔަހޫދީ ސިފައިންވަނީ ނާކާމިޔާބުވެފައެވެ.
އެ ނޫސް ބުނާގޮތުން ހަމާސްގެ ބިންގަރާސްތައްވެސް އިސްރާއީލު ސިފައިންގެ ޖެނެރަލުން ލަފާކުރިވަރަށްވުރެ 600 އިންސައްތަ ބޮޑުކަން މިހާރުވަނީ ހާމަވެފައެވެ. އަނެއްކޮޅުން ދޭތެރެއަކުން ހަމާސްއިން އައު ހަތިޔާރު ޔަހޫދީ ސިފައިންނާ ދެކޮޅަށް ބޭންކުރާތީ ހަމާސްގެ ހަތިޔާރުގެ ގާބިލްކަންހުރިވަރުވެސް އިސްރާއީލުގެ ޖެނެރަލުން ލަފާކުރިވަރަށް ވުރެ މާބޮޑެވެ.
ޣައްޒާއަށް ބޮންއަޅައި އާންމުން މެރުމުގައާއި ޣައްޒާގެ ހޮސްޕިޓަލްތަކާއި ގެތަކާއި ސްކޫލްތަކާއި މިސްކިތްތަކަށް ހަމަލާދީ އެތަންތަން ތަޅައި ސުންނާފަތިކޮށް ހަނގުރާމައިގެ ޖަރީމާ ހިންގުމުގައި އިސްރާއީލަށް ކާމިޔާބު ލިބުނު ނަމަވެސް ހަމާސްގެ މުޖާހިދުންނާ ކުރިމަތިލައިގެން ޔަހޫދީ ސިފައިންނަށް އެއްވެސް ކާމިޔާބެއް ނުލިބެއެވެ.
މިކަން އެނގެނީ ހަމާސްގެ ކޮމާންޑަރުންނާއި ހަނގުރާމަވެރިންގެ ގިނަބަޔަކު އުޅޭތަންތަން ނޭނގޭކަމާއި ޔަހޫދީ ސިފައިންގެ ހަމަލާތަކުގައި ހަމާސްގެ މާގިނަ ބަޔަކު މަރާލެވިފައިނުވާކަން އިސްރާއީލު ޖާސޫސީ ރިޕޯޓްތަކުން ހާމަވާތީއެވެ. "ޔަދިއޯތު އަހްރަނޯތު"ގެ ރިޕޯޓްގައިވެސް މިކަންވަނީ ފާހަގަކޮށްފައެވެ.
ހަމާސްގެ މުޖާހިދުން
އަނެއްކޮޅުން މުޖާހިދުންގެ ރައްދު ހަމަލާތައް ވަރުގަދަކަމުން ޣައްޒާގެ އެއްވެސް ސަރަހައްދެއްގައި ޗެކްޕޯސްޓްތަކާއި މަރުކަޒުތައް ހަދައި ފައިހަރުކޮށްލައިގެން ޔަހޫދީ ސިފައިންނަށް ނުތިބެވޭކަން އިސްރާއީލުގެ ކޮމާންޑަރުން ވަނީ ހާމަކޮށްފައެވެ. ތިން މަސްދުވަހު ހަނގުރާމަކުރިއިރުވެސް ޔަހޫދީ ސިފައިން ޖެހެނީ ޣައްޒާއަށް ވަދެގަތުމަށްފަހު އަވަސް އަރުވާލައިގެން ފައިބާށެވެ.
ޣައްޒާގައި ވެއްޓި ހަލާކުވެފައިވާ އިމާރާތްތަކުގެ ގާކުނޑިތައްވެސްވަނީ ޔަހޫދީ ސިފައިންނަށް ބޮޑު ތުރާލަކަށް ވެފައިކަން ޔަހޫދީ ސިފައިންގެ ވާހަކަތަކުން ވަނީ ހާމަވެފައެވެ. ގާކުނޑިތަކާއި ވައްޓާލާފައިވާ އިމާރާތްތައް ގިނަކަމުން ޔަހޫދީންގެ ޓޭންކްތަކާއި އާމެޑް ވެހިކަލްތަކަށް ޣައްޒާގައި ހަރަކާތްތެރި ނުވެވެއެވެ.
އަނެއްކޮޅުން ވައްޓާލާފައިވާ އިމާރާތްތައްވެސް ވެފައިވަނީ ފަލަސްތީނުގެ މުޖާހިދުން ޔަހޫދީ ސިފައިން ދަންތުރަތަކުގައި ޖައްސާތަންތަން ކަމުގައެވެ. ހަމާސްގެ މުޖާހިދުންވަނީ ސިއްރިއްޔާތުގައި ބިންގަރާސްތަކުން ނުކުމެގެން މިތަންތަނަށް ޔަހޫދީ ސިފައިން ވައްދައި އެމީހުންގެ އެތައް ބަޔަކު މަރާލާފައެވެ.
މިދިޔަ އޮކްޓޯބަރު މަހު ހަމާސްއިން އިސްރާއީލުގެ އަނިޔާވެރިކަމާއި އިސްތިއުމާރާ ދެކޮޅަށް ދިން ކުއްލި އަދި ކާމިޔާބު ހަމަލާތަކުގައި ބާރުގަދަ ކަމަށް ބުނާ ޔަހޫދީ ސިފައިންވަނީ މުޅިން ސިއްސުވާލައި ގިއްގަޅުވާލާފައެވެ.
އެހަމަލާތަކުގައި ހަމާސްގެ މުޖާހިދުން ޔަހޫދީ ސިފައިންގެ 319 މީހުން މަރާލައި ހާހަކަށްވުރެ ގިނަ މީހުން ޒަޚަމްކޮށް 200އަށް ވުރެ ގިނަމީހުން އަސީރުންގެ ގޮތުގައި ހައްޔަރުކޮށްގެން ގެންދިޔައިރު އެކަން ޔަހޫދީ ސިފައިންނަށް ރޭކާލީވެސް އެއްދުވަސް ފަހުންނެވެ.
ޔަހޫދީ ސިފައިން ޣައްޒާގައި ހަމާސްގެ މުޖާހިދުންނާ ދެކޮޅަށް ކުރާ ހަނގުރާމައިގާ ކާމިޔާބު ނުލިބޭކަން އެނގެނީ ހަމާސްގެ އަތްދަށުގައިވާ ޔަހޫދީ އެއްވެސް އަސީރަކު މިނިވަން ކުރުމުގައި ޔަހޫދީ ސިފައިންނަށް އެއްވެސް ކާމިޔާބެއް ނުލިބޭތީއެވެ. އަދި ހަމާސްގެ ރޮކެޓް ހަމަލާތައް ނުހުއްޓުވި ހަމާސްގެ ބިންގަރާސްތައްވެސް ހަލާކުކޮށް ނުލެވޭތީއެވެ.
ހަމާސްވެ މައްޗަށް ކާމިޔާބު ނުހޯދޭ މައްސަލާގައި ޔަހޫދީ އިސްވެރިން ހާސްވެ ކަންބޮޑުވެފައިވާއިރު އިސްރާއީލުގެ ސަރުކާރުގެ އެތެރޭގައިވަނީ ބޮޑު ކޯޅުންގަނޑެއް އުފެދިފައެވެ.
ހަމާސް އާ ހަނގުރާމަ ކުރުމަށްޓަކައި އެމެރިކާއާއި އިނގިރޭސީން ހުއްޓުމެއްނެތި ޔަހޫދީންނަށް ހަތިޔާރާއި ޖާސޫސީ މައުލޫމާތު ފޯރުކޮށްދެމުން ގެންދެއެވެ. ބައިނަލްއަގްވާމީ ފެންވަރުގައި ޔަހޫދީންގެ އަނިޔާވެރިކަން ހިމާޔަތް ކޮށްދެނީވެސް އެމެރިކާއާއި އިނގިރޭސިވިލާތެވެ. ފަލަސްތީނު މުޖާހިދުންނަށް ހަތިޔާރުވެސް އަދި އެހެން އެއްޗެއްވެސް ލިބޭނެގޮތެއް ނެތެވެ.
ޣައްޒާގައި ހަމާސްގެ އަތްދަށުން ޔަހޫދީ ސިފައިންނަށް ލިބޭ ނާކާމިޔާބީ ފޮރުވުމަށްޓަކައި އިސްރާއީލުގެ ޖާސޫސީ އިދާރާގެ އެޖެންޓުން ގެންދަނީ ޓެރަރިސްޓުން ރެކްރޫޓްކޮށްގެން ހަމާސްގެ އިސްވެރިން ތިއްބަވާ ގައުމުތަކުގައި ޓެރަރިޒަމްގެ އަމަލުތައް ހިންގައި ހަމާސްގެ އިސްލީޑަރުން ޝަހީދުކުރުމުގެ ފިނޑި އަމަލުތަކެއް ހިންގަމުންނެވެ. ޓެރަރިޒަމްގެ މިއަމަލުތައް އިސްރާއީލުގެ ވެރިން އެގައުމުގެ އާންމުންނަށް ދައްކަނީ ޔަހޫދީ ސިފައިން ހަމާސްގެ މައްޗަށް ހޯދާ ކާމިޔާބީގެ ގޮތުގައެވެ.