16 Jan 2024, 10:13
"ތުނބުޅިއެއް ނުބޭލޭނެ... ވަރިހަމަ ކޮންމެ މީހަކު ބުންޏަސް..." އާރިޒް ގަދަބަސް ބުނެލިއެވެ.
********
"ތިއެއް އިނގޭނީ ލޯބިވާ ކުއްޖަކާ ދިމާވީމަ..." މާނަވް ހީގަތެވެ.
"އަމިއްލަ ކަންކަމާ ބާރު ފޯރުވާވަރުގެ މީހަކު އަހަރެންގެ ހަޔާތަކަށް ނުގެންނާނަން..." އާރިޒް ޔަގީންކަން ދިނެވެ.
"ތިބުނަނީ މީހަކާ ނީންނާނަމޭތަ؟..." މާނަވް އަނގަޔަށް ގޮތެއް ހަދައިލިއެވެ. "އެނގިދާނެތާ..."
އާރިޒްގެ ފޯނު ރިންގްވާން ފެށިއެވެ. ގުޅީ ސަޗިންއެވެ. މާނަވްގެ ކައިރީގައި ކާގެއަށް ދިޔުމަށް އެދިފައި، އާރިޒް ދުރަށްޖެހުނެވެ. ފޯނު ނަގާ ކަންފަތުގައި ޖައްސައިލިއެވެ.
"ޔެސް ސަޗިން!..." އާރިޒް ވާހަކަ ދެއްކީ މަޑުންނެވެ.
"މިރޭގެ ފްލައިޓުން ޖާގަ ހަމަޖައްސައިފިން އިނގޭތޯ... މާދަމާ ހެނދުނު އެމީހުން ތިބޭނީ މިކޮޅުގަ..." ސަޗިން ތަފްސީލް ދިނެވެ.
"އެއްވެސް މީހަކު އޭނާއަށް ގޯނާއެއް ކުރިޔަ ދީގެން ނުވާނެ..." އާރިޒް ބުނެލިއެވެ. "ޝީ އިޒް މައިން..."
"ލައްބަ ސަރ..." ސަޗިން ޖަވާބުދިނެވެ. "އެކަމަކު..."
ސަޗިން ވާހަކަ ނުދައްކާ އިރުކޮޅަކު މަޑުކޮށްލުމުން، އާރިޒް ނުތަނަވަސްވިއެވެ.
"ކިހިނެއްވީ؟..." އާރިޒް ސުވާލުކުރީ ސަޗިން އިތުރު އެއްޗެއް ނުބުނެ ގިނައިރުވުމުންނެވެ. އަނެއްކޮޅުން ބުނަންޖެހޭ ވާހައިގެ ބާވަތުން ސަޗިން ހުރީ ދެފިކުރެއްގައެވެ.
"ފިރިހެންކުއްޖާގެ ބެކްގްރައުންޑް އެހާ ރަނގަޅެއް ނޫން..." ނުބުނަން ހުރެފައި ސަޗިން ބުނެލިއެވެ.
"ސަޗިން ތިކަމާ ހާސްވާނެ ކަމެއް ނެތް... މިކޮޅަށް އައުމަށްފަހު، ހުރިހާ ކަމެއް ދާނީ އަހަރެން ބޭނުންވާގޮތަށް... ޕިންކްވިލާއިން އެމީހުންނަށް އެޕާޓްމަންޓެއް ހަމަޖައްސާ!..." އާރިޒް އެދުނެވެ.
"ޕިންކްވިލާތޯ؟..." ސަޗިން ޔަގީންނުވެގެން ދެފަހަރަކު ސުވާލުކުރިއެވެ.
"ޔެސް... އޭނަ ހުންނަންވާނީވެސް އެ ރޫމްގަ..." އާރިޒް ދުރުދުރުން ބުނި ނަމަވެސް އެ ބުނި އެއްޗެއް ސަޗިންއަށް އެނގުނެވެ.
"ކާކު އަންނަނީ؟..." މާނަވްގެ އަޑަށް އާރިޒް ސިހިފައި ފޯނު ކަނޑާލިއެވެ.
ދޭނެ ޖަވާބަކާއިމެދު ވިސްނައިލަން އާރިޒަށް މަޖުބޫރުވިއެވެ.
"ކާކުހޭ އަންނަނީ؟... ކޮން ބިޓެއް؟..." މާނަވް މަޖާ ރާގަކަށް ސުވާލުކުރިއެވެ. "ކޮންކަމަކާތަ ދެލޯ ބޮޑުވެފަ ތިހުރީ؟..."
"އެއީ ކްލަޔަންޓުންތަކެއް..." ކާގެއާއި ދިމާއަށް ހިނގައިގަންނަމުން އާރިޒް ބުންޏެވެ.
"ޕިންކްވިލާއިން؟... ކްލަޔަންޓުންނަށް؟... ކީއްވެ؟..." މާނަވް ހުރީ ހައިރާންވެފައެވެ.
"ލައްކަ ދުވަހު އެތަން ހުސްކޮށް ބެހެއްޓިއްޖެ އެއްނު... މިހެން ކިހާ ދުވަހަކު އުޅެންވީ؟... މޫވްއޮން ކުރަންވެސް ޖެހޭނެތާ..." އާރިޒް ވާހަކަ ދެއްކީ ފަރުވާކުޑަ ރާގަކަށެވެ.
މާނަވް ހުރީ ހިނގައިގަންނަންވެސް ނޭނގިފައެވެ. އާރިޒަކީ އެހާ ފަސޭހައިން ގޮތްދޫކުރާ މީހެއް ނޫނެވެ. އެތައް ދުވަހަކުންވެސް ބަދަލުނުވި ހިޔާލެއް މިއަދު ކުއްލިއަކަށް ބަދަލުވުމުން، މާނަވް އަޖައިބުނުވާންވީ ސަބަބެއް ނެތެވެ. މީގެ އެތައް އަހަރެއް ކުރިން ފެށިގެންވެސް ޕިންކްވިލާގައި މީހަކު ނޫޅެއެވެ. ތަނުގައި މީހަކު ދިރިނޫޅުނަސް، ގޭތެރެ ބެލެހެއްޓުމަށް ނޯކަރުން ހަމަޖައްސާފައި ތިބެއެވެ. އެއީ އާރިޒް ބޭނުންވި ގޮތެވެ. އެތައް ހަނދާނަކާއި ގުޅިފައިވާ ގެއަކަށް ވާތީ އެތަނުގައި އެއްވެސް މީހަކު ދިރިއުޅެން އާރިޒް ބޭނުންނުވަނީއެވެ.
*******
އައު ދުވަހަކާއިއެކު، ލިޝާއަށް ފެނުނީ މުޅީން އައު މޫނުތަކެކެވެ. ކައިވެނީގެ ދުވަހު ހިނިތުންވެފައި އޭނާއަށް ބެލި މޫނުތަކުން މިއަދު ފެނުނީ ނުރުހުމެވެ. ހެޔޮހިތުން އަނގައިން ބުނެލާނެ މީހަކު ނުވިތަނުގައި އެންމެންވެސް ބެލީ ކުދިކުދި ގޯނާކޮށް ލިޝާއަށް ޖެއްސުން ކުރެވޭތޯއެވެ. އެހާ ވަރުން ކައިވެނީގެ ކަންކަން ނިންމާފައި ކުއްލިއަކަށް އެމީހުންނަށް އައި ބަދަލުން ލިޝާ ހުރީ ބަސްހުއްޓިފައެވެ. އެންމެ ރެއަކުން ހުރިހާ ކަމެއް ބަދަލުވީ ކީއްވެ ހެއްޔެވެ؟ ލިޝާއަށް ކުރެވުނީ ކޮން ކުށެއް ހެއްޔެވެ؟
އެންމެން ސަޔަށް އިންސާފުކުރަމުންދިޔައިރު، ލިޝާއަށް ގޮވާވެސް ނުލައެވެ. ކާގެއަށް ވަދެފައިވެސް ލިޝާ ހުރީ ކޮޅަށެވެ. އިށީންނާނެ ގޮނޑިއެއް ނެތް ތަނުގައި، އެތަނުގައި ލިޝާ ހުރިކަން އެއިން މީހަކަށް ނުވެސް އެނގޭ ކަހަލައެވެ. އެންމެން ކައި ނިމުމުން ލިޝާ ގޮނޑީގައި އިށީނެވެ. ކޭ ތަށިތައް ދޮވެނުލައި، އެންމެންވެސް މޭޒުދަށުން ފައިބައިގެން ދާން ފެށިއެވެ.
"ތަށިތައް ދޮންނާތި!..." އަކްރަމްގެ ދައްތަ އުބައިދާ ލިޝާއަށް އަމުރުކުރިއެވެ. އޭނާ ދަމުން ދިޔައީ ލިޝާގެ އުނގަށް ހޫނު ސައިތަށި ބަންޑުންކޮށްލާފައެވެ. ނޭނގޭކަމަށް ހަދާފައި ކުރި ނަމަވެސް އެއީ ގަސްތުގައި ކުރި ކަމެއްކަން ލިޝާއަށް އެނގުނީ ލިޝާއަށް ވީގޮތް ފެނި، އުބައިދާ ހިނިތުންވެލި މަކަރުވެރިގޮތް ފެނިފައެވެ.
ލިޝާގެ އަތާއި، ފަލަމަސްގަނޑުން ބޮޑުބައެއް ފިހުނެވެ. ދުވެފައި ކޮޓަރިއަށް ވަންނަން ދިޔައިރު ކޮޓަރި ހުރީ ތަޅުލާފައެވެ.
"ސޮރީ... އޮޅިގެން ތަޅުލެވުނީ... މަންމަ އައީމަ ދެން ހުޅުވޭނީ...." އަކްރަމްގެ ކޮއްކޮ ނުސައިބާ ހުރީ އެ ފުރުސަތަށް ބަލާށެވެ.
"ނެތްތަ ފުށްކޮޅެއް؟..." ހިތްވަރުކުރަން މަސައްކަތް ކުރަމުން ލިޝާ އަހައިލިއެވެ.
"އަހަރެމެންމީ ފުށް ބޭނުންކުރާ ބައެއް ނޫން..." ނުސައިބާގެ ޖަވާބު ފުރިހަމަވީއިރު، އޭނާ ކޮޓަރިއަށް ވަދެ ދޮރު ލައްޕައިފިއެވެ.
"އަހަރެމެންގެ ދިރިއުޅުން ނަރަކައަކަށް ހަދާލާފަ އެހެން ހުރެވޭނެތަ؟..." ނުސައިބާ އެތެރެއަށް ވަންތަން ފެނުމުން އުބައިދާ ބުންޏެވެ.
"އޭނަ ހިތުން ވަރަށް ތުއިވެފަ އެހުންނަނީ..." ނުސައިބާ މޫނަށް ޖައްސައިލީ ފޫހި ވައްތަރެކެވެ. "ދޮންތަ ތިހެދީ ރަނގަޅަށް... އަދިވެސް ބޮޑަށް ފިއްސާލިނަމަ ރަނގަޅުވީހީ..."
ނަސީރާ އައީ ރޭގަނޑު އަށެއްވެސް ޖެހި ފަހުންނެވެ. އެހުރިހާއިރު ލިޝާ ހުރީ ފާހާނާއަށްވެސް ވަދެނުލައެވެ. ހެނދުނޫއްސުރެ ކާއެއްޗެއް ނުކައެވެ. އެގޭގައި ދިރޭ އެތައް ފުރާނައެއް އުޅެމުންދިޔައިރު ލިޝާއަށް އަޅައިލާނޭ ހަމަ އެކަކުވެސް ނުވިއެވެ.
"ކީއްވެފަ ބޭރުގަ ތިހުރީ؟..." ނަސީރާގެ ބެލުމުގައި ހުރީ ފަރުވާކުޑަ ގޮތެކެވެ.
"މި.. ކޮޓަރި ތަޅުލެވިފަ... އަތް ފިހިގެން..." ފިހިފައި އޮތް ތަން ދައްކައިލިއިރު، ލިޝާގެ ދެލޯ ކޮންމެވެސް ވަރަކަށް ފެންކަޅިވެއްޖެއެވެ. ލިޝާ ހީކުރީ ނަސީރާގެ އަޅާލުން ލިބޭނެކަމަށެވެ. ޖަޒުބާތީ ވެވުނީ މައެއްގެ ގާތްކަން ލިބުނީކަމަށް ހީކޮށެވެ.
"ބަދިގެއަށާ ތަންތަނަށް ނުވަދެވިއްޔަ ބޮޑުވަނީ... ދެން މީހުންނާ އިނދެގެން އައިއްސަ ކަމެއްވީމަ ގޯސްވާނީ ފިރިމީހާގެ އާއިލާ..." ނަސީރާ ރުންކުރުވިއެވެ.
ލިޝާ އިސްޖަހައިލިއެވެ. ކިތަންމެ ހިތްވަރުކުރި ނަމަވެސް އޭނާގެ ބޮޑު ދެލޮލުގައި ވިދަން ފެށި ކަރުނަތައް ހިފަހައްޓައެއް ނުލެވުނެވެ. މަންމަގެ ލޯތްބާއި ހިމާޔަތުގައި އުޅެފައި ކުއްލިއަކަށް ވަދެވުނު ކަށި ޖަންގަލީގެ ސަބަބުން ލިޝާ ދިރިއުޅުމަށް ކުރަމުން އައި އުއްމީދު ފުނޑުފުނޑުވިއެވެ. ހިތް ފަޅައިގެން ދިޔައެވެ.
"ހޫން ދެން ރޯނެކަމެއް ނެތޭ... ފެންވަރައިގެން އާދޭ ބޭސްފުޅި ބަލާ... މިރޭ ދަންވަރު ފްލައިޓުން ފުރަން ތައްޔާރުވެގެން ނުކުންނާތި!..." ކޮޓަރި ހުޅުވައިދެމުން ނަސީރާ ބުންޏެވެ. "މިއޮތީ ޕާސްޕޯޓު..."
ލިޝާގެ ޕާސްޕޯޓު އޮތީ ނަސީރާގެ އަތުގައެވެ. ނަސީރާ އެ ނެގީ ލިޝާގެ ކައިރީގައި އަހައިލުމެއް ނެތިއެވެ. ފޮށީގައި އޮތް އެއްޗެއް އަހާލުމެއްނެތި ނެގުމުން، ލިޝާ ހިތްހަމަނުޖެހުނެވެ. އެކަމަކު އެކަން ނުދައްކާވޭތޯ މަސައްކަތް ކުރިއެވެ.
ކޮޓަރިއަށް ވަދެވުމާއިއެކު ލިޝާގެ ބަޑި ފަޅައިގެން ދިޔައެވެ. ފަރުވާނުކޮށް ގިނައިރުވުމުން، ފިހިފައިވާ ތަންތަނުގައި ހުރީ ފޮޅުލާފައެވެ. ދިލަ ނަގާވަރުން ލިޝާއަށް ކެތްވަނީއެއް ނޫނެވެ. އެ ތަންތަނަށް ހުދު ފުށްކޮޅެއް އަޅައިގެން ލިޝާ އިނީ ކޮޓަރި ކަނެއްގައެވެ. އަމިއްލަ މައިންބަފައިންނާއި، ޝަފާޒް އަދި ސުމާގެ މަތިން މާ ބޮޑަށް ހަނދާންވާން ފެށިއެވެ. އެމީހުންގެ އެހީތެރިކަން ލިބޭނެނަމައޭ ހިތަށް އެރިއެވެ. އެކަމަކު ކުރެވޭނެ ކަމެއް ނެތެވެ. އެމީހުން ތިބީ މާ ދުރުގައެވެ. ރޮއެރޮއެފައި ލިޝާ އޭނާގެ ފޯނުން މަންމަމެންގެ ތަސްވީރު ބެލިއެވެ. މަންމަމެން އޭނާ ވައްޓާލި އަނދަވަޅުން ސަލާމަތްކޮށްދިނުމަށް އެދުނީ ގިސްލަމުންނެވެ. ސުމާގެ މެސެޖުތައް ފެނުމުން، ލިޝާއަށް އިތުރަށް ރޮވުނެވެ. ޝަކުވާތައް ބަންޑުންކޮށްލަން ބޭނުންވިއެވެ. އެކަމަކު، އުޅެންޖެހުނު ހިތްދަތި ދިރިއުޅުމުގެ ވާހަކަ ސުމާގެ ކައިރީގައި ބުނާނެ ހިތްވަރެއް ލިޝާއަކަށް ނުލިބުނެވެ. އިނގިލިތައް ހަރަކާތެއް ނުކުރިއެވެ.
ފުރަން ނުކުތްއިރުވެސް ދަނީ ކޮންތާކަށް ކަމެއް، ކޮން ބަޔަކާއި އެކުގައިކަމެއް ލިޝާއަކަށް ނޭނގެއެވެ. ކާރަށް އެރުމުގެ ކުރިން މަދީހާއަށް ގުޅާފައި އިންޑިޔާއަށް ދާ ވާހަކަ ބުނަން ނަސީރާ އެދުނެވެ. ފޯނުގައި ހުންނަން ގިނަ ވަގުތެއް ނުދިނެވެ. ކާރު އައުމުން، ކާރަށް އެރީ އަކްރަމް އެކަންޏެވެ. ދާ ތާކަށް ދަނީ އަކްރަމާއިއެކު އެކަނިކަން ލިޝާއަށް އެނގުނީ އެއާޕޯޓުން އެހެން މީހުން ނުފެނުމުންނެވެ.
އެކަނިވީއްސުރެ އަކްރަމް ހުރީ ލިޝާގެ ކައިރީގައި ވިއްދާފައެވެ. ކުދިކުދި ގޯނާކޮށް ހެދިއެވެ. ލިބުނު ފުރުސަތުގެ ބޭނުންހިފަން އަކްރަމް ބޭނުންވިއެވެ. އިންޑިޔާއަށް ގޮސްފައި ލިޝާ އޭނާގެ ހައްގަކަށް ހެދުމަކީ އަކްރަމްގެ އެންމެ ބޮޑު އެއް މަގުސަދެވެ. އޭނާ ހުއްޓުވަން އިތުރު މީހަކު ނުހުންނާނެއެވެ. އޭރު ނަސީރާ ހުއްޓުވިޔަސް، ލިޝާއަށް ދެން އޭނާގެ އަތްދަށަކުން މިންޖެއް ނުވެވޭނެއެވެ. ފޮނި ހުވަފެންތައް ދެކެމުންދިޔަ އަކްރަމް ލިޝާގެ އަތުގައި ހިފައި އުފުލާލިއެވެ. މޫނާއި ކައިރިކޮށްލީ އެ އަތުގައި ބީހިލުމުގެ މަގުސަދުގައެވެ.
"އަތް ފިހިފައެއްނު މިއޮތީ..." އަކްރަމަށް ލިޝާގެ އަތް ފެނުމުން ކަންބޮޑުވެފައި ބުނެލިއެވެ. "ނުބަލާތަ އުޅެނީ؟... ހަނީމޫނަށްދާއިރު ތިހެން ހުރީމަ ކިހިނެއް ވާނީ..."
ލިޝާ އަތް ދަމައިގަތެވެ. ހަމްދަރުދީވުމުގެ ބަދަލުގައި އަކްރަމްވެސް ބެލީ ލިޝާ ދެރަކޮށް ހިތުގައި ޖައްސައިލެވޭތޯއެވެ.
ދިގު ދަތުރަކަށްފަހު މަންޒިލާއި ހަމައަށް ދެވުނެވެ. ލިޝާ ހުރީ ވަރުބަލިވެފައެވެ. ފޮށިތައް ހިފައިގެން ލިޝާމެން ނުކުތްއިރު، އެމީހުންގެ ނަން ލިޔެފައިވާ ބޯޑެއް ހިފައިގެން ފިރިހެނަކު ހުއްޓެވެ. އަކްރަމް އަތުން ހަނާއަޅައިލުމުން އެމީހާ އައިސް ފޮށިތައް އަތުލިއެވެ. ކާރަށް ފޮށިތައް އަރުވާފައި ލިޝާމެން އެރުމަށް ކާރުގެ ދޮރު ހުޅުވައިދިނެވެ.
********
އަތުގައި އޮތް ޓެބްލެޓަށް ނަޒަރު ހުއްޓާލައިގެން އޮތް އާރިޒްގެ ދެލޮލުގައިވީ ނިދީގެ އަސަރެވެ. ރޭގައި ގިނައިރު ހޭލާ އުޅުމުގެ ސަބަބުން އާރިޒްގެ މޫނުން ފެންނަމުންދިޔައީ ވަރުބަލިކަމެވެ. ހެނދުނު ކަސްރަތުކުރަން ތެދުވާ އާރިޒް މިއަދު އެގަޑިއަށް ތެދުވާހިތެއް ނުވިއެވެ. އޭނާ ޓެބްލެޓުން ބަލަމުންދިޔައީ ސީސީޓީވީ މަންޒަރެކެވެ. ޕިންކްވިލާއަށް އައި މެހެމާނުން ގޭތެރެއަށް ވަން މަންޒަރާއި ޑްރައިވަރު ފޮށިތައް ވެއްދި މަންޒަރު ބަލަން އޮތް އާރިޒްގެ ތުންފަތަށް ވެރިވީ ލުއި ހިނިތުންވުމެކެވެ. އާރިޒް ނިދާ އެއްޗެހީގައި އޮއްވާ މާނަވް އެތެރެއަށް ވަނެވެ. އާރިޒް އަވަހަށް ޓެބްލެޓް ބަންޑުން ބޭއްވިއެވެ.
"އަހަރެން މިއަދީ ދުވަން ގޮއްސަ..." މާނަވް އެނދުގައި ޖައްސާލުމުން އާރިޒް ތެދުވިއެވެ. ޓެބްލެޓު ހިފައިގެން ގޮސް ސޯފާގައި އިށީނެވެ.
"ދޭބަލަ ފެންވަރަން..." އާރިޒް މޫނަށް ވައްތަރެއް ޖައްސައިލިއެވެ.
މާނަވް ފެންވަރަން ވަނުމުން އާރިޒް އަވަހަށް ޓެބްލެޓަށް ނަޒަރު ހުއްޓައިލިއެވެ. ކުރިން ބަލަމުންދިޔަ ސީސީޓީވީ މަންޒަރު ހުޅުވިއެވެ. ފެނުނު މަންޒަރުން އާރިޒްގެ ބޮލަށް އެނބުރުން ނޭރީ ކިރިޔާއެވެ. ދުވެފައި ކޮޓަރިން ނުކުތްއިރު، ލައިގެން ހުރި އެއްޗެއްސާއި މެދުގައިވެސް އޭނާއަށް ވިސްނައެއް ނުލެވުނެވެ.
(ނުނިމޭ)