15 Jan 2024, 10:03
މަސްތުވާތަކެއްޗަށް ދެވިހިފައިފައިވާ މީހުންނަށް ފަރުވާ ދިނުމަށް ޑުރަގު ރިހެބިލިޓޭޝަން ސެންޓަރުތައް ތަރައްގީކޮށް ހިންގުމުގެ ފުރުސަަތު އަމިއްލަ ފަރާތްތަކަށް މިއަދު ހުޅުވައިލައިފިއެވެ.
ނޭޝަނަލް ޑުރަގު އެޖެންސީން މިއަދު ކުރި އިއުލާނެއްގައި ބުނީ، މަސްތުވާތަކެއްޗަށް ފަރުވާދޭ މަރުކަޒުތައް އުފައްދައި ހިންގުމަށް ޝައުގުވެރިވާ އަމިއްލަ ފަރާތްތަކަށް އެ ފުރުސަތު ދިނުމުގެ އިޚްތިޔާރު ނޭޝަނަލް ޑުރަގު އެޖެންސީއަށް ލިބޭ ކަމަށެވެ.
އަމިއްލަ ފަރާތްތަކަށް އެ ފުރުސަތު ހުޅުވައިލީ އެހެންވެކަމަށް އެ އެޖެންސީން ބުންޏެވެ.
ޑުރަގު ރިހެބިލިޓޭޝަން ސެންޓަރުން ފޯރުކޮށްދޭންވާނެ ޚިދުމަތްތައް
އައުޓް ޕޭޝަންޓް ޑީޓޮކްސިފިކޭޝަން ޚިދުމަތް ފޯރުކޮށްދިނުން
- ސައިކޭޓްރިކް އިވެލުއޭޝަން ހެދުން
- ކައުންސެލިން ޚިދުމަތް ދިނުން
- ސައިކޯ-ސޯޝަލް ތެރަޕީ ޚިދުމަތް ދިނުން
- ޑުރަގު ޓެސްޓްކުރުން
- ސައިކޮލޮޖިކަލް އެސެސްމަންޓް ހެދުން
އެ އެޖެންސީންވަނީ މި ކަމަށް ޝައުގުވެރިވާ ފަރާތްތަކުން މި މަހުގެ 21ވަނަ ދުވަހުގެ މެންދުރު 13:00ގެ ކުރިން އެ ކަމަށް އެދި ރަޖިސްޓްރޭޝަން ފޯމު ހުށަހަޅަންވާނެކަމަށް ބުނެފައެވެ. ރަޖިސްޓަރުނުކުރާނަމައާއި، ގަޑިއަށް ޕްރޮޕޯސަލް ހުށަނާޅާ ފަރާތްތަކުގެ ޕްރޮޕޯސަލް ބަލައިނުގަންނާނެ ކަމަށް ވެސް އެ އެޖެންސީން ބުންޏެވެ.
މި ކަމަށް އެދޭ ފަރާތްތަކަށް މައުލޫމާތު ސެޝަން އޮންނާނީ އަންނަ ބުދަ ދުވަހުގެ ހެނދުނު 10:00 ގައެވެ. ޕްރޮޕޯސަލް ހުށަހެޅުން އޮންނާނީ މި މަހުގެ 22ވަނަ ދުވަހެވެ.
ރާއްޖޭގައި މަސްތުވާތަކެތީގެ މައްސަލަ ވަރަށް ބޮޑެވެ. އެ ކަމަށް ހައްލު ގެނައުމުގެ ގޮތުން، ރާއްޖޭގެ އެކި ކަންކޮޅުތަކުގައި ރިހެބިލިޓޭޝަން ސެންޓަރުތައް ގާއިމުކުރުމަކީ ސަރުކާރުގެ ސިޔާސަތެކެވެ.