15 Jan 2024, 09:23
މި މަހުގެ ކުރީކޮޅު ޝަހީދުކޮށްލައިފައިވާ ޣައްޒާގެ ވެރިކަންކުރާ ހަމާސް ޖަމާއަތުގެ ނާއިބު ލީޑަރު ޞާލިޙު އަލް ޢާރޫރީގެ ދެ ދައްތައިން ކަމަށްވާ ފާތިމާ ޢާރޫރީއާއި ދަލާލް ޢާރޫރީ އިސްރާއީލުގެ ފައުޖުތަކުން ހައްޔަރުކޮށްފިއެވެ.
އެ ދެމީހުން ހައްޔަރުކޮށްފައި ވަނީ އިސްރާއީލުން ހިފައިފައިވާ ހުޅަނގު އައްސޭރީގައި އެ މީހުން ދިރިއުޅޭ ގެތައް ފާސްކުރުމަށްފަހުގައި ކަމަށް ރިޕޯޓުތައް ބުނެއެވެ. ދަލާލް ހައްޔަރުކޮށްފައި ވަނީ ރާމަﷲގެ ހުޅަނގު އުތުރުން އޮންނަ ޢާރޫރީ ސިޓީގައި ހުންނަ އޭނާގެ ގެއިންނެވެ. ފާތިމާ ހައްޔަރުކޮށްފައި ވަނީ އަލް ބީރާ ސިޓީގައި ހުންނަ އޭނާގެ ގެއިންނެވެ.
ޞާލިޙު އަލް ޢާރޫރީއަކީ ޣައްޒާގައި ވެރިކަން ކުރާ ހަމާސް ޖަމާޢަތުގެ ނައިބު ލީޑަރެކެވެ. އޭނާ ޝަހީދުކޮށްލައިފައި ވަނީ ލުބުނާނުގެ ވެރިރަށް ބެއިރޫތަށް ދިން ޑްރޯން ހަމަލާއެއްގައެވެ. ހަމަލާ ދިން ވަގުތު އޭނާއާ އެކު ހަމާސްގެ ހަތިޔާރު އެޅި ގޮފި, އިއްޒުއްދީން އަލްގައްސާމް ބްރިގޭޑްސްގެ އިތުރު ދެ ވެރިން ވެސް ތިއްބެވެ.
ލުބްނާނުގެ ވަގުތީ ބޮޑުވަޒީރު ނަޖީބް މީޤާތީ ވަނީ ބެއިރޫތަށް ދީފައިވާ އެ ހަމަލާ އެންމެ ހަރުކަށި އިބާރާތުން ކުށްވެރި ކުރައްވައިފައެވެ. އަދި، މިއީ ކުރިމަތިލުމެއް ފެށުމުގެ ބޭނުމުގައި ޔަހޫދީން ދީފައިވާ ހަމަލާއެއްގެ ގޮތުގައި މީޤާތީ ސިފަ ކުރެއްވިއެވެ.
ލުބުނާންގެ ރައްޔިތަކަށް އަމާޒުކޮށް، ނުވަތަ ލުބުނާނުގައި ދިރިއުޅޭ ބޭރު ގައުމެއްގެ ރައްޔިތަކަށް އަމާޒުކޮށް އިސްރާއީލުން ހަމަލާއެއް ދީފިނަމަ، އެ ކަމުގެ ނަތީޖާ ހިތިވާނެ ކަމަށް ލުބްނާނުގައި ހަރަކާތްތެރިވާ ހަތިޔާރު އެޅި ހިޒްބުالله ޖަމާއަތުގެ ސެކްރެޓަރީ-ޖެނެރަލް ޙަސަން ނަޞްރުالله ވެސް ވަނީ މީގެ ކުރިން ވިދާޅުވެފައެވެ.
އޮކްޓޫބަރު މަހުގެ ހަތް ވަނަ ދުވަހު އިސްރާއީލުގެ ފައުޖުތަކުން ޣައްޒާގައި ހަނގުރާމަ ފެށިފަހުން އިސްރާއީލުން އަންނަނީ ހުޅަނގު އައްސޭރީގައި ދިރިއުޅޭ ފަލަސްތީނު ރައްޔިތުންނަށް ވެސް އެކި ވަރުގެ އަނިޔާތައް ދެމުންނެވެ. ހަނގުރާމަ ފެށިފަހުން މިހާތަނަށް ހުޅަނގު އައްސޭރިން 5،850 ފަލަސްތީނު މީހުން ވަނީ ހައްޔަރުކޮށްފައެވެ.