15 Jan 2024, 09:53
އިސްރާއީލުގެ ފައުޖުތަކުން ޣައްޒާގެ އާންމުންނަށް އަމާޒުކޮށް ހިންގަމުންދާ ގަތުލުއާންމަށް 100 ދުވަސް ފުރިފައިވާއިރު، އިސްރާއީލުންދޭ ހަމަލާތައް އަދިވެސް އަންނަނީ ވަރުގަދަ ކުރަމުންނެވެ.
އިސްރާއީލުގެ ހަމަލާތަކުގެ ސަބަބުން ޣައްޒާއިން މުވާސަލީ ޚިދުމަތް ކެނޑިފައިވާތާ، ވިދިވިދިގެން ތިން ދުވަސް ވެއްޖެއެވެ. އެއާއެކު ހަމަލާތަކުގައި ޒަޚަމުވެފައި ތިބި މީހުން ހޮސްޕިޓަލްތަކަށް ގެންދިއުމަށް ވަނީ ދަތިވެފައެވެ.
ހަމަލާތައް އެންމެ ފަހުން ދީފައިވަނީ އާދީއްތަ ދުވަހު ޣައްޒާގެ ދެކުނަށާއި މެދުތެރޭގައި ހުންނަ އަލް މަޣާޒީއާއި އަލް ބުރެއިޖްގައި ހުންނަ ރެފިއުޖީ ކޭމްޕްތަކަށެވެ.
އޮކްޓޫބަރު މަހުގެ ހަތްވަނަ ދުވަހު ޣައްޒާގެ މުސްލިމުންނާ ދެކޮޅަށް އިސްރާއީލުން ފެށި ހަނގުރާމައިގައި މިހާތަނަށް 24,000 މީހުން ވަނީ ޝަހީދުކޮށްލައިފައެވެ. އޭގެ ތެރޭގައި 9,000 އަށްވުރެ ގިނަ އަދަދަކަށް މައުސޫމު ކުޑަކުދިން ހިމެނެއެވެ. ހަމަލާތަކުގައި ޒަޚަމުކޮށްލާފައިވާ މީހުންގެ އަދަދު ވަނީ 60,000 އަށްވުރެ އިތުރުވެފައެވެ.
އިސްރާއީލުން ޣައްޒާގައި ދެމުންގެންދާ ހަމަލާތައް ހުއްޓައިލުމަށް ބައިނަލްއަގުވާމީ މުޖުތަމައުން ގޮވާލި ނަމަވެސް، ހަނގުރާމަ ހުއްޓައިނުލާނެ ކަމަށް އިސްރާއީލުން އަންނަނީ ފާޅުގައި ބުނަމުންނެވެ. އަދި، ޣައްޒާގެ ވެރިކަންކުރާ ހަމާސް ޖަމާއަތް ނައްތައިނުލެވެނީސް ހަނގުރާމަ ނުހުއްޓާނެ ކަމަށް އިސްރާއީލުން ބުނެއެވެ.
މުސްލިމުންނާ ދެކޮޅަށް އިސްރާއިލުން ހިންގާ ލާއިންސާނީ އަމަލުތައް ހުއްޓުވުމަށް އަމަލީ ގޮތުން މަސައްކަތްކުރާ ހަތިޔާރުއެޅި ޖަމާއަތްތަކުގެ ތެރޭގައި ލުބުނާނުގައި ހަރަކާތްތެރިވާ، ހިޒްބުﷲ އާއި ޔަމަނުގައި ހަރަކާތްތެރިވާ ޙޫޘީ ޖަމާއަތް ހިމެނެއެވެ.
ލުބުނާނުން އަންނަނީ މެދުކެނޑުމެއްނެތި އިސްރާއީލުގެ ރަށްތަކަށް ހަމަލާ ދެމުންނެވެ. ޙިޒްބުاللهގެ އިތުރުން ޔަމަނުގެ ޙޫޘީ ޖަމާޢަތުން ވެސް ވަނީ ޔަހޫދީންގެ ރަށްތަކަށް ޙަމަލާ ދީފައެވެ. އަދި، ރަތް ކަނޑުން ޔަހޫދީންގެ ރަށްތަކަށް ދަތުރުކުރާ ޔަހޫދީންނާ ގުޅުން އޮންނަ އާގުބޯޓުފަހަރަށް ވެސް އެ ޖަމާއަތުން ވަނީ ހަމަލާ ދީފައެވެ.