15 Jan 2024, 00:57
ރާއްޖެ އާއި ޗައިނާގެ ގުޅުމަކީ އެހެން ގައުމުތަކުން ނަމޫނާއެއްގެ ގޮތުގައި ބަލަން ޖެހޭ ފަދަ ހަރުދަނާ ގުޅުމެއް ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.
ރައީސް، ޗައިނާގެ ސީޖީޓީއެން ޓީވީއަށް ދެއްވި އިންޓަވިއުއްގައި ވިދާޅުވީ ޗައިނާއަށް މިއަހަރު ވަޑައިގެންނެވި ބޭރުގެ ފުރަތަމަ ލީޑަރަކީ އެ މަނިކުފާނު ކަމަށާއި އެއީ އެ މަނިކުފާނަށް ލިބިވަޑައިގަތް ވަރަށް ބޮޑު އުފަލަކާއި ޝަރަފެއް ކަމަށެވެ.
ރައީސްގެ ފުރަތަމަ ރަސްމީ ދަތުރުފުޅުގައި މިދިޔަ ހަފުތާގައި ޗައިނާއަށް ވަޑައިގަތީ އެގައުމުގެ ރައީސް ޝީ ޖިންޕިންގެ ދައުވަތަކަށެވެ. އެ ދަތުރުފުޅުގައި ދެ ގައުމުގެ މެދުގައި 20 އެއްބަސްވުމެއްގައި ސޮއިކޮށްފައިވާއިރު އޭގެ ތެރޭގައި ދެ ގައުމުގެ ގުޅުން ސްޓްރެޓީޖިކް ޕާޓްނާޝިޕަކަށް ހެދުމުގެ އެކްޝަން ޕްލޭނެއް ވެސް ހިމެނެއެވެ.
އެ އެއްބަސްވުމާއެކު، ދެ ގައުމުން ގުޅިގެން މަސައްކަތްކުރާ ދާއިރާތަކާއި ދެ ގައުމުގެ މީހުންގެ މެދުގައި އޮތް ގުޅުން އިތުރުވެ، އޭގެ ފައިދާ ރާއްޖެ އާއި ޗައިނާއަށް ވެސް ލިބޭނެ ކަމަށް ރައީސް އިންޓަވިއުގައި ވިދާޅުވިއެވެ.
"އެއީ މި ދެ ގައުމުން ވެސް ގެންގުޅެނީ އެއް ގައުމުން އަނެއް ގައުމަށް އިހުތިރާމު ކުރުމުގެ އުސޫލު، ސައިޒުން ތަފާތު ވިޔަސް އެއް ގައުމުން އަނެއް ގައުމުގެ އިސްތިގުލާލަށް ކަމޭހިތުމުގެ އުސޫލު، ދާޚިލީ ކަންކަމަށް ނުފޫޒު ނުފޯރުވުމުގެ އުސޫލު،" ދެ ގައުމުގެ ގުޅުން ނަމޫނާއަކަށްވާ ސަބަބު ކިޔައިދެއްވަމުން ރައީސް ވިދާޅުވިއެވެ.
ރާއްޖެ އާއި ޗައިނާގެ ގުޅުމުގެ ބިންގާ އަޅާފައި ވަނީ އެފަދަ ހަރުދަނާ އުސޫލުތަކުގެ މަތީގައި ކަމަށް ވިދާޅުވެ ރައީސް، މުސްތަގުބަލުގައި ވެސް ދެ ގައުމުގެ ގުޅުން އިތުރަށް ވަރުގަދަ ވާނެ ކަމުގެ ޔަގީންކަން ދެއްވިއެވެ.
ރައީސް ޑރ. މުޙައްމަަދު މުއިއްޒު ޗައިނާގައި، އެގައުމުގެ ރައީސް ޝި ޖިންޕިންއާ ބައްދަލުކުރެއްވުން: ރާއްޖެއާއި ޗައިނާގެ ގުޅުމަކީ އެހެން ގައުމުތަކަށް ނަމޫނާއެއްގެ ގޮތުގައި ރައީސް މުއިއްޒު ވަނީ ސިފަކުރައްވާފައި -- ފޮޓޯ/ ޒިންހުއާ
އެ ދަތުރުފުޅުގައި ރައީސް ޝީއާ ބައްދަލުކުރެއްވިކަން ފާހަގަކުރައްވައި އެ މަނިކުފާނު ވިދާޅުވީ ޝީއަކީ ޗައިނާގެ ރައްޔިތުން ދެކެ ލޯބިވާ، ރައްޔިތުން އިސްކުރައްވާ ބޭފުޅެއް ކަމަށެވެ. ޝީގެ ވެރިކަމުގައި ޗައިނާގެ އިގުތިސާދު ވަރަށް ބޮޑަށް ކުރިއަރާފައިވާކަން ފާހަގަކުރައްވައި ރައީސް ވިދާޅުވީ، ރާއްޖޭގެ ތަރައްގީއާއި ކުރިއެރުމަށް ވެސް އެމަނިކުފާނު ވަރަށް ބޮޑަށް ތާއިދު ކުރައްވާ ކަމަށެވެ.
"އެންމެ މުހިންމު ކަމަކީ ރައީސް ޝީ ޖިންޕިން ބަހައްޓަވާ ގާތްކަމާއި، އެކުވެރިކަމާއި ދެއްވާ އެއްބާރުލުން،" ރައީސް ވިދާޅުވިއެވެ.
މީގެ އިތުރުން، ޗައިނާއާއި ރާއްޖެއާ ދެމެދު ސީދާ ދަތުރުތައް އިތުރު ކުރަން މަސައްކަތް ކުރައްވާކަން ފާހަގަކުރައްވައި ރައީސް ވިދާޅުވީ މިހާރު ވެސް ޗައިނާއިން އަންނަ ފަތުރުވެރިންގެ އަދަދު ވަރަށް ބޮޑަށް އިތުރުވަމުން އަންނަ ކަމަށެވެ. އަދި އުންމީދަކީ، ކޮވިޑް-19އިގެ ކުރިން ރާއްޖެއަށް ފަތުރުވެރިން އަންނަ މިންވަރަށް މި އަހަރު އެ އަދަދު އެރުން ކަމަށް ރައީސް ވިދާޅުވިއެވެ.
އެ މަނިކުފާނު ޗައިނާއަށް ކުރެއްވި ދަތުރުފުޅު ނިންމަވާލެއްވުމަށް ފަހު ރާއްޖެ ވަޑައިގަތީ އިއްޔެއެވެ.
އާންމުކޮށް ދިވެހި ރައީސުން ރަސްމީ ފުރަތަމަ ދަތުރުފުޅުގައި ވަޑައިގަންނަވަނީ އިންޑިއާއަށް ނަމަވެސް އެ ސަގާފަތް ބަދަލުކޮށްލެއްވި ރައީސް މުއިއްޒު ރާއްޖެ ވަޑައިގަތުމަށް ފަހު ދެއްވި ބަޔާނުގައި، އިންޑިއާއަށް ނުސީދާ ގޮތެއްގައި ބަހުގެ ހަމަލާތަކެއް ރައްދުކުރެއްވިއެވެ. އެގޮތުން އިންޑިއާ ކަނޑަކީ ވަކި ގައުމެއްގެ މިލްކެއް ނޫން ކަމަށާއި ރާއްޖެއަކީ ކުޑަ ގައުމަކަށް ވިޔަސް ބޭރުގެ ބޮޑެތި ގައުމަތަކަށް ނުރަނގަޅު ނުފޫޒު ނުފޯރުވޭނެ ކަމަށް އެ މަނިކުފާނު އިއްޔެ ވިދާޅުވިއެވެ.
މި ސަރުކާރުން ޗައިނާއާ އެކު ގާތްގުޅުމެއް ބާއްވާއިރު، ރައީސް މުއިއްޒަކީ 'ޕްރޯ ޗައިނާ' ބޭފުޅެއް ކަމަށް ބޭރުގެ މީޑިއާތަކުން ސިފަކުރެއެވެ. އެކަމަކު، ރައީސް ވަނީ އެ މަނިކުފާނަކީ 'ޕްރޯ މޯލްޑިވްސް' ބޭފުޅެއް ކަމަށް ވިދާޅުވެ، އެ ވާހަކަތަކަށް ރައްދުދެއްވައިފައެވެ.