15 Jan 2024, 06:47
މިދިޔަ އަހަރު ރިލީޒްވި ނެޓްފްލިކްސް ފިލްމު "ދަ އާޗީސް"އިން ފިލްމީ ދުނިޔެއަށް ނުކުތް ޒުވާން ތަރި އަގަސްތިޔާއަށް އާއްމުންގެ ފަރާތުން ކުރިމަތިވި ފާޑުކިޔުންތަކާ ކުރިމަތިލާނެ ގޮތް ނޭނގުނު ކަމަށް ބުނެފިއެވެ.
އުއްމީދު ކުރި ވަރަށް ފިލްމު "ދަ އާޗީސް"އަށް ބެލުންތެރިންގެ ތަރުހީބު ނުލިބޭކަން ގަބޫލުކުރާ ކަމަށާއި ނަމަވެސް އަގަސްތިޔާގެ އަޒުމަކީ ބުރަކޮށް މަސައްކަތްކޮށް ފެންވަރު ރަގަޅު ފިލްމުތައް ބެލުންތެރިންނަށް ގެނެސްދިނުން ކަމަށް ވަނީ ބުނެފައެވެ.
ކާމިޔާބު ފިލްމުތައް ޑައިރެކްޓް ކޮށްފައިވާ ޒޯޔާ އަޚްތަރު ނެޓްފްލިކްސްއަށް އުފެއްދި "ދަ އާޗީސް"އިން އަގަސްތިޔާއާ އެކު ބޮލީވުޑްގެ ފިލްމީ އާއިލާއަށް ނިސްބަތްވާ ޚުޝީ ކަޕޫރު އަދި ސުހާނާ ޚާން ވެސް ވަނީ އިންޑަސްޓްރީއަށް ތަޢާރަފުވެފައެވެ. މިދިޔަ ޑިސެމްބަރު މަހުގެ ހަތްވަނަ ދުވަހު ނެޓްފްލިކްސްގައި ރިލީޒްކުރި މި ފިލްމަކީ މަޝްހޫރު އިނގިރޭސި ކޮމިކް "ދަ އާޗީސް" އަސްލަކަށް ބަލައިގެން އުފެއްދި ފިލްމެކެވެ. ފިލްމަށް ބެލުންތެރިންގެ ފަރާތުން މަސްހުނި ޚިޔާލުތަކެއް ލިބުނުއިރު ފާޑުކިޔުންތަކާ ކުރިމަތިލާން އަގަސްތިޔާ ހުރީ ތައްޔާރަށް ނޫންކަމަށް ދަ ފިލްމު ކޮމްޕޭނިއަން މެގަޒިންއަށް ދިން އިންޓަވިއުއެއްގައި އަގަސްތިޔާ ވަނީ ބުނެފައެވެ.
އަގަސްތިޔާ ކާފަ އަމީތާބް ބައްޗަން އަދި ބޮޑު ބޭބެ އަބިޝެކް ބައްޗަންއާ އެކު-- ފޮޓޯ/އިންޓަނެޓް
ބައެއް މީހުންނަށް ފިލްމު ކަމުދިޔައިރު އަނެއް ބަޔަކަށް އެއްގޮތަކަށް ވެސް ފިލްމު ކަމުނުދާ ކަމަށާއި އެކަން ގަބޫލުކުރާ ކަމަށް އަގަސްތިޔާ ވަނީ ބުނެފައެވެ.
ފިލްމު "ދަ އާޗީސް"އަށް އަގަސްތިޔާގެ ފުރިހަމަ އެއްބާރުލުން ދެވުނު ކަމަށާއި ފިލްމުގެ މަސައްކަތް ނިމުނުއިރު ވަރަށް ގާތް ފަސް އެކުވެރިން ދިރިއުޅުމަށް ލިބިއްޖެކަމަށް ޒުވާން އެކްޓަރު ވަނީ ބުނެފައެވެ. ކެރިއަރުގެ ފުރަތަމަ ފިލްމު ރިލީޒްވިތާ މާގިނަ ދުވަހެއް ނުވެ އަގަސްތިޔާ ވަނީ ޑައިރެކްޓަރު ސްރީރާމް ރާގަވަން "އެއްކީސް"ގެ ނަމުގައި އުފައްދާ ފިލްމަކަށް ސޮއިކޮށްފައެވެ. މި ފިލްމުގައި އަގަސްތިޔާއާ އެކު ކުރީގެ އެކްޓަރު ދަރުމެންދްރަ ވަރަށް މުހިއްމު ރޯލަކުން ފެންނާނެއެވެ.
އަމީތާބް ބައްޗަންގެ ކާފަ ދަރިފުޅު އަގަސްތިޔާ "ދަ އާޗީސް"ގައި ދެއްކި ހުނަރާއެކު ޒުވާނާގެ ފިލްމީ ކެރިއަރު ފެންނަނީ ވަރަށް އުޖާލާކޮށް ކަމަށް ވެސް ގިނަ ބަޔަކު ވަނީ ބުނެފައެވެ.