14 Jan 2024, 23:16
ރާއްޖޭގައި ތިބި އިންޑިއާ ސިފައިން އަނބުރާ ގެންދިޔަ ނަމަވެސް، ދިވެހިންނަށް ޚިދުމަތްތައް ފޯރުކޮށްދޭ އިންޑިއާގެ ވައިގެ އުޅަނދުތަކުގެ އޮޕަރޭޝަންތައް ނުހުއްޓޭނެ ގޮތެއް ހޯދުމާ ގުޅޭ ގޮތުން މިއަދު ރާއްޖެއާ މަޝްވަރާ ކުރި ކަމަށް އިންޑިއާގެ އެކްސްޓާނަލް އެފެއާސް މިނިސްޓްރީން ބުނެފިއެވެ.
އިންޑިއާ ސިފައިން ރާއްޖެއިން ފޮނުވާލުމާ ގުޅޭ ގޮތުން އުފައްދާފައިވާ މަތީ ފަންތީގެ ކޯ ގްރޫޕުގެ ފުރަތަމަ ބައްދަލުވުން މިއަދު ފޮރިން މިނިސްޓްރީގައި ވަނީ ބާއްވައިފައެވެ. އެ ބައްދަލުވުމުގެ ބައިވެރިންގެ ތެރޭގައި ރާއްޖޭގައި ހުންނަވާ އިންޑިއާގެ ސަފީރު މުނޫ މަހާވަރު ހިމެނިވަޑައިގެންނެވިއެވެ.
ރާއްޖޭގެ ފޮރިން މިނިސްޓްރީން ބުނި ގޮތުގައި، އެ ބައްދަލުވުމުގައި އިންޑިއާއިން ވަނީ ސިފައިން ގެންދިޔުމުގެ މަސައްކަތް އަވަސް ކުރުމަށް އެއްބަސްވެފައެވެ.
އެ ބައްދަލުވުމުގެ އިތުރު ތަފުސީލާއެކު އިންޑިއާގެ އެކްސްޓާނަލް އެފެއާސް މިނިސްޓްރީން ނެރުނު ބަޔާނެއްގައި ވަނީ، ދެ ގައުމުން މަޝްވަރާ ކުރި ކަންތައްތަކުގެ ތެރޭގައި، ދިވެހިންނަށް އިންސާނީ އަދި ސިއްހީ ހިދުމަތް ފޯރުކޮށްދޭ އިންޑިއާގެ ވައިގެ އުޅަނދުތަކުގެ އޮޕަރޭޝަން ދެމެހެއްޓެނިވި ގޮތެއްގައި ކުރިއަށް ގެންދިއުމަށް ވާހަކަ ދެއްކި ކަމަށް ބުނެފައެވެ.
އިންޑިއާގެ ދެ ހެލިކަޕްޓަރާއި ޑޯނިއާ އެއާކްރާފްޓެއް ރާއްޖޭގައި އޮޕަރޭޓު ކުރެއެވެ.
އިންޑިއާގެ ސިފައިން ބޭލުމާ ގުޅުން ހުރި މަތީ ފަންތީގެ ގުރޫޕެއް އެކުލަވައިލީ ދުބާއީގައި އޮތް ކޮޕް28 ސަމިޓުގެ ހަވާސާގައި ރައީސް ޑރ. މުހައްމަދު މުއިއްޒާއި އިންޑިއާގެ ބޮޑުވަޒީރު ނަރެންދުރަ މޯދީ ބައްދަލުކުރެއްވުމަށް ފަހުގައެވެ.
މީގެ ކުރިން އިންޑިއާގެ ސަރުކާރުގެ އޮފިޝަލުން ވަނީ އެ ގުރޫޕު އުފެއްދުމުގެ މަގުސަދަކީ، ހެލިކަޕްޓަރާއީ ޑޯނިއާ އެއާކްރާފްޓްގެ އޮޕަރޭޝަންތައް ކުރިއަށްގެންދިޔުމާ ގުޅުން ހުރި ކަންކަން ނިންމުން ކަމަށް، ދެ ގައުމުން އެއްބަސްވެފައިވާ ކަމަށް ބުނެފައެވެ.
ރާއްޖޭގައި އިންޑިއާގެ 88 ސިފައިން ގާއިމުވެ ތިބޭ ކަމަށް ސަރުކާރުން ވަނީ ބުނެފައެވެ. އެ ސިފައިން އަނބުރާ ފޮނުވައިލުމަކީ ރައީސް މުއިއްޒުގެ ރިޔާސީ ވައުދެކެވެ. އެ މީހުން އަނބުރާ ގެންދަން ރާއްޖެއިން ވަނީ ރަސްމީކޮށް އިންޑިއާ ސަރުކާރުގައި ވެސް އެދިފައެވެ.
މީގެ އިތުރުން މިއަދު ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް ވަނީ، މާޗު 15ގެ ކުރިން އިންޑިއާ ސިފައިން ބާލަން ރައީސް އެގައުމުގައި އެދިވަޑައިގެންފައިވާ ކަމަށް ވިދާޅުވެފައެވެ.
ފާހަގަކޮށްލެވޭ ގޮތުގައި މިދިޔަ ހަފުތާގައި ރައީސް މުއިއްޒު ޗައިނާއަށް ކުރެއްވި ފުރަމާނަ ދަތުރުފުޅަށް ފަހު، އެނބުރި މާލެ ވަޑައިގެން އިއްޔެ ވަނީ އިންޑިއާއަށް ނުސީދާ ގޮތެއްގައި ބަހުގެ ހަމަލާތަކެއް ރައްދުކުރައްވައިފައެވެ. އެގޮތުން ރާއްޖެ ކުޑަވުމަކީ ބޭރުގެ ބޮޑެތި ގައުމުތަކުން ބުލީކުރަން ލިބޭ ލައިސަންސެއް ނޫން ކަމަށް އެ މަނިކުފާނު ވިދާޅުވިއެވެ.