15 Jan 2024, 11:04
އެޕަލްގެ އެއާޑްރޮޕް ފައިލް ޝެއާކުރުމުގެ ހިދުމަތުގައި ހުރި ކުށެއްގެ ނާޖާއިޒު ފައިދާ ޗައިނާގެ ހެކަރުން ނަގައި، ޔޫޒަރުން ޓްރެކް ކުރަމުންދާކަން ހާމަވުމާ ގުޅިގެން އެޕަލްއަށް ފާޑުކިޔުން އަމާޒުވެއްޖެއެވެ.
ޖަރުމަނުގެ ޓެކްނިކަލް ޔުނިވާސިޓީ އޮފް ޑާމްސްޓެޑްގެ ސައިންސްވެރިން އަންނަނީ 2019ވަނަ އަހަރުން ފެށިގެން އެޕަލްގެ އެއާޑްރޮޕްގައި ހުރި ގޯސްތަކުގެ ސަބަބުން ކަސްޓަމަރުންގެ ޕްރައިވެސީއަށް ބުރޫ އަރައިފައިވާ ކަމުގެ އިންޒާރު އެޕަލް އަށް ދެމުންނެވެ. ނަމަވެސް އެޕަލް އިން ބުނީ އެ މައްސަލަތަކަށް ހައްލެއް ހޯދައިދީފައި ވާނެކަމަށެވެ.
އެޕަލް އެއާޑްރޮޕްގައި ހުރި މި ކުށުވެރިކަމުގެ ސަބަބުން "ކޮންޓެކްޓްސް އޮންލީ" މޯޑަށް އެއާޑްރޮޕް ސެޓް ކޮށްފައިވާ ކޮންމެ މީހެއްގެ ފޯނު ނަމްބަރާއި އީމެއިލް ހިމެނޭ ގޮތަށް ކޮންޓެކްޓްސް ޑޭޓާ ވަޔަލެސް ރޭންޖުގެ ތެރޭގައި ހަރަކާތްތެރިވާ ފަރާތްތަކަށް އެކްސެސް ކުރެވޭނެ ކަމަށް މައްސަލަ ހޯދި ފަރާތްތަކުން ވަނީ ބުނެފައެވެ.
މި ކަމުގެ ނާޖާއިޒު ފައިދާ، ޗައިނާގެ ޓެކް ފާމެއް ކަމަށްވާ ވަންގް ޝެން ޑޮންގް ޖިއާން ޓެކްނޮލޮޖީއިން ނަގައި އެއާޑްރޮޕް ކަނެކްޝަން ޑޭޓާ ޑިކްރިޕްޓްކޮށް، ޔޫޒަރުންގެ ޒާތީ އަމިއްލަ މައުލޫމާތު ވަގަށް ނަގާފައިވާ ކަމަށް ޖަރުމަނުގެ ޓެކްނިކަލް ޓީމުން ވަނީ ބުނެފައެވެ.
އަދި އޭގެ އިތުރުން ޗައިނާގެ ފުލުހުން ވެސް މި ސިސްޓަމް ބޭނުންކޮށްގެން ބެއިޖިން ސަބްވޭގެ ފަސިންޖަރުންނާ ދެކޮޅަށް ފިޔަވަޅު އެޅުމަށް މަސައްކަތް ކުރިމަކަށް ވެސް އެ ޓީމުންވަނީ ތުހުމަތުކޮށްފައެވެ. ޗައިނާގެ ހެކަރުން މި އަމަލު ހިންގާ ގޮތުގެ ޓެކްނިކަލް ސްޕެސިފިކޭޝަންތައް މީގެ އަހަރުތަކެއް ކުރިން ޖަރުމަނުގެ ސައިންސްވެރިން ބަޔާންކޮށްފައިވާ އިރު، އެޕަލް އަށް ތަންފީޒު ކުރެވެން ހުރި ފިކްސްތައް ވެސް އެ މީހުންވަނީ ހުށަހަޅައިފައެވެ.
މި ޚަބަރާ ގުޅިގެން އެޕަލް ޔޫޒަރުން ދަނީ އެޕަލްއިން މި ކަމުގެ ޒިންމާ ނަގަން ގޮވައިލަމުންނެވެ. އެގޮތުން އެމެރިކާގެ ސެނެޓަރު މާކޯ ރޫބިއޯ ވަނީ އެޕަލްގެ ސެކިއުރިޓީ ނެގްލިޖެންސްގެ ސަބަބުން ޗައިނާގެ ކަމާބެހޭ ފަރާތްތަކަށް ޔޫޒަރުންގެ މައުލޫމާތުތައް ވަގަށް ނެގޭނެތީ އެޕަލްއަށް ވަރަށް ބޮޑަށް ފާޑު ވިދާޅުވެފައެވެ.
ޑިޖިޓަލް ހައްގުތަކަށް ވަކާލާތު ކުރާ ބެންޖަމިން އިސްމާއިލް ވިދާޅުވީ އެޕަލްއިން ދެފުށް ފެންނަ ގޮތަށް އަމަލުކުރާނެ ގޮތްތަކަށް ހައްލު ހޯދަން ޖެހޭ ކަމަށެވެ.
މިމައްސަލައާއި ގުޅިގެން ޕްރެޝަރު ބޮޑުވި ނަމަވެސް މިހާތަނަށް އެޕަލް އިން އޮތީ ހިމޭންކޮށެވެ. ފާޑުކިޔައި ފަރާތްތަކުން ބުނީ، އެއާޑްރޮޕްގެ ޕްރައިވެސީ ސޭފްގާޑްސްއާ ގުޅޭ ގޮތުން ތަޖުރިބާކާރުންގެ އިންޒާރުތަކަށް އެތައް އަހަރެއް ވީއިރު އިހުމާލުވެފައިވާއިރު، އެ ކުންފުނި ނާކާމިޔާބުވެފައިވާ ކަމަށެވެ.