14 Jan 2024, 20:20
ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި އެމްޑީޕީން ވާދަކުރާނެ ކެންޑިޑޭޓުން ހޮވުމަށް ބާއްވާ ޕްރައިމަރީ އަންނަ މަހުގެ ތިނެއްގައި ބާއްވާނެކަން އެ ޕާޓީން މިއަދު އިއުލާންކޮށްފިއެވެ.
އެމްޑީޕީން މިއަދު ވަނީ އެ ޕާޓީން ޕްރައިމަރީ ބާއްވަންޖެހޭ ދާއިރާތަކާއި، އެދާއިރާތަކަށް ކުރިމަތިލި ކެންޑިޑޭޓުންގެ ނަންތައް އާންމުކޮށްފައެވެ.
އެމްޑީޕީގެ ޕްރައިމަރީގައި ކުރިމަތިލުމަށް ހުޅުވާލީ މިދިޔަ މަހުގެ 16ގައެވެ.
މިދިޔަ މަހުގެ 25އާ ހަމައަށް ހުޅުވާލި އެ ފުރުސަތުގައި ކުރިމަތިލި މީހުންގެ ތެރެއިން 36 މީހަކު ވަނީ ޕްރައިމަރީގައި ވާދަކުރަން ނުޖެހި ޓިކެޓް ކަށަވަރުކޮށްފައެވެ. އެއީ އެ ދާއިރާތަކަށް އިތުރު މީހަކު ކުރިމަތިނުލާތީއެވެ.
މީގެ ކުރިން އެމްޑީޕީން ބުނެފައި އޮތީ ޕްރައިމަރީ ބާއްވާނީ މި މަސް ތެރޭގައި ކަމަށެވެ.
މަޖިލިސް އިންތިޚާބު ބާއްވަން ހަމަޖެހިފައި ވަނީ އަންނަ މާޗު މަހުގެ 17ގައެވެ.
މިހާރު ކުރިއަށްދާ މަޖިލީހަކީ އެމްޑީޕީގެ ތާރީޚުގައި ވެސް އެ ޕާޓީއަށް އެންމެ ބޮޑު އަގުލަބިއްޔަތެއް ލިބުނު މަޖިލީހެވެ. އެންމެ ފަހުން ބޭއްވި ރިޔާސީ އިންތިޚާބު އެމްޑީޕީއަށް ނާކާމިޔާބު ވެފައިވާއިރު ސިޔާސީ ގޮތުން ބާރުވެރިވުމަށް މަޖިލީހުގެ ގިނަ ގޮނޑިތަކެއް އެ ޕާޓީން ހޯދަން ޖެހެއެވެ.