14 Jan 2024, 18:53
ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ފުރަތަމަ ޖަލްސާ އަންނަ މަހުގެ ފަހެއްގައި ބާއްވަން ނިންމައިފިއެވެ.
މަޖިލީހުން މީޑިއާތަކާ ހިއްސާކުރި މައުލޫމާތުގައިވާ ގޮތުން، އަންނަ މަހު ޖަލްސާތައް ފަށަން މަޖިލީހުގެ ރައީސް އަދި ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ވަނީ ނިންމަވައިފައެވެ. އެ ޖަލްސާ އޮންނާނީ އެ ދުވަހުގެ ހެނދުނު ނުވައެއްގައި ކަމަށް ވެސް މަޖިލީހުން ބުނެފައިވެއެވެ.
މަޖިލީހުގެ ދައުރު ފަށާ ޖަލްސާގައި، މިދިޔަ ނޮވެމްބަރު މަހުގެ 17ގައި ވެރިކަމުގެ ހުވާކުރެއްވި ރައީސް ޑރ. މުޙައްމަދު މުއިއްޒު އެ މަނިކުފާނުގެ ފުރަތަމަ ރިޔާސީ ބަޔާން އިއްވަވާނެއެވެ.
މި ސަރުކާރަށް ދެ މަސް ވާން ގާތްވެފައިވާ އިރު، ރައީސް މިނިސްޓްރީތަކަށް ހޮއްވަވާފައިވާ ބޭފުޅުންނަށް މަޖިލީހުން ރުހުން ދީފައިނުވެއެވެ.
އެ މިނިސްޓަރުންނަށް ރުހުން ދޭން ސަރުކާރުގެ މަސްއޫލިއްޔަތު އަދާކުރާ މިންވަރު ބަލައި ކޮމިޓީން ނިންމީ، މަޖިލީސް ޗުއްޓީއަށް ގޮސްފައި އޮއްވައި މިދިޔަ މަހު 30ގައެވެ.
އެއަށް ފަހު މަޖިލީހުން ވަޒީރުންނަށް ރުހުން ދޭން ދައުރުން ބޭރު ޖަލްސާއެއް ބާއްވަން، މަޖިލީހުގެ އަޣުލަބިއްޔަތު އޮތް އެމްޑީޕީން ސޮއި ހަމަ ކުރަން ފެށި ނަމަވެސް އެ ޖަލްސާ ބޭއްވޭނެ ތާރީޚެއް މިހާތަނަށް އިއުލާންކޮށްފައިނުވެއެވެ.