14 Jan 2024, 16:42
އެންބީއޭ ބާސްކެޓް ބޯޅަ މުބާރާތުގައި މިލްވައުކީ ބަކްސްއިން ގޯލްޑަން ސްޓޭޓް ވޮރިއާސްގެ މައްޗަށް ކުރި ހޯދައިފިއެވެ.
މިލްވައުކީގެ ފިސާވް ފޯރަމްގައި ކުޅުނު މި މެޗު ބަކްސް ކާމިޔާބު ކޮށްފައިވަނީ 129 ޕޮއިންޓު 118 ޕޮއިންޓުންނެވެ.
މެޗުގައި ބަކްސްގެ ޖިއާނިސް އެންޓެޓޮކޮއުމްޕޯ ވަނީ 33 ޕޮއިންޓު ހޯދައިދީ ނުވަ ރީބައުންޑު ނަގައިދީ ފަސް އެސިސްޓް ކޮށްފައެވެ. މެޗުގައި ވޮރިއާސްއަށް އެންމެ ރަނގަޅު ކުޅުމެއް ދެއްކީ 23 ޕޮއިންޓު ހޯދައިދީ 10 ރީބައުންޑު ނަގައިދީ ތިން އެސިސްޓް ދިން ބްރެންޑިން ޕޮޑްޒިއެމްސްކީއެވެ.
މުބާރާތުގައި ބޮސްޓަން ސެލްޓިކްސްއާއި ހިއުސްޓަން ރޮކެޓްސް ބައްދަލުކުރި މެޗު 145 ޕޮއިންޓު 113 ޕޮއިންޓުން ކާމިޔާބު ކޮށްފައިވަނީ ސެލްޓިކްސްއެވެ. މެޗުގައި ސެލްޓިކްސްގެ ޖޭލެން ބްރައުން ވަނީ 32 ޕޮއިންޓު ހޯދައިދީ ހަ ރީބައުންޑު ނަގައިދީ ދެ އެސިސްޓް ކޮށްފައެވެ. އަދި، ރޮކެޓްސްއަށް އެންމެ ރަނގަޅު ކުޅުމެއް ދެއްކީ 19 ޕޮއިންޓު ހޯދައިދީ 10 ރީބައުންޑު ނަގައިދީ ތިން އެސިސްޓް ދިން އަލްޕެރެން ސެންގުންއެވެ.
މީގެ އިތުރުން، އޮކްލޮހޯމާ ސިޓީ ތަންޑާއާއި އޯލާންޑޯ މެޖިކް ބައްދަލުކުރި މެޗު 112 ޕޮއިންޓު 100 ޕޮއިންޓުން ކާމިޔާބު ކޮށްފައިވަނީ ތަންޑާއެވެ.
މެޗުގައި ތަންޑާއަށް އެންމެ ރަނގަޅު ކުޅުމެއް ދެއްކީ 37 ޕޮއިންޓު ހޯދައިދީ ހަ ރީބައުންޑު ނަގައިދީ ހަތް އެސިސްޓް ދިން ޝެއި ގިލްޖިއޯސް އެލެގްޒެންޑާއެވެ. އަދި، މެޖިކަށް އެންމެ ރަނގަޅު ކުޅުމެއް ދެއްކީ 20 ޕޮއިންޓު ހޯދައިދީ ނުވަ ރީބައުންޑު ނަގައިދީ އަށް އެސިސްޓް ދިން ޕައުލޯ ބަންޗޭރޯއެވެ.
މުބާރާތުގައި ކުޅުނު އެހެން މެޗުތަކަށް ބަލައިލާއިރު ވޮޝިންޓަން ވިޒަޑްސްއާއި އެޓްލާންޓާ ހޯކްސް ބައްދަލުކުރި މެޗު 127 ޕޮއިންޓު 99 ޕޮއިންޓުން ވިޒަޑްސް ކާމިޔާބުކުރިއިރު ނިއުޔޯކް ނިކްސްއާއި މެމްފިސް ގްރިޒްލީސް ބައްދަލުކުރި މެޗު 106 ޕޮއިންޓު 94 ޕޮއިންޓުން ކާމިޔާބު ކޮށްފައިވަނީ ނިކްސްއެވެ. ޝިކާގޯ ބުލްސްއާއި ސެން އެންޓޯނިއޯ ސްޕާސް ބައްދަލުކުރި މެޗު 122 ޕޮއިންޓު 116 ޕޮއިންޓުން ބުލްސް ކާމިޔާބު ކޮށްފައިވާއިރު ނިއުއޯލިއަންސް ޕެލިކަންސްއާއި ޑެލަސް މެވްރިކްސް ބައްދަލުކުރި މެޗު 118 ޕޮއިންޓު 108 ޕޮއިންޓުން ކާމިޔާބު ކޮށްފައިވަނީ ޕެލިކަންސްއެވެ.