14 Jan 2024, 14:39
އެމްޓީސީސީއަށް ބާރު ބޮޑުވާތީ، އިތުރު ކުންފުންޏެއް އުފައްދަން ވަޒީރުންގެ މަޖިލީހުން މިއަދު ނިންމައިފިއެވެ.
މިއަދު ބޭއްވި ވަޒީރުންގެ މަޖިލީހުގެ ބައްދަލުވުމުގެ ތަފުސީލުތައް ހާމަކުރަން ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް ވިދާޅުވީ، މިހާރު އެމްޓީސީސީގައި 100 އެތައް މަޝްރޫއެއް ފުނިޖެހިފައިވާ ކަމަށެވެ. އަދި، އެ ހުރިހާ މަޝްރޫއެއް ކުރިއަށް ގެންދިއުމުގެ ގާބިލުކަން އެ ކުންފުނީގައި ނެތް ކަމަށެވެ.
އެހެންވެ، އެ ކުންފުންޏަށް ބާރުކުޑަކޮށް، މަޝްރޫއުތައް އަވަހަށް ނިންމަން އެފަދަ އިތުރު ކުންފުންޏެއް އުފައްދަން ވަޒީރުންގެ މަޖިލީހުން މިއަދު ނިންމާފައިވާ ކަމަށް ނާޒިމް ވިދާޅުވިއެވެ.
"އެމްޓީސީސީގައި އެބަހުއްޓޭ އެއް ކުންފުންޏަކަށް ނުކުރެވޭ ވަރަށް މަސައްކަތް،" ނާޒިމް ވިދާޅުވިއެވެ.
"އެމްޓީސީސީއަކީ މިހާރު ވެސް އެންމެ ރަނގަޅަށް ޑެލިވާކުރާ އެއް ކުންފުނި. އެކަމަކު، އެއް ކުންފުންޏަކަށް ނުކަތާ ވަރަށް ގިނަ މަސައްކަތް ހުރުމާ އެކު މިގޮތަށް ނިންމާފައިވަނީ،"
މީގެ އިތުރުން، ފައިދާނުވާ ކުންފުނިތަކާ މެދު ގޮތްތަކެއް ނިންމަން ވެސް ވަޒީރުންގެ މަޖިލީހުގައި ނިންމާފައިވާ ކަމަށް ސަރުކާރުން ބުންޏެވެ.
ނާޒިމް ވިދާޅުވީ ފިނޭންސް މިނިސްޓްރީން ކެބިނެޓަށް ހުށަހަޅާފައިވާ ކަރުދާހާ މެދު މަޝްވަރާ ކުރައްވައި، ގޮތްތަކެއް ނިންމާފައިވާ ކަމަށެވެ. އޭގެ ތެރޭގައި ހިމެނޭ އެއް ކަމަކީ، ކުންފުނިތައް ގިންތި ކުރެވޭ އުސޫލުތައް ތިން މަސް ތެރޭގައި މުރާޖައާކޮށް ނިންމުން ކަމަށެވެ. އަދި، ކުންފުނިތަކުން ގައުމީ އަދި ޕަބްލިކް ކުންފުނިތަކާއި ހިއްސާ ވިއްކައިގެން ހިންގާނެ ކުންފުނިތައް ދެނެގަތުން ހިމެނޭ ކަމަށް ވެސް އޭނާ ވިދާޅުވިއެވެ.
އެހެންވެ، ކުންފުނިތަކުގެ ޕާފޯމަންސް ރަނގަޅުކުރަން އަންނަ އަހަރުގެ ފުރަތަމަ ހަ މަސް ދުވަހާ ހަމައަށް މުހުލަތެއް ދޭން ވަނީ ނިންމައިފައެވެ. އަދި، އަލަށް ކުންފުންޏެއް އުފައްދާއިރު އަމަލުކުރަން ޖެހޭނެ ހަރުދަނާ އުސޫލެއް ވެސް ހަ މަސް ދުވަހުގެ ތެރޭގައި އެކުލަވާލައި ތަންފީޒުކުރަން ފަށަން ނިންމާފައިވާ ކަމަށް އޭނާ ވިދާޅުވިއެވެ.
"އެކަށީގެންވާ ގޮތަކަށް ނުހިނގާ ކުންފުނިތަކަށް ހަ މަސް ތެރޭގައި ރީސްޓްރަކްޗާ ކުރަން، ނުވަތަ މާޖުކުރަން ޖެހިއްޖިއްޔާ އެކަން ކުރަން ފަށާގޮތަށް،" ނާޒިމް ވިދާޅުވިއެވެ.
ދައުލަތުގެ ކުންފުނިތަކަށް ފައިދާވާ ގޮތަކަށް ހިންގުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އަދި، އެއީ ވެރިކަމުގެ ފުރަތަމަ 14 ހަފުތާގެ ތެރޭގައި ވެސް ކުރަން ނިންމާފައިވާ ކަމެކެވެ.