14 Jan 2024, 12:12
މީގެ ކުރިން އޮތް ބައި އިލެކްޝަންތަކުގައި ވޯޓުލާން ނިކުތް މީހުންގެ ނިސްބަތާ އަޅައިކިޔާނަމަ އިއްޔެ ވޯޓުލާން ނިކުތް މީހުންގެ އަދަދު ގޯސް ނޫންކަމަށް އިލެކްޝަންސް ކޮމިޝަނުން މިއަދު ބުނެފިއެވެ.
އިއްޔެ ވޯޓުލުން ކުރިއަށް ދިޔައީ، ހެނދުނު 08:00 އިން ހަވީރު 05:00 އަށެވެ.
އިލެކްޝަންސްގެ ހިސާބުތައް ދައްކާ ގޮތުން، މާލޭ މޭޔަރު ހޮވުމަށް އިއްޔެ އޮތް ބައި އިލެކްޝަންގައި ވޯޓުލާން ނިކުތީ ވޯޓުލުމުގެ ހައްގު ލިބިފައިވާ 54،680 މީހުންގެ ތެރެއިން 17،410 މީހުންނެވެ. އެއީ 31.84 ޕަސެންޓެވެ.
މި ހިސާބުތަކާ ގުޅޭގޮތުން އިލެކްޝަންސްގެ ނައިބު ރައީސް އިސްމާއީލް ހަބީބު "ސަން"އަށް ވިދާޅުވީ މި އަދަދަކީ އެހެން ބައި އިލެކްޝަންތަކަށް ބަލާއިރު އެހައި ގޯސް އަދަދެއް ނޫން ކަމަށެވެ. ސަބަބަކީ އެހެން އިންތިޚާބުތަކުގައި ވެސް އެ އަދަދު އުޅެނީ 40 ޕަސެންޓާ ހަމައިގައިކަމަށްވުން ކަމަށް އޭނާ ވިދާޅުވިއެވެ.
އޭނާ ވިދާޅުވީ މީގެ ކުރިން އައްޑޫގައި އޮތް ބައި އިލެކްޝަނެއްގައި 18 ޕަސެންޓް މީހުން ވެސް ވޯޓުލައިފައިވާ ކަމަށެވެ.
"އެހެންވީމާ މި ނިސްބަތް ވަރަށް، ވަރަށް ދަށެއް ނޫން،" އޭނާ ފާހަގަކުރެއްވިއެވެ.
އެހެން ނަމަވެސް ހަބީބު ވިދާޅުވީ ލޯކަލް ކައުންސިލް އިންތިޚާބުތަކުގައި ވޯޓުލާން ނިކުންނަ މީހުން މަދުވުމަކީ ވަރަށް ކަންބޮޑުވާން ޖެހޭ ކަމެއް ކަމަށެވެ.
ހަމައެއާއެކު ކައުންސިލްތަކުގެ މެމްބަރުކަމާއި، އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެމްބަރުކަމަށް ކުރިމަތިލުމަށް ޝައުގުވެރިވާ މީހުންގެ އަދަދު މަދުވާކަމަށް ވެސް ވިދާޅުވިއެވެ.
ހަބީބު ވިދާޅުވީ ވޯޓުލާ މީހުންގެ އަދަދު މަދުވާ ސަބަބާއި، ކައުންސިލް މަގާމުތަކަށް ކުރިމަތިލާ މީހުންގެ އަދަދު މަދުވާ ސަބަބު ދެނެގަތުމަކީ ލޯކަލް ގަވަމަންޓް އޮތޯރިޓީއާއި، އެކަމަށް ޚާއްސަ އިދާރާތަކުން ކުރުން މުހިންމު ކަމެއް ކަމަށެވެ.
އިއްޔެ އޮތް އިންތިޚާބު، ވޯޓުލީ މީހުންގެ ބޮޑު އަޣުލަބިއްޔަތަކުން ކާމިޔާބުކުރެއްވީ އެމްޓީސީސީގެ ސީއީއޯގެ މަގާމުގައި މިދިޔަ އެމްޑީޕީގެ ވެރިކަމުގައި ހުންނެވި އާދަމް އާޒިމެވެ.