14 Jan 2024, 11:02
ކުރިއަށް މި އޮތް ރައްޔިތުންގެ މަޖިލީހުގެ އިންތިޚާބުގައި 700އާ ގާތްކުރާ އަދަދަކަށް ވޯޓުފޮށި ބަހައްޓަންޖެހޭނެ ކަމަށް ލަފާކުރެވޭ ކަމަށް އިލެކްޝަންސް ކޮމިޝަން (އީސީ)އިން މިއަދު ބުނެފިއެވެ.
އެ ކޮމިޝަންގެ ނައިބު ރައީސް އިސްމާއީލް ހަބީބް "ސަން"އަށް ވިދާޅުވީ އެ ކޮމިޝަނުން ލަފާކުރަނީ 500 އާއި 700އާ ދެމެދުގެ އަދަދަކަށް ވޯޓުފޮށި ބަހައްޓަންޖެހޭނެ ކަމަށް ކަމަށެވެ.
އެ އަދަދު ކަނޑައެޅޭނީ ރީ ރަޖިސްޓްރޭޝަން މުއްދަތު ނިމި، ވޯޓުލާ މީހުންގެ ލިސްޓުތައް ފައިނަލްވުމުން ކަމަށް ވެސް ވިދާޅުވިއެވެ.
"އަޅުގަނޑުމެންނަށް އަދަދު ކަނޑައެޅޭނީ ރީ ރަޖިސްޓްރޭޝަންގެ ކަންކަން ނިމުނީމައި،" އޭނާ ވިދާޅުވިއެވެ.
ހަބީބު ވިދާޅުވީ ވޯޓު ފޮށީގެ އަދަދު އިތުރުކުރުމުގެ ބޭނުމަކީ، އެއް ފޮއްޓަކަށް ވޯޓުލާ މީހުންގެ އަދަދު މަދުކުރުންކަމަށެވެ. އެއީ, މިފަހަރުގެ މަޖިލިސް އިންތިޚާބު ބާއްވަނީ ރޯދަ މަހުގައި ކަމަށްވުމުން، ގިނަ ވަގުތު ކިއުތަކުގައި ތިބެން ނުޖެހޭހެން ވޯޓުލުމުގެ ކަންކަން ހަމަޖެއްސުމަށް ކަމަށް ވެސް އޭނާ ފާހަގަކުރެއްވިއެވެ.
އޭނާ ވިދާޅުވީ މީގެ ކުރީގެ އިންތިޚާބުތަކުގައި ހާހަކަށްވުރެ ގިނައިން ވެސް ވޯޓުފޮށި ބަހައްޓައިފައި އެބަހުރި ކަމަށެވެ. އެހެންކަމުން މި ފަހަރު ބަހައްޓަން ޖެހޭނެކަމަށް އަންދާޒާކުރާ އަދަދަކީ އެއަށްވުރެ މަދު އަދަދެއްކަމަށް ވެސް ފާހަގަކުރެއްވިއެވެ.
ހަމައެއާއެކު މަޖިލިސް އިންތިޚާބުގެ ވޯޓުލުމުގައި ވެސް، ރާއްޖެއިން ބޭރުގައި ވޯޓުލާން 150 އަށްވުރެ ގިނަ މީހުން ރަޖިސްޓްރީކޮށްފިނަމަ، އެ ގައުމެއްގައި ހުންނަ ދިވެހި އެމްބަސީގައި ވޯޓު ފޮއްޓެއް ބަހައްޓާނެކަމަށް ވިދާޅުވިއެވެ.
އަދި ރާއްޖޭގައި، ސިނާއީ މަސައްކަތްކުރާ ރަށްތަކާއި، ރިސޯޓުތަކުގައި ވެސް 30 މީހުންނަށްވުރެ ގިނައިން ވޯޓުލާން ރީރަޖިސްޓަރުކޮށްފިނަމަ އެ ތަނެއްގައި ވެސް ފޮއްޓެއް ބަހައްޓާނެކަމަށް ވިދާޅުވިއެވެ.
އިލެކްޝަންސް ކޮމިޝަނުން މިރޭ ބޭއްވި ނޫސްވެރިންގެ ބައްދަލުވުމުގެ ތެރެއިން -- ސަން ފޮޓޯ/ މާހިލް އާތިފް
މަޖިލީހުގެ އިންތިޚާބު އަންނަ މާޗު މަހުގެ 17ގައި ބޭއްވުމަށް އީސީން ވަނީ ނިންމައިފައެވެ.
އެ އިންތިޚާބުގައި ވޯޓުލުމުގެ ހައްގު ލިބިފައިވާ މީހުންގެ އަދަދު 284،327 މީހުންނަށް އަރާއިއިރު އޭގެ ތެރޭގައި ހިމެނެނީ 14،5162 ފިރިހެނުންނާއި 139،165 އަންހެނުން ކަމަށް އީސީން ބުންޏެވެ. އެއީ، ރިޔާސި އިންތިޚާބުގެ ދެވަނަ ބުރުގައި ވޯޓުލި މީހުންނަށް ވުރެ 1،523 އިތުރު އަދަދެކެވެ.
އިއްޔެ އީސީން ވަނީ ވޯޓު ލެވޭ މީހުން ރަޖިސްޓަރީ އާންމުކޮށް، ރަޖިސްޓްރީއަށް ޝަކުވާ ހުށަހެޅުމުގެ ފުރުސަތު މި މަހުގެ 21ގެ ނިޔަލަށް ހުޅުވައިލައިފައެވެ.