14 Jan 2024, 21:04
އެފްރިކާ ކަޕް އޮފް ނޭޝަންސްގެ ފުރަތަމަ މެޗު ކޯޓެޑިއުއާ ކާމިޔާބުކޮށްފިއެވެ.
ކޯޓެޑިއުއާގައި ކުޅެމުންދާ މިމުބާރާތުގެ ފުރަތަމަ މެޗު މުބާރާތް ބާއްވާ ގައުމުން ކާމިޔާބު ކޮށްފައިވަނީ ގްރޫޕް އޭ ގައި ގިނީ ބިސާއުއާ ބައްދަލުކުރި މެޗު ދެ ލަނޑު ސުން ލަނޑުން ކާމިޔާބު ކޮށްގެންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނުނު މިމެޗުގައި ގިނައިރު ކޯޓެޑިއުއާއިން ބޯޅަ ގެންގުޅުނު އިރު ހަމަލާ އުފެއްދިފައިވަނީ ދެޓީމުންވެސް ހަމަހަމަ ކޮށެެވެ. ނަމަވެސް މިމެޗުގެ ފެށުން ރަނގަޅުވީ ކޯޓެޑިއުއާގެއެވެ. މިގޮތުން ކޯޓެޑިއުއާއިން މެޗުގެ ހަތަރުވަނަ މިނެޓްގައި ލަނޑެއް ޖަހާ މެޗުގެ ލީޑު ނަގަފައެވެ. މިލަނޑު އެޓީމަށް ޖަހައިދިނީ ސޭކޯ ފޮފާނާއެވެ.
މިމެޗުގެ ފުރަތަމަ ހާފުގައި ލަނޑު ޖަހާނެ ރަނގަޅު ފުރުސަތު ދެޓީމަށްވެސް ލިބުނެވެ. މިގޮތުން ގިނީ ބިސާއުއަށް ލިބުނު އެންމެ ރަނގަޅު ފުރުސަތު ލިބުނީ ފުރަތަމަ ހާފުގައި އެޓީމްގެ މަމާ ބާލްޑާއަށެވެ. އަދި ފޮފާނާއަށް ވަނީ ކޯޓޭޑިއުއާގެ ލީޑު ފުޅާކުރާނެ ރަނގަޅު ފުރުސަތެއްވެސް ފުރަތަމަ ހާފް ނިމެނިކޮށް ލިބިގެން ގޮސްފައެވެ.
މިމެޗުގައި ކޯޓެޑިއުއާގެ ދެވަނަ ލަނޑު މެޗުގެ 58 ވަނަ މިނެޓްގައި ޖަހައިދިނީ ޖޮން ފިލީޕޭ ކްރާސޯއެވެ. މިލަނޑާއެކު ކޯޓެޑިއުއާއިން ހަމަޖެހިލިއިރު ގިނީ ބިސާއުއިން ވަނީ ލަނޑެއް ޖެހޭތޯ ކުރަމުންދިޔަ މަސައްކަތް އިތުރު ކޮށްފައެވެ. މިކާމިޔާބީއާއެކު ކޯޓެޑިއުއާއިން މިވަނީ އަމިއްލަ ގައުމުގައި އެފްކޮންގެ މިފަހަރުގެ މުބާރާތް ކަމިޔާބު ކުރުމަށް ކުރަމުންދާ މަސައްކަތުގައި ފެށުން ރަނގަޅުކޮށްފައެވެ. މިގްރޫޕްގައި ދެން ހިމެނެނީ އިކުއެޓޯރިއަލް ގިނީ އާއި ނައިޖީރިއާއެވެ.
އެފްކޮންގެ މިފަހަރުގެ މުބާރާތަކީ މީގެ ހަމަސް ދުވަސް ކުރިން ބޭއްވުމަށް ހަމަޖެހިފައިވި މުބާރާތެކެވެ. ނަމަވެސް ވެސްޓް އެފްރިކާއަށް އެދުވަސްވަރަކީ ވިއްސާރަ މޫސުން ކަމުން މިމުބާރާތް މި މަހަށް ފަސް ކުރީއެވެ. މީގެ ސަބަބުން ކޯޓެޑިއުއާއަށް ވަނީ މުބާރާތުގެ އިންތިޒާމްތައް ފުރިހަމަ ކުރުމަށް ވަގުތު ލިބިފައެވެ. މިއަދު ފެށުނު މިމުބާރާތް މިއަންނަ މަހުގެ 12 ވަނަ ދުވަހާ ހަމައަށް ކުރިއަށްދާނެއެވެ.