13 Jan 2024, 23:59
މާލޭ ސިޓީގެ މޭޔަރުގެ ގޮނޑި އެކަނި އެމްޑީޕީއަށް ދިނުމުން ނުފުދޭ ކަމަށާއި ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ހުރިހާ ގޮނޑިއެއް އެ ޕާޓީއަށް ހޯދައި ދިނުމަށް އެދިވަޑައިގަންނަވާ ކަމަށް، މޭޔަރުކަން ކަށަވަރު ކުރައްވާފައިވާ އާދަމް އާޒިމް މިރޭ ވިދާޅުވެއްޖެއެވެ.
މާލޭ ސިޓީ މޭޔަރު ހޮވުމަށް ބޭއްވި އިންތިޚާބުގު ނަތީޖާއާ ގުޅިގެން އުފާ ފާޅުކުރުމަށް އެމްޑީޕީން ސަލްޓަން ޕާކުގައި ބޭއްވި ޖަލްސާގައި އާޒިމް ވިދާޅުވީ އަންނަ މާޗު މަހުގެ 17ގައި ބާއްވާ މަޖިލިސް އިންތިޚާބުގައި ވެސް އެ ޕާޓީން ބޮޑު ކާމިޔާބީއެއް ހޯދާނެ ކަމަށެވެ.
އޭނާ ވިދާޅުވީ، މޭޔަރު އިންތިޚާބަށް ވުރެ ބޮޑަށް އެ އިންތިޚާބަށް މަސައްކަތް ކުރަން ޖެހޭ ކަމަށާއި ރައްޔިތުން މިއަދު ދިން މެސެޖާ އެއްގޮތަށް އިތުރު މެސެޖެއް ސަރުކާރަށް ދޭން ޖެހޭ ކަމަށެވެ.
"އަޅުގަނޑުމެން ދައްކަން ޖެހޭ ރައްޔިތުން ދައްކަން ޖެހޭ، ތިގޮތަށް އަޅުގަނޑުމެންނަށް ލިބިފައި ހުރި ގޯތިތައް އަތުލައިގެން ތިހެން ނުތިބެވޭނެކަން،" އާޒިމް ވިދާޅުވިއެވެ.
އޭނާ ވިދާޅުވީ މީގެ ކުރިން އޮތް އެމްޑީޕީގެ ސަރުކާރުން މާލޭ ރައްޔިތުންނަށް ދީފައިވާ ގޯތިތައް ހޯދުމަށް ވެސް އެ އިންތިޚާބުގައި އެމްޑީޕީން ކުރި ހޯދުން މުހިންމު ކަމަށެވެ. އަދި މިހާރު ވެސް އެ ޕާޓީގެ އަޣުލަބިއްޔަތު އޮތް މަޖިލީހުން ރައްޔިތުންނަށް ފައިދާވެފައިވާ ކަމަށާއި ރައްޔިތުންނަށް ގޯތި ދޭން ފަސޭހަވީ މަޖިލިސް ދިނުމުން ކަމަށް އޭނާ ވިދާޅުވިއެވެ.
އާޒިމް އިންތިޚާބު ކާމިޔާބު ކުރެއްވުމާ ގުޅިގެން އުފާ ފާޅުކުރުމަށް ބޭއްވި ޖަލްސާގެ ތެރެއިން: އެ ޖަލްސާގައި އާޒިމް ވިދާޅުވީ ރައްޔިތުންގެ މަޖިލީހުގެ އިންތިޚާބުގައި ހުރިހާ ގޮނޑިއެއް އެ ޕާޓީއަށް ހޯދައި ދިނުމަށް އެދިވަޑައިގަންނަވާ ކަމަށް -- ފޮޓޯ: އިންފިނިޓް މޮމެންޓްސް/ މޫސާ ނަދީމް
"ދެން މި ގޯތިތައް އަލުން ލިބުމަށް ފަސޭހަވާނީ އަޅުގަނޑުމެންނަށް ގޮނޑިތައް ދީގެންނޭ. އެހެންވީމަ އަޅިގަނޑު އެދެނީ މާލޭގެ ރައްޔިތުންނަށް، ރާއްޖޭގެ ހުރިހާ ރައްޔިތުންނަށް އެމްޑީޕީއަށް ހުރިހާ ގޮނޑިތައް މި އަންނަ މަޖިލީހުގައި ދެއްވާށޭ،" އާޒިމް ވިދާޅުވިއެވެ.
އެއާއެކު ކުރީ ސަރުކާރުން ގުޅީފަޅާއި ގިރާވަރު ފަޅާއި އުތުރުތިލަފަޅުން ވެސް ދޭން ނިންމާފައިވާ ގޯތިތައް ރައްޔިތުންނާ ހަވާލުކުރުމަށް އޭނާ މި ސަރުކާރަށް ގޮވައިލެއްވިއެވެ.
މީގެ އިތުރުން، އެމްޑީޕީ އޮތީ އެއްކޮށް، ވަރުގަދަކޮށް ކަމަށާއި އެ ޕާޓީގެ ރައީސް އިބްރާހީމް މުޙައްމަދު ޞާލިޙްގެ ލީޑާޝިޕްގެ ދަށުން ޕާޓީ ފެންނާނީ އިތުރަށް ވަރުގަދަކޮށް ކަމަށް ވެސް އޭނާ ވިދާޅުވިއެވެ.
މިއަދުގެ އިންތިޚާބުގެ ވަގުތީ ނަތީޖާއިން ދައްކާ ގޮތުން އާޒިމް 7621 ވޯޓު ކާމިޔާބު ކުރައްވާފައިވާއިރު އޭނާއާ އެންމެ ގާތުން ވާދަކުރެއްވި ޕީއެންސީގެ ކެންޑިޑޭޓް ކުރީގެ ބަންޑާރަ ނައިބު އައިޝަތު އާޒިމާ ޝަކޫރަށް ލިބިވަޑައިގަތީ 5،032 ވޯޓެވެ.
އާޒިމްގެ ކެމްޕެއިންގެ އެންމެ މުހިންމު ވައުދެއްގެ ގޮތުގައި ފާހަގަކުރައްވާފައި ވަނީ ކުރީ ސަރުކާރުގެ ބޯހިޔާވަހިކަމުގެ މަޝްރޫއުތައް ކަމަށްވާ ގެދޮރުވެރިޔާ ސްކީމާއި ބިންވެރިޔާ ސްކީމްގެ ދަށުން ދީފައިވާ ފްލެޓާއި ގޯތި ހަވާލުކޮށްދިނުމެވެ. އެ ސަރުކާރަށް ހަވާލުނުކުރެވި އޮތް ގޯތިތައް ދިނުމުގެ މަސައްކަތް މި ސަރުކާރުން އަންނަނީ ކުރަމުންނެވެ.
ނަމަވެސް މި ސަރުކާރުން އެންމެ އިސްކަންދޭ ބޯހިޔާވަހިކަމުގެ މަޝްރޫއަކީ ފުށިދިއްގަރު ފަޅު ހިއްކައިގެން ހަދާ ރަސްމާލެ މަޝްރޫއެވެ.
ގެދޮރުވެރިޔާ ސްކީމުގެ ތެރެއިން، ފުރަތަމަ 4،000 ފުލެޓު ލިބޭ މީހުންގެ ލިސްޓު ކުރީ ސަރުކާރުން އިއުލާން ކުރި ނަމަވެސް އެ ލިސްޓުގައި ގޯސްތަކެއް އުޅޭ ކަމަށް ބުނެ އޭސީސީން ދަނީ އެ މައްސަލަ ބަލަމުންނެވެ.
މި ސަރުކާރުން ވަނީ، ފުލެޓުތައް ހަވާލުކުރާނީ އޭސީސީގެ ތަހުގީގު ނިމުމުން ކަމަށް ބުނެފައެވެ.