14 Jan 2024, 08:42
ފިލްމީ ތަރިއެއްގެ ހައިސިއްޔަތުން އެންމެ ނުރުހޭ ކަމަކީ ބަތަލާއާ ބެހޭގޮތުން އާއްމުން ފަތުރާ ދޮގު ޚަބަރުތައް ކަމަށް ބޮލީވުޑް ބަތަލާ ދިއާ މިރުޒާ ބުނެފިއެވެ.
ފިލްމީ ކެރިއަރުގައި އެންމެ ނުރުހުންވާ ކަމަކީ ކޮބައިތޯ ފިލްމު ފެއާއިން ކުރި ސުވާލަކަށް ޖަވާބު ދެމުން ބަތަލާ ބުނީ މިހާރަކަށް އައިސް ފިލްމީ ތަރިންނާ ގުޅޭގޮތުން ކޮންމެ ފަދަ ވާހަކައެއް ވެސް ޚަބަރުތަކުން ނޫނީ ސޯޝަލް މީޑިއާއިން ފެންނަ ކަމަށާއި އެއީ ވަރަށް ހިތްހަމަނުޖެހޭ ކަމެއް ކަމަށެވެ.
ފިލްމީ ދާއިރާއިން މިހާރަކަށް އައިސް ފުރުސަތު ލިބުމަކީ ފަސޭހަކަމަކަށް ނުވާތީ އެކަމާ ކޮންމެ ވެސް ވަރަކަށް ހިތް ނުތަނަވަސްވާ ކަމަށް ދިއާ ވަނީ މި އިންޓަވިއުގައި ބުނެފައެވެ. ފެމިނާ މިސް އިންޑިއާގެ ތާޖު 2000ވަނަ އަހަރު ހާސިލުކުރުމަށް ފަހު ދިއާ ފިލްމީ ދާއިރާއާ ގުޅުނީ އެކްޓުކުރުމުގެ ދާއިރާއިން އެއްވެސް ކަހަލަ ތަމްރީނެއް ނުހަދައެވެ. ފުރަތަމަ ފިލްމުން ފުރުސަތު ލިބުނު އިރުވެސް ދިއާ ހުރީ އެއްވެސް ވަރަކަށް ސިނަމާއަށް ތައްޔާރުނުވެ ކަމަށް ބަތަލާ ވަނީ ބުނެފައެވެ. ފިލްމު އިންޑަސްޓްރީގެ ގިނަ ކަންކަން ބަތަލާ ދަސްކުރީ ފިލްމު ސެޓުތަކުގައި ކަމަށާއި ކެރިއަރުގެ ފުރަތަމަ ދިހަ އަހަރު ހޭދަކުރީ ވަރަށް ނުތަނަވަސްކަން މަތީ ކަމަށް 42 އަހަރުގެ ބަތަލާ ވަނީ ބުނެފައެވެ.
ބަތަލާ ދިއާ މިރްޒާ ފިލްމު "ދަކް ދަކް"ގެ މަންޒަރެއްގައި-- ފޮޓޯ/އިންޓަނެޓް
މިހާރު ވެސް ފިލްމީ ދާއިރާއިން ފުރުސަތު ނުލިބުމުގެ ބިރާ ކުރިމަތިލާން ޖެހޭ ކަމަށާއި ނަމަވެސް ފިލްމުތަކުން ފުރުސަތު ލިބޭ ވަރަކަށް ސިނަމާގައި މަސައްކަތްކުރުން ހުއްޓައިނުލާނެ ކަމަށް ބަތަލާ ވަނީ ބުނެފައެވެ.
ދިއާ މިރުޒާ އެންމެ ފަހުން ބެލުންތެރިންނަށް ފެނިފައިވަނީ ދާދި ފަހުން ރިލީޒްކުރި ފިލްމު "ދަކް ދަކް"އިންނެވެ. ބައެއް ވެބް ސީރީސްތަކުން ފެނިފައިވާ ބަތަލާއަކީ ޔޫއެން އެންވައިރަމަންޓްގެ ގުޑްވިލް އެމްބެސެޑަރެއްގެ ގޮތުގައި މަސައްކަތް ކުރަމުން އަންނަ މީހެކެވެ.