14 Jan 2024, 00:15
އިއްޔެ މާލޭއަށް ކުރި ވިއްސާރައިގައި ގެއްލުންވި، 40 ގެއެއްގެ އެސެސްމަންޓްވަނީ ނިންމައި، އިތުރު 18 ގެއެއްގެ އެސެސްމެންޓް މާދަމާ ހެދުމަށް ހަމަޖެހިފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)އިން މިރޭ ބުނެފިއެވެ.
އެންޑީއެމްއޭއިން މިރޭ އެކްސްގައި ކުރި ޕޯސްޓެއްގައި ބުނީ ގެއްލުން ލިބުނު 75 ގޭގެ ތެރެއިން، 18 ގެއަކުން އެސެސްމަންޓް ހަދަން ބޭނުންނޫންކަމަށް ފާހަގަކޮށްފައިވާ ކަމަށެވެ.
އިއްޔެ އެންޑީއެމްއޭއިން ވަނީ، ފެންބޮޑުވުމުގެ ސަބަބުން އެހީތެރިކަމަށް އެދިފައިވާ 132 ގެއަކަށް އެހީތެރިކަން ފޯރުކޮށްދީ ފެންވަނުން ކުޑަކުރުމަށް 91 ގެއެއްގައި ވެލި ބަސްތާ ޖަހައިދިން ކަމަށް ބުނެފައެވެ.
އެންޑީއެމްއޭއިން ބުނީ، އިއްޔެ ކުރި ވިއްސާރައިގެ ސަބަބުން 144 ގެއަކުން ގުޅައި އެހީތެރިކަމަށް އެދިފައިވާ ކަމަށެވެ.
ހަމައެއާއެކު ވިއްސާރައިގެ ސަބަބުން އަށް ގެއެއްގެ 57 މީހުންނަށް ވަގުތީ ހިޔާވަހިކަން ފޯރުކޮށްދީފައިވާ ކަމަށް ވެސް އެންޑީއެމްއޭއިން ވަނީ ބުނެފައެވެ.
ފާއިތުވި 24 ގަޑިއިރު ތެރޭ، އެންމެ ގިނައިން ވާރޭ ވެހުނީ މާލޭ ސިޓީއަށް ކަމަށް މޫސުމާ ބެހޭ ގައުމީ އިދާރާ (މެޓު) އޮފީހުން މިއަދު ވަނީ ބުނެފައެވެ.
އިއްޔެގެ ފަތިހުން ފެށިގެން މާލެއަށް ބޯކޮށް ވާރޭ ވެހުމުގެ ސަަބަބުން ބައެއް މަގުތަކުގައި ފެން ބޮޑުވިއެވެ. އަދި ބައެއް ގޭގެއަށް ފެން ވަދެ، މުދަލަށް ވެސް ވަނީ ގެއްލުންވެފައެވެ.