13 Jan 2024, 21:59
މާލޭ ސިޓީ މޭޔަރުކަން އިދިކޮޅު އެމްޑީޕީގެ ކެންޑިޑޭޓް އާދަމް އާޒިމް މިއަދު ކާމިޔާބު ކުރެއްވުމާ ގުޅިގެން އޭނާއަށް މަރުހަބާ ވިދާޅުވެ، އެ ކައުންސިލުން ސަރުކާރަށް އެއްބާރުލުން ދިނުމަށް އެދިވަޑައިގަންނަވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް އޮފީހުން ކުރި ޕޯސްޓެއްގައި ބުނީ ރައީސް ޢާޒިމްއަށް ފޯނުން ގުޅުއްވައި މަރްޙަބާ ވިދާޅުވި ކަމަށެވެ.
"ރައީސުލްޖުމްހޫރިއްޔާ ދެއްކެވި ވާހަކަފުޅުގައި ސަރުކާރުގެ ފުރިހަމަ އެއްބާރުލުން މާލެ ސިޓީ ކައުންސިލަށާ އަދި މޭޔަރަށް ދެއްވާނެކަމަށް ވިދާޅުވި،" އެ އޮފީހުން ބުންޏެވެ.
"އަދި ރައްޔިތުން ބޭނުންވާ ކަންކަމުގައި ލާމަރުކަޒީ ނިޒާމުގެ ތެރެއިން ސަރުކާރަށް އެއްބާރުލުން ދެއްވައިގެން މާލެ ސިޓީ ކައުންސިލުން މަސައްކަތްކޮށްދެއްވުމަށް އެދިވަޑައިގެންނެވި."
މިއަދުގެ އިންތިޚާބުގެ ވަގުތީ ނަތީޖާއިން ދައްކާ ގޮތުން އާޒިމް 7621 ވޯޓު ކާމިޔާބު ކުރައްވާފައިވާ އިރު އޭނާއާ އެންމެ ގާތުން ވާދަކުރެއްވި ޕީއެންސީގެ ކެންޑިޑޭޓް ކުރީގެ ބަންޑާރަ ނައިބު އައިޝަތު އާޒިމާ ޝަކޫރަށް ލިބިވަޑައިގަތޯ 5،032 ވޯޓެވެ.
މާލޭ މޭޔަރުގެ ގޮނޑި ހުސްވީ، އެ މަގާމުގައި ކުރިން ހުންނެވި ރައީސް މުއިއްޒު، ވެރިކަމާ ހަވާލުވެވަޑައިގަތުމުންނެވެ.
އެ މަނިކުފާނުގެ މޭޔަރު ކަމުގައި އިދިކޮޅު އެމްޑީޕީގެ ސަރުކާރު އޮތް އިރު، ސަރުކާރުގެ އެއްބާރުލުން ނުލިބޭ ކަމަށް އެ މަނިކުފާނު ތަކުރާރުކޮށް ވިދާޅުވެފައިވެއެވެ.