13 Jan 2024, 21:13
ޗައިނާގެ ރައީސް ޝީ ޖިންޕިންގެ ދައުވަތަކަށް ރައީސުލްޖުމްޙޫރިއްޔާ ޑރ. މުޙައްމަދު މުއިއްޒު އެ ގައުމަށް ކުރެއްވި ފުރަމާނަ ދަތުރުފުޅު ފަދަ ކާމިޔާބު ދަތުރުފުޅެއް މިހާތަނަށް އެއްވެސް ވެރިއަކު ކުރައްވާފައި ނުވާކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހީމް މިއަދު ވިދާޅުވެއްޖެއެވެ.
ޗައިނާއަށް ކުރެއްވި ތާރީޚީ ފުރަތަމަ ފުރަމާނަ ދަތުރުފުޅު ރޭ ނިންމަވައިލެއްވުމަށް ފަހު، ރައީސް މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދުގެ އިތުރުން އަރިހުގައި ވަޑައިގެންނެވި ވަފުދު އެނބުރި ރާއްޖެއަށް ވަޑައިގަތީ މިއަދު ހަވީރެވެ.
އެ ދަތުރުފުޅާ ގުޅޭގޮތުން އެކްސްގައި ކުރެއްވި ޕޯސްޓެއްގައި ގާސިމް ވިދާޅުވީ މި ކާމިޔާބު ދަތުރުފުޅުން ރައީސް މި ގައުމަށް ހޯއްދަވައިދެއްވި އެހީތެރިކަމާއި، ގައުމަށް ލިބުނު ކުރިއެރުންތަކަށްޓަކައި، އޭނާއާއި ޕާޓީގެ ފަރާތުން ރައީސަށް ޝުކުރު ދަންނަވާ ކަމަށެވެ.
އެ ދަތުރުފުޅުގައި ދެ ގައުމުގެ ދެމެދުގައި ދެކެވުނު ރަސްމީ ވާހަކަތަކުގެ ތެރެއިން، ރާއްޖެއިން ޗައިނާއަށް ދައްކަން ޖެހޭ ލޯނުތައް ދެއްކުމުގައި ކުރިއަށް އޮތް ފަސް އަހަރު ބޮޑެތި ލުއިތަކެއް ހަމަޖެހުމަކީ އުފާކުރާ ކަމަށް އޭނާ ވިދާޅުވެފައެވެ.
"ރާއްޖެއަކީ ކިތަންމެ ކުޑަ ގައުމެއް ނަމަވެސް، ރާއްޖެއަކީ މިނިވަން މުސްތަގިއްލު ގައުމެއް ކަމަށާއި، ޗައިނާއިން ރާއްޖޭގެ ސަރަަހައްދީ ނަޒާހަތްތެރިކަމަށާއި މިނިވަންކަމަށް، ފުރިހަމައަށް އިހްތިރާމުކުރާ ކަމަށާއި އަދި ހިލޭ އެހީގެ ގޮތުގައި 130 މިލިއަން ޑޮލަރުގެ ބޮޑު ގްރާންޓެއް މި ދަތުރުފުޅުގައި ލިބިގެން ގޮސްފައި ވާއިރު، އެތަކެއް ދާއިރާއިން އެތަކެއް ބިލިއަން ޑޮލަރުގެ ތަރައްގީގެ އެއްބަސްވުންތަކުގައި ސޮއިކުރެވިގެން ގޮސްފައިވާކަމީ މިދަތުރުފުޅުގެ ސަބަބުން މި ގައުމަށް ލިބިގެން ދިޔަ ނުހަނު ބޮޑު ކުރިއެރުމެއް ކަމުގައި ދެކެން،" ގާސިމް ވިދާޅުވިއެވެ.
ގާސިމް އިތުރަށް ވިދާޅުވީ މި ދަތުރުފުޅުގައި ޗައިނާއިން ރާއްޖޭގެ ރައީސަށް ކިޔާފައިވާ މަރުހަބާއަކީ މިހާތަނަށް ރާއްޖޭގެ ވެރިޔަކަށް ޗައިނާގައި ކިޔާފައިވާ އެންމެ ހޫނު މަރުހަބާ ކަމަށެވެ.
މި ދަތުރުފުޅު ނިންމަވާލެއްވުމަށް ފަހު އެނބުރި ރާއްޖެ ވަޑައިގެން އެއާޕޯޓުގައި ހުންނަވައި ރައީސް މުއިއްޒު ވަނީ ރާއްޖެއާއި ޗައިނާއާ ދެމެދު ނިންމަވާފައިވާ ބައެއް ނިންމެވުންތައް ހާމަކުރައްވާފައެވެ.
އެގޮތުން:
ޗައިނާއިން 130 މިލިއަން އެމެރިކާ ޑޮލަރުގެ ހިލޭ އެހީ ހަމަޖެހިފައިވާކަން ހާމަކުރެއްވި
- އެކުވެރި އަރަބި އިމާރާތް (ޔޫއޭއީ)އާއި ތައިލޭންޑުން އާސަންދަ ލިބޭގޮތް ހައްދަވާނެ ކަމަށް ވިދާޅުވި
- ރާއްޖެއިން ޗައިނާއަށް ދައްކަންޖެހޭ ލޯނުތައް ދެއްކުމުގައި ކުރިއަށް އޮތް ފަސް އަހަރުތެރޭ ވީހާ ވެސް ލުއި ގޮތްތަކެއް ހޯދައިދޭނެ ކަމަށް ދެ ގައުމުގެ ދެމެދު އެއްބަސްވެފައިވާ ކަމަށާއި އެކަމާ ގުޅިގެން މަޝްވަރާތައް ވަރަށް އަވަހަށް ފަށަން ހަމަޖެހިފައިވާ ކަމަށް ވިދާޅުވި
މި ނޫންވެސް އިތުރު 20 އެއްބަސްވުމެއްގައި އެ ދަތުރުގައި ދެ ސަރުކާރުން ސޮއިކޮށްފައިވެއެވެ.