14 Jan 2024, 09:00
"މީ އެއްގޮތަކަށްވެސް މިކަން ވާން ބައްޕަވެސް ބޭނުންވި ގޮތެއް ނޫން. ދެން ކިހިނެއް ހަދާނީވެސް…" މުނީރު ފުންނޭވާއެއް ދޫކޮށްލަމުން ރާދިންއަށް ބަލާލުމަށްފަހު ވާހަކަ ދެއްކިއެވެ.
"ބައްޕާ… އަޅުގަނޑު މައާލްއަށް ދެރަގޮތެއް ވިޔަކަ ނުދޭނަން. ކޮންމެ ޙާލެއްގައިވެސް މައާލްއާ އެކީ ވާނަން." ރާދިންގެ އަޑުގައިވަނީ ޔަޤީންކަމެވެ.
އިވިގެންދިޔަ ވާހަކަތަކުގެ ސަބަބުން ފައި ދަށުން ބިންގަނޑު ދެމިގެން ދިޔަ އިޙްސާސްއާއެކު މައާލްގެ ބޮލަށް ވެސް އެނބުރުން އަރައިގެން ގޮސް މީހާ އަރިއަޅާލާ ގޮތްވިއެވެ. އިވުނު ހަޤީޤަތް ގަބޫލުނުކުރެވުނު މައާލްގެ ސިކުނޑީގެ މަސައްކަތްތައްވެސް ހީވީ ކުޑަ ވަގުތު ކޮޅަކަށް މަޑުޖެހުނުހެންނެވެ. ގަބުވެފައި އިރުކޮޅަކު ހުރެވުނުއިރު، އޭނާއަށް ހީވީ މުޅި ދުނިޔެވެސް ހުއްޓުނު ހެންނެވެ. ބައްޕަމެން އެ ދައްކަނީ ކޮން ވާހަކައެއް ހެއްޔެވެ؟ އޭނާއަކީ ކާކުގެ ދަރިއެއްހެއްޔެވެ؟ އޭނާއާ ޝާކިރުމެންނާ އެއްވެސް ގުޅުމެއް ނެތީ ހެއްޔެވެ؟ ނޫނެކެވެ. އެހެންވާނީ ކިހިނެއް ހެއްޔެވެ؟ އެންމެ ކުރީގެ ހަނދާންތައްވެސް ގުޅިފައިވަނީ އޭނާގެ މައިންބަފައިންނާއެވެ. ޝާކިރާއި ފަހުމާއާއެވެ. ވީއިރު، ރާދިން މެން އެ ދައްކާ ވާހަކަ އޭނާ ގަބޫލުކުރާނީ ކިހިނެއް ހެއްޔެވެ؟ އެތަނުގައި އިތުރަށް މަޑުކުރުމުގެ ހިތްވަރެއް އޭނާއަކަށް ނުލިބުނެވެ. މުނީރުމެންގެ ކުރިމައްޗަށް އަރާ އެ ސުވާލުކުރުމުގެ ގާބިލްކަމެއް މައާލްގެ ނެތެވެ. އެއަށްވުރެ ބޮޑަށް އޭނައަށް ވަނީ ޝޮކެއް ލިބި ސިކުނޑިއަށް ވެސް އަސަރު ކޮށްފައެވެ. ކަންތައް ކުރަންވީ އެއްވެސް ގޮތެއް މައާލްއަކަށް ނޭނގުނެވެ. ހިތުގައި އުފެދުނު ޝަކުވާތުތަކުގެ ސަބަބުން ކުރާނެ ސުވާލެއް ވެސް އޭނާގެ ސިކުނޑިއަކަށް ނަޔެވެ. އެނބުރި މައާލް ހިނގައިގަތީ އޭނާގެ ކޮޓަރިއާ ދިމާލަށެވެ. އެހެންނަމަވެސް، ވަކި ހިސާބަކުން މިސްރާބު ބަދަލުކޮށްލަމުން އޭނާ ގޮސް ވަނީ އޭނާ ކުރަހަން ބޭނުންކުރި ކޮޓަރިއަށެވެ. ބައެއް ސާމާނުތައް އެތަނުގައި ހުއްޓެވެ. ވަށައިގެން އެ ކޮޓަރި ތެރެއަށް ބަލާލުމާއެކު، މާޒީގެ ހަނދާންތައް އައިސް އޭނާގެ ސިކުނޑި ހިޟާރުކޮށްފިއެވެ.
އެތަނުގައި ހުރި ކުރަހާ ސްޓޭންޑް ގައި އަތްޖައްސާލުމަށްފަހު، އިރުކޮޅަކު ވިސްނުމަކަށް ގެއްލިފައި މައާލް ހުއްޓެވެ. އޭނާ ކަބަޑުތައް ހުޅުވާ ބެލިއެވެ. ކުރަހަން ބޭނުންކުރާ ބައެއް ސާމާނުތައް އޭރުވެސް އެތަނުގައި ހުއްޓެވެ. ކަނޑާފައިހުރި ކުލަ ދަޅުތަކުގެ ބައެއް ކުލަތައް ހިކިފައި ހުރުމާއެކު އޭނާ އާ ފެންކުލަ ފޮއްޓެއް ނެގިއެވެ. ހިރަފުހުގެ އަސަރު ނެތުމާއެކު، ކޮންމެވެސް މީހަކު އެތަން ވަރަށް ރަނގަޅަށް ސާފުކުރާކަން ދެނެގަންނަން މައާލްއަށް އުނދަގުލެއް ނުވިއެވެ. ދެން އޭނާ ނެގީ ކެންވަސްއެކެވެ. އޭގައި އޭނާ ކުރަހަން ފެށިއިރު، އެ ދެލޮލުން ހޯސްލާފައި ކަރުނަތައް ފައިބަމުން ފަށައިފިއެވެ.
ކަރުނައިގެ ސަބަބުން ފުސްވަމުން ދިޔަ ލޯ އަތުގެ ނުފުށުން ފުހެލުމަށްފަހު، މައާލް އޭގައި ކުރަހަން ފެށީ ލޮލެކެވެ. ކުރަހާ ނިމުނުއިރު، އެންބަރ ކުލައިގެ އެ ލޮލުގެ ތެރެއިން ފެންނަނީ ތަސްވީރެކެވެ. އެ ތަސްވީރުގެ އެތެރޭގައި ވަނީ އަންހެން ކުއްޖެކެވެ. ފަސްއެނބުރި ބަލަން ހުރި އެ އަންހެން ކުއްޖާގެ ދެލޯ ފުރިފައިވަނީ ކަރުނުންނެވެ. މާނަފުން އެ ކުރެހުމުން މައާލް އަންގައިދޭން ބޭނުންވީ އޭނާގެ ޙަޔާތުގެ ހުރިހާ ހިތާމައެއް ގުޅިފައިވަނީ އޭނާގެ ލޯ އަނދިރިވާން ދިމާވި ހާދިސާއާ ކަމެވެ. އެ ހާދިސާ އޭނާގެ މުޅި ދިރިއުޅުން ބަނަކޮށްލި ކަމެވެ. އަދި އޭނާގެ އުފާވެރިކަން ފޭރިގަތްކަމެވެ. އިރުކޮޅަކު އެއަށް ބަލަހައްޓައިގެން އިނުމަށްފަހު، އޭނާ ކެންވަސް އެ ހުރިތާ ބަހައްޓާފައި އެތަނުން ނުކުންނަން ހިނގައިގަތެވެ.
"ބައްޕަ ބޭރަށް ގޮސްލަން އެބަޖެހޭ. ފުލުސް އޮފީހުން ގުޅީމަ ގުޅާލާ އިނގޭ…" މުނީރު ގަޑިއަށް ބަލާލަމުން ބުނެލިއެވެ.
"މައާލް އަދިވެސް ނިދަނީތަ؟" ރާދިންވެސް ބޯ ޖަހާލާފައި އެތެރެއަށް ވަންނަން ހިނގައިގަތީ މައާލްގެ ޚަބަރެއް ނުވާތީއެވެ. އެތެރެއަށް ވަތް ރާދިންގެ ލޮލުގައި އެ ކޮޓަރިން ނުކުތް މައާލް އަޅައިގަތެވެ. ވަށައިގެންވީ އެއްވެސް ކަމަކަށް ސަމާލުކަން ނުވާ ފަދައަކުން މައާލް ސިޑިއާ ދިމާލަށް ހިނގައިގަތެވެ. އެ މަންޒަރު ބަލަން ހުރުމަށްފަހު، ރާދިން ގޮސް ކުރަހާ ކޮޓަރީގެ ދޮރުހުޅުވާލާފައި އެތެރެއަށް ވަނެވެ. ވަށައިގެން ބަލާލުމާއެކު އޭނާ އަށް ހައިރާންކަމެއް ލިބިގެން ދިޔައެވެ. މައާލް ކުރަހާފައިވާ ކުރެހުން އޭނާގެ ލޮލުގައި އަޅައިގަތުމާއެކު އެ ދިމާލަށް ރާދިންއަށް ފިޔަވަޅު އަޅާލެވުނެވެ. އެއާ ދާދިގާތުގައި ހުއްޓެމުން ފަރުވާތެރިކަމާއެކު ކުރެހުމަށް ބަލާލިއެވެ. އެއާއެކު އެ ކުރެހުން އަދި ރަނގަޅަށް ނުހިކޭކަން އޭނާއަށް އެނގުނެވެ. އެއާއެކު ފަސް އެނބުރި އޭނާއަށް ދޮރާ ދިމާލަށް ބަލައިލެވުނީ އެއީ ދެންމެ މައާލް ކުރެހި ކުރެހުމެއްކަން ޔަޤީންވެފައެވެ.
އަނެއްކާވެސް ރާދިން އެ ކުރެހުމަށް ބަލާލިއެވެ. އެއާއެކު އޭނާގެ ހިތަށް ގޮތެއް ވެގެން ދިޔައެވެ. އެ ކުރެހުން ކިތަންމެ ރީތިވިނަމަވެސް، އޭގެ ފަހަތުގައި ފޮރުވިފައިވާ ފުން މާނަ އޭނާގެ ހިތަށް އެނގުނު ފަދައެވެ. މައާލްގެ ހިތާމަތައް އޭނާއަށް ފަހުމްވަމުން ދިޔައެވެ. އެހިތުގެ ޙާލު އެންމެ ކުރެހުމަކުންވެސް ރާދިންއަށް ވަރަށް ރަނގަޅަށް ފަހުމްވެއްޖެއެވެ. އެތައް އިރަކު އެއަށް ބަލަހައްޓައިގެން ރާދިންއަށް ހުރެވުނެވެ. އެއަށްފަހު އޭނާ ކޮޓަރިން ނުކުމެ ދޮރު ލައްޕާލިއެވެ. ދެ ވިސްނުމެއްގައި ހުރެފައި ރާދިންވެސް ސިޑިއާ ދިމާލަށް ހިނގައިގަތެވެ. މައާލް މައްޗަށް އެ ދިޔައީ އޭނާގެ ކޮޓަރިއަށް ކަން ރާދިންއަށް އެނގެއެވެ. ސިޑިން މައްޗަށް އަރާ މައާލްގެ ކޮޓަރިއާ ހިސާބަށް ދެވުމުން އޭނާގެ ފިޔަވަޅުތަކަށް މަޑުޖެހުމެއް އައެވެ. އެހެންނަމަވެސް، ހިތްވަރު ކޮށްފައި އޭނާ ޓަކި ޖަހާލިއެވެ. މައާލްގެ ޚަބަރެއް ނުވުމާއެކު ރާދިން، މަޑުމަޑުން ދޮރު ހުޅުވާލިއެވެ. އޭރު މައާލް އޮތީ އެނދުމަތީގައި ބަންޑުން އޮށޯވެއެވެ. ކުޑަކޮށް އެތެރެއަށް ވަދެލާފައި ރާދިން މައާލްއަށް ގޮވާލިއެވެ.
"މައާލް…" އިތުރު އެއްޗެއް ނުބުނެވި އުޅެނިކޮށް ނޭފަތް ދަމާލުމާއެކު އައި ގިސްލުމުގެ އަޑާއެކު މައާލް ރޮނީކަން ރާދިންއަށް ޔަޤީންކުރެވުމާއެކު، އޭނާއަށް ހާސްކަން ވެރިވިއެވެ.
"މާލް." އޯގާތެރިކަން އެކުލެވޭ އަޑަކުން ރާދިން މައާލްއަށް ގޮވާލާފައި ގޮސް އެނދުގައި އިށީނދެ މައާލްގެ އަތުގައި ހިފައްޓާލިއެވެ.
'އާޔ ޔޫ އޯކޭ؟" ރާދިންގެ އެއްވެސް ސުވާލަކަށް މައާލް ޖަވާބެއް ނުދެއެވެ. ގިސްލުމާއެކު އޭނާ ރޮމުން ދިޔައީ މިއިން ދުވަހަކު ހިތުގައި ޖެހިފައި ނުވާ ފަދަ ގޮތަކަށެވެ. މައާލް ރޯން ފުރުސަތު ދީގެން އިރުކޮޅަކު ރާދިން މަޑުކޮށްލީ މައާލްއަށް ވަގުތު ބޭނުންވަނީއޭ ހިތާއެވެ. އޭނާ ވާހަކަ ދައްކަން އުޅެ އުޅެ ކާމިޔާބު ވާ ގޮތް ނުވުމުން ރާދިން އިނީ ގޮތް ހުސްވާން ކައިރިވެފައެވެ.
"މާލް. ޕްލީޒް ހުއްޓާލަބަލަ. އަހަރެންގެ ސަބަބުންތަ ތި ރޮނީ؟ އަހަރެން ދިޔައިމަ ހުއްޓާލާނަންތަ؟" އެހެން ބުނެލާފައި ރާދިން ތެދުވަން އުޅުނު ވަގުތު މައާލް ބާލީހުން މޫނު ނަގާ ރާދިންއަށް ބަލާލިއެވެ. އޭރު އޭނާ މޫނު ޖައްސާލައިގެން އޮތް ބާލީސް ވެސް އޮތީ ތެމިފައެވެ. މައާލްގެ ދެލޯ ރަތްވެ ދުޅަކަމެއް އެ ދެލޮލަށް ވެރިވެފައިވާއިރު، އޭނާގެ މޫނުމަތިވެސް ވަނީ ރަތްވެފައެވެ.
"މާލް… ކިހިނެއްވީ؟" މައާލްގެ ދެލޮލުން އޮހޮރެމުން ދިޔަ ކަރުނަތަކަކަށް ހުއްޓުމެއް ނާދެ އެވެ. މައާލްގެ ރުއިން ގުޅިފައިވަނީ އެ ކުރެހުމާކަމުގައި ރާދިންގެ ސިކުނޑި ވިސްނައިދެމުން ދިޔައެވެ. އަނެއްކާ މާޒީ މަތިން ހަނދާންވެ މާ ބޮޑަށް ރޮވޭގޮތްވީ ހެއްޔެވެ؟
"މައާލް. ލުކް އެޓް މީ… ޕްލީޒް ސްޓޮޕް… ޕްލީޒް…" ރާދިންގެ އަޑުގައި އާދޭހުގެ އަސަރުވާއިރު، އެ އަޑުގައިވެސް ވަނީ ވޭނެވެ. މައާލް މަޑުމަޑުން ތެދުވެ އެނދުގައި އިށީނެވެ.
"ދޭ…" ކުރެހިފައިވާ އަޑަކުން މައާލް ބުނެލީ މޫނުމަތި ފުހެލަމުންނެވެ. އޭރުވެސް އޭނާގެ ރުއިން ނުހުއްޓެވެ.
"މާލް… ލުކް… ސްޓޮޕް… މާ ގިނައިން ރޮވިއްޖެ. ހުއްޓާލީމަ އަހަރެން ދާނީ." މައާލްގެ ކޯތާފަތުގައި ދެ އަތުން ހިފައްޓާލާ އޭނާގެ ލޮލާ މައާލްގެ ލޯ ސީދާކޮށްލާފައި ރާދިން ބުންޏެވެ. އޭނާ މައާލްގެ ލޯ ފުހެލިއެވެ. ރާދިންގެ އެ ދެލޮލުގެ ތެރެއަށް ބަލަހައްޓައިގެން މައާލްއަށް ހުރެވުނީ ކުޑަ ހިނދުކޮޅަކަށެވެ. މައާލް ރާދިންގެ ލޮލާ ނަޒަރު ވަކިކޮށްލުމާއެކު، ރާދިން މައާލްއަށް ގޮވާލާ ދެވަނަ ފަހަރު އެ ދެލޮލާ ނަޒަރު ސީދާކޮށްލިއެވެ.
"ކީއްވެ ދުރު ބަލަނީ؟ މާލް…" މައާލްގެ ދަތްދޮޅީގައި ހިފައްޓާލައިގެން އިނދެ ރާދިން ބުނެލިއެވެ. އޭނާ އަނެއްކާވެސް މައާލްގެ ލޯ ފުހެދިނެވެ.
"މާލް ބޭނުންވާ ގޮތެއް އަހަަރެން ކައިރީގައި ބުނެބަަލަ، އަހަރެން ބަލާނަން މާލް ބޭނުންވާ ކޮންމެ ގޮތަކަށް ކޮންމެ ކަމެއް ކޮށްދެވޭތޯ. އަހަރެންގެ ސަބަބުންތަ ތި ރޮނީ؟ އަހަންނަށް ނޭނގި ކަމެއް ކުރެވުނީތަ؟" ރާދިންއަށް އަނެއްކާވެސް ސުވާލުކޮށްލެވުނެވެ.
"މާލްއަށް ނޭނގޭނެ ތިގޮތަށް މާލް ރޯތަން ފެނުނީމަ އަހަންނަށް ވާ ގޮތެއް. މާލް ތި ގޮތަށް ރޯތަން ފެނުނީމަ އަހަންނަކަށް ވެސް ކެތެއްނުވެޔޭ. އެކަމަކު ދެރައީ މިއަދު މާލް ތިކުރާ ހިތާމައިގެ މެދުވެރިއަކީ އަހަންނަށް ވީމަ. ނޭނގިނަމަވެސް، އަހަންނަށް ދެރަ ދެވުނީ އަހަރެންވެސް އެންމެ ލޯބިވާ އަންހެން ކުއްޖާއަށް. ޕްލީޒް ސޮޓޮޕް… މާލް ތި ރޮނީ ކީއްވެކަން ނޭނގުނު ނަމަވެސް، ޕްލީޒް ލެޓް މީ ސްޓޭ ވިތް ޔޫ. " ރާދިން މަޑުމަޑުން އޭނާގެ ނިތްކުރި މައާލްގެ ނިތުގައި ޖައްސާލިއެވެ.
"އައި ކާންޓް ސީ ޔޫ ލައިކް ދިސް. އައި ކާންޓް ލީވް ޔޫ. އައި ލަވް ޔޫ." އެ އިން ގޮތަށް އިނދެ ރާދިން ބުނެލިއެވެ. މައާލްއަށް ކެތްކުރެވުނީ އެހިސާބަށެވެ. ރާދިންގެ ގައިގައި ބައްދާލުމާއެކު، އޭނާގެ ބަޑި ފަޅައިގެން ގޮސް ބާރަށް ރޮއި ގަނެވިއްޖެއެވެ. މައާލްއަށް ވީ ގޮތުން ރާދިންވެސް ކަންބޮޑުވިއެވެ. އެ ވޭނީ ގިސްލުމުގެ އަޑާއެކު އޭނާގެ ހިތްވެސް ހީވީ ގެނބިގެން ދިޔަހެންނެވެ.
"މާލް. ތިވަރަށް ނުރޮއި. ވީ ގޮތް އަހަރެންގެ ކައިރީގައި ބުނެބަލަ" ރާދިން ބުނެލިއެވެ. އޭނާ މައާލް ދުރުކޮށްލަން އުޅުނު ނަމަވެސް، އެކަމަށް މައާލް ފުރުސަތެއް ނުދިނެވެ. އޭނާ ރާދިންގެ ގައިގައި ހިފައްޓާފައި ހުރީ އެއަށް ވުރެ ބާރަށެވެ. ހީވާކަހަލައެވެ. ރާދިން އޭނާއާ ދުރަން ދާން މައާލް ބޭނުމެއް ނުވެއެވެ.
"މާލް…" އިތުރަށް މައާލް ދުރުކުރަން ނޫޅެ މައާލްއަށް ފުރުސަތު ދީގެން ރާދިންވެސް އިނީއެވެ. އެހާ ދުވަސްފަހުން މައާލްއާ ގާތްވެލުމުގެ ފުރުސަތު ލިބުނު ނަމަވެސް، އެ ޙާލަތުގެ ސަބަބުން ރާދިންގެ ހިތަށް ހަމަޖެހުމެއް ނުލިބުނެވެ. ވީ ގޮތެއް ނޭނގި އޭނާގެ މުޅި ނަފްސުގެ ހަމަޖެހުން ވަނީ އެކީ ގެއްލިފައެވެ.
ޙަޔާތުގައި ދިމާވި ހުރިހާކަމަކަށްފަހު، މީހެއްގެ ކުރިމަތީގައި އެފަދަ ގޮތަކަށް އެ ހިތުގައިވާ އުދާސްތައް މައާލް ބޭރުކުރި އެއީ ފުރަތަމަ ފަހަރެވެ. އަދި އެވެސް އޭނާ އެންމެ ލޯބިވާ މީހާގެ ކައިރީގައެވެ. އެހިތުގެ ގިލަންވެރިކަމާއި ޝިކާޔަތުތައް ވަނީ އޭނާއަށް ކެތްނުކުރެވޭ ވަރަށް އިތުރުވެފައެވެ. މައާލް ހުއްޓުވަން ރާދިން ދެއްކި އެއްވެސް ވާހަކައަކުން އަސަރު ނުކުރީ އެހެންވެއެވެ.
"ދޭ…" އިރުގަނޑެއް ފަހުން މައާލް ރާދިންއާ ދުރުވެލިނަމަވެސް، އޭނާ ބުނީ ހަމަ އެކަނި އެހެންނެވެ. ރާދިންއަށް ނުބަލަންވެގެން ކަމެއް ނޫނީ ރާދިންއަށް ބަލަން ނުކެރިގެންކަމެއް ނޭނގެއެވެ. ދުރުވެލުމަށްފަހު، އެންމެ ފަހަރަކުވެސް މައާލް ރާދިންއާ ދިމާލަށް ބަލައެއް ނުލިއެވެ. މޫނު އަނބުރާލި ގޮތަށް އޭނާ އިނީއެވެ.
"ކީއްވެ؟" ރާދިންއަށް ވެސް ޝަކުވާކޮށްލެވުނެވެ.
"އަހަންނަށް އޮޅުވާލީ… " އެހެން ބުނެލާފައި މައާލް އެނދުން ތެދުވެ ރާދިންއަށް ފުރަގަސްދިނެވެ. ރާދިން ހީކުރީ މައާލް އެ ވާހަކަތައް ނިސްބަތްކުރީ ސަޖާއާ އޭނާގެ ގުޅުމަށް ކަމުގައެވެ. އެހެންނަމަވެސް، އޭރު އޭނާއަށް ނޭނގުނުކަމަކީ މައާލްއަށް އޭނާގެ މައިންބަފައިންގެ ހަޤީގަތް ވެސް އެނގުނުކަމެވެ.
"ރާދިންވެސް… ކީއްވެތަ އަހަންނަށް އަބަދު ދެރަގޮތްވަނީ؟ ކީއްވެ އަހަންނަށް މިހުރިހާ ކަމަކާ ކުރިމަތިލާން ޖެހެނީ… އެކްސިޑެންޓުގައި އަހަރެންވެސް…" ދެރަވެ ޖަޒުބާތުގައި ޖެހުނު ވަރުން މައާލްއަށް ބުނެވުނެވެ.
"ޝްޝްޝް… މާލް. ތިކަހަލަ އެއްޗެހި ބުނާކަށް ނުވާނެއެއްނު." ރާދިން މައާލްގެ އަނގަމަތީގައި އަތް އެޅިއެވެ. އެ އަތް ދުރުކޮށްލަމުން ލީ ފުންނޭވާއާއެކު މައާލް ހަމަޖެހިލިއެވެ. އިރުކޮޅަކުން ރާދިންވެސް ކޮޓަރިން ނުކުމެލީ މައާލް ހަމަޖެހިލިކަން އެނގުމުންނެވެ.
ފުލުހުންގެ އިދާރާއިން ރާދިންމެންނަށް ގުޅިއިރު، ތިނެއް ޖަހާ ބޮޑުވެއްޖެއެވެ. އޭނާ އެ ފޯނު ކޯލަށް ޖަވާބު ދިނުމަށްފަހު ގޮސް މައާލްއާ ވާހަކަ ދެއްކިއެވެ.
"ފުލުހުން ބުނީ މިހާރު އެކޮޅަށް ދާން." މައާލްއަށް އޮޅުން ފިލުވަދީފައި އޭނާ މުނީރަށް ވެސް ގުޅާ އެ ޙަބަރު ދިނެވެ. މުނީރު ބުނީ ރާދިންމެން ދިޔުމަށެވެ. އޭނާވެސް އެ ގަޑިއަށް އެތަނަށް ދާނެކަމުގައެވެ.
"މައާލް. ތައްޔާުރުވެލައިގެން ނުކުމޭ އިނގޭ. އަހަރެން މި އިނީ ސިޓިން ރޫމުގަ." އެހެން ބުނެލާފައި ރާދިން ކޮޓަރިން ނުކުމެގެން ތިރިއަށް މިސްރާބުޖެހިއެވެ. އޭނާ ސޯފާގައި އިށީނދެ އިނދެފައި މައާލްގެ ކުރަހާ ކޮޓަރިއާ ދިމާލަށް ބަލާލިއެވެ. އެހިތަށް ތަފާތު އެއްޗެހި އަރާ ފައިބަމުން ދިޔައެވެ. އެހެން އިންނަތާ ވިއްސަަކަށް މިނެޓް ފަހުން މައާލްވެސް އަތުވެއްޖެއެވެ. މައާލް ލާފައިހުރީ ހުދާ އަޅިކުލަ ހިމެނޭ، ބޯ، ގޮޅި ޖެހި ޓީޝާޓާއި ކަޅުކުލައިގެ ސްކިނީއެކެވެ. އޭރު އޭނާގެ އެއް އަތުގައި ކޯޓެއް އޮތެވެ. އިސްތަށިގަނޑު ދޫކޮށްލާފައިވާއިރު، މޫނުމަތީގެ ދުޅަކަން ފޮރުވަން އެހެންޏާ ކުރާވަރަށް ވުރެ ބޮޑަށް މޭކަޕްކޮށްފައި ހުރިނަމަވެސް، އެ ދިރުމެއް ނެތް މޫނުގައިވި މާޔޫސްކަން ރާދިންއަކަށް ސިއްރެއްނުވިއެވެ. މައާލް ހީވަނީ ހިތާމައިގެ ރީތި ތަސްވީރެއްހެންނެވެ. މައާލް ރާދިންއާ ނަޒަރު ސީދާކޮށްލީ ދެތިން ސިކުންތަށެވެ. ނިކަން އަވަސް އަވަހަށް އޭނާ ދުރުބަލާލިއެވެ.
"ނިމުނީތަ؟ ހިނގާ ދަމާ…" ރާދިން އެހެން ބުނެލާފައި އަތުން އިޝާރާތްކޮށްލުމާއެކު މައާލް ކުރިން ހިނގައިގަތެވެ. ދޮރުން ނުކުމެފައި އޭނާ ކޯޓު ލާންވެގެން އުޅުނު ނަމަވެސް، އެއް އަތުގައި ދަބަސް، އަނެއް އަތުގައި ފޯނު އޮތުމުން އުނދަގޫވިއެވެ.
"ލެޓް މީ…" އެހެން ބުނެލާފައި ރާދިން މައާލްއަށް އެހީތެރިވެދިނެވެ. ދެމީހުންގެ އަތް ބީހިލުމާއެކު ދެ ހިތުގެ ތެޅުންވެސް އަވަސްވެގެން ދިޔައެވެ.
ޑްރައިވަރު އައުމާއެކު ރާދިން ޑްރައިވަރަށް ބަލާލާފައި ވާހަކަ ދެއްކިއެވެ.
"އަހަރެން ދާނީ. އޯކޭ ނަޔަސް." އޭނާ އެހެން ބުނެލާފައި ގޮސް މައާލް އަރަން ދޮރު ހުޅުވާލަ ދިނެވެ. ކުރީ ސީޓަށް އެރުމުގެ ބަދަލުގައި މައާލް އަމިއްލައަށް ދޮރު ހުޅުވާލާފައި އަރާ އިށީނީ ފަހަތު ސީޓުގައެވެ. ހިތަށް ތަދުވި ނަމަވެސް އިތުރު އެއްޗެއް ބުނުމެއްނެތި ރާދިން ވެސް ދޮރު ޖަހާފައި ގޮސް ޑްރައިވަރު ސީޓުގައި އިށީނެވެ. ހަޤީގަތުގައި އޭނާ ބޭނުންވަނީ ވީހާވެސް ގިނައިން މައާލްއާ އެކު ވަގުތު ހޭރަކުރާށެވެ. އޭނާ މައާލް ދެކެ ލޯބިވާވަރު އެ ހިތަށް އިލްހާމު ކޮށްދޭށެވެ. ދެރައީ ނުފިލާވަރުގެ ލަށްގަނޑެއް އެ ދެމެދުގައި ވާތީއެވެ. އެހެންނަމަވެސް، މައާލްއާއެކު ގިނަ ވަގުތު ހޭދަކުރިވަރަކަށް މައާލްއަށް އޭނާ ދައްކާ ވާހަކައަށް އިތުބާރު ކުރެވިދާނެޔޭ ރާދިންއަށް ހީވަނީއެވެ. އެއީ ގިނަވަގުތު އެކުގައި ހޭދަކުރާނަމަ އަނެކާގެ އިޙްސާސްތައް އެނގޭނެކަމުގައި އޭނާއަށް ގަބޫލުކުރެވޭތީއާވެސް އެކުގައެވެ. އިރުއިރުކޮޅަކާ ރާދިން ލޯގަނޑުން މައާލްއަށް ބަލާލި ނަމަވެސް އެންމެ ފަހަރަކު ވެސް މައާލް ރާދިންއަކަށް ބަލައެއް ނުލައެވެ.
އެމީހުން ގޮސް ކާރު ޕާކުކޮށްފައި ސްޓޭޝަނަށް ވަންނަން ދިޔައިރު މުނީރުވެސް، އެތަނުގައި ހުއްޓެވެ. އެމީހުން ވަނުމާއެކު އެ ކޭސްއާ ހަވާލުވެ ހުރި އޮފިސަރު އައިސް ވާހަަކަ ދެއްކިއެވެ. އެކަނި ބަޔާން ދޭން ވަންނަން ވުމުން މައާލް ހުރީ ޖެހިލުންވެފައެވެ. އެހެންނަމަވެސް ހިތްވަރުކޮށްފައި އޭނާ ގޮސް އެތެރެއަށް ވަނެވެ. އެއަށްފަހު ފުއާދުގެ ފަރާތުން އޭނާއަށް ފެނުނު ކަންތައްތަކާއި އަޑުއިވުނު ވާހަކަތަކުގެ ބަޔާން މައާލް ދިނެވެ. ފުލުން އޮފިސަރު މުނީރުއާ ރާދިންއާވެސް އިތުރު ވާހަކަތައް ދެއްކިއެވެ. އަދި އެމީހުން މިހާރު ހެންރީގެ ބަޔާންތައް ވެސް ނެގިކަމުގައި ބުންޏެވެ. އަދި ފުއާދު ހޯދުމުގެ މަސައްކަތް ކުރަމުންދާކަމުގައިވެސް ބުންޏެވެ. ބަޔާން ދީފައި ތިން މީހުން ވެސް ދިޔައީ ގެއަށެވެ.
*****
ރޭގަނޑު އެގާރަ ޖަހާ ބޮޑުވެއްޖެއެވެ. ލަންޑަންގެ ހިތްގައިމު ހިސާބެއްގައި ހުރި އެޕާރޓްމެންޓު ކޮންޕްލެކްސް ގެ އެޕާރޓްމެންޓެއްގެ ތެރޭގައި ހުރި ލެދަރ ސޯފާތަކުން ސޯފާއެއްގައި އިށީނދެލައިގެން ފުއާދު އިންއިރު، އޭނާގެ އަތުގައި ބިއްލޫރި ތައްޓެއް ހުއްޓެވެ. މަޑު ރަތް ކުލައަކަށް ދާ ބުއިމެއް އޭގައި ހުރިއިރު، އޭނާ އިރުއިރުކޮޅަކާ އެ ތަށިން އެތި ފޮދެއް ބޯލައެވެ. އެހެން އިނދެފައި ފޯނު ނަގާ މީހަކަށް ގުޅާލިއެވެ.
"ހެންރީގެ ހަބަރެއް ވެއްޖެ؟" ފުއާދު ސުވާލުކޮށްލިއެވެ.
"ބޮސް… އެލެން ބުނީ މި ގުޅަނީ އޭ… އަދި ނުވޭ…" އެކޮޅުން ބުނެލި އަޑު އިވުނެވެ. ދެމީހުން ވާހަކަ ދެއްކީ އިނގިރޭސިންނެވެ.
"ކިހާ ދެރަކަމެއް ދެން. ކަލޭމެންނަށް ލާރި މިދެނީ ކަމެއް ނުކޮށް ތިބޭކަށް ނޫނޭ. އެ އެއްޗަކުވެސް މަރުވީކީ ނޫން. މަރާލެވުނީ ނޫން." އެހެން ބުނެލާފައި ފުއާދު އަނގައިން ހުތުރު ބަހެއް ބޭރުކޮށްލިއެވެ. ފޯނު ބާއްވާފައި ސޯފާ މައްޗަށް އެއްލާލުމާއެކު ލޯ މަރާލުމަށްފަހު ސޯފާގައި ހަށިގަނޑު ދަމާލިތާ ގިނަ އިރެއްނުވެ މަޑުމަޑު އަތެއްގެ ބީހުން ފުއާދުގެ ކޯތާފަތަށް އިޙްސާސްވިއެވެ.
"ހައި ބޭބީ…"
(ނުނިމޭ)