13 Jan 2024, 18:45
މިއަދު އޮތް މާލޭ ސިޓީ ކައުންސިލްގެ މޭޔަރު ބައި އިލެކްޝަންގައި މިހާތަނަށް ގުނުނު ނަތީޖާއިން އެމްޑީޕީގެ ކެންޑިޑޭޓު އާދަމް އާޒިމް ބޮޑު ތަފާތަކުން ކުރި ހޯއްދަވައިފިއެވެ.
ހުސްވެފައިވާ މާލޭ ސިޓީގެ ހުސްވެފައިވާ މޭޔަރު ކަމާއި، މާފަންނު ދެކުރު ދާއިރާ، މެދުހެންވޭރު ދާއިރާ، ހެންވޭރު ދެކުނު ދާއިރާގެ ކައުންސިލް މެންބަރު އިންތިޚާބުކުރަން ބާއްވާ ބައި އިލެކްޝަންގެ ވޯޓުލުން މިއަދު ހެނދުނު 8:00 އިން ހަވީރު 5:00 އާ ހަމައަށް ވަނީ ކުރިއަށް ގެންގޮސްފައެވެ.
މިހާތަނަށް ގުނުނު 16 ފޮށީގެ ވަގުތީ ނަތީޖާތައް ދައްކާ ގޮތުން، މިހާތަނަށް ގުނުނު ފޮށިތަކުން އާޒިމް ވަނީ 1،645 ވޯޓު ކާމިޔާބުކުރައްވައިފައެވެ.
ދެން ވާދަކުރައްވާ ޕީއެންސީގެ ކެންޑިޑޭޓު އައިޝަތު އާޒިމާ ޝަކޫރަށް ލިބިވަޑައިގެންފައިވަނީ 1،088 ވޯޓެވެ. އަދި، ދަ ޑިމޮކްރެޓްސްގެ ކެންޑިޑޭޓު މުހައްމަދު ސައިފް ފާތިހަށް 509 ވޯޓު ލިބިވަޑައިގެންއިރު ޕީއެންއެފްގެ ކެންޑިޑޭޓު ހުސައިން ވަހީދަށް ލިބިވަޑައިގަތީ 419 ވޯޓެވެ. އަދި، ޝުއައިބު އަލީއަށް ލިބިވަޑައިގެންފައިވަނީ 23 ވޯޓެވެ.
ފާހަގަކޮށްލެވޭ ގޮތުގައި މި އިންތިޚާބުގައި ވޯޓުލާން ނުކުތް މީހުންގެ އަދަދު މަދެވެ. އެހެންވެ، އިލެކްޝަންސް ކޮމިޝަން (އީސީ)ން ވެސް މީގެ ކުރިން ވަނީ ކަންބޮޑުވުން ފާޅުކުރައްވައިފައެވެ. ވޯޓުލުމުގެ ހައްގު 54،680 މީހުންނަށް ލިބިފައިވާއިރު ވޯޓުލާން ނުކުމެފައިވަނީ މަދު އިންސައްތައެކެވެ.
ދަނގެތިދާއިރާގެ މެންބަރު މުޙައްމަދު ނާޒިމްގެ ކޮއްކޮ އާޒިމަކީ ވަރަށް ހިންގުންތެރި ބޭފުޅެކެވެ. ނިމިދިޔަ ސަރުކާރުގެ ގިނަ ވައުދުތަކެއް ފުއްދެވުމަށްޓަކައި އެންމެ ގިނަ ޕްރޮޖެކްޓް ހިންގެވީ ސީދާ އާޒިމްގެ ބެލުމުގެ ދަށުންނެވެ. އާޒިމް އެމްޓީސީސީގައި އިސްކޮށް ހުންނަވައިގެން އެއް ފަހަރާ އެތައް މިލިއަން ރުފިޔާއެއްގެ ބޮޑެތި ޕްރޮޖެކްޓްތައް ހިންގެވިއެވެ.
އާޒިމް މީގެ ކުރިން ވަނީ އެސްޓީއޯއާއި އެމްޑަބްލިޔުއެސްސީގެ މެނޭޖިން ޑިރެކްޓަރުކަން ވެސް ކުރައްވައިފައެވެ.
މާލޭ ސިޓީގެ މޭޔަރުކަން ހުސްވެފައިވަނީ ކުރިން އެ މަގާމުގައި ހުންނެވި މިހާރުގެ ރައީސް ޑރ. މުހައްމަދު މުއިއްޒު ރިޔާސީ އިންތިޚާބު ކާމިޔާބު ކުރެއްވުމާ ގުޅިގެންނެވެ. އެ މަނިކުފާނު ވެރިކަމާ ހަވާލުވެވަޑައިގަތުމަށް ނޮބެމްބަރު 17 ގައި ވަނީ މޭޔަރުކަމުން އިސްތިއުފާ ދެއްވައިފައެވެ.
އޭގެ ފަހުން، މާލޭ ސިޓީ ކައުންސިލްގެ ތިން ދާއިރާއެއްގެ ކައުންސިލަރުން ވެސް ވަނީ ސަރުކާރުގެ ބައެއް މަގާމުތަކާ ހަވާލުވެވަޑައިގަންނަވަން މަގާމުން އިސްތިއުފާ ދެއްވައިފައެވެ.