13 Jan 2024, 17:00
ބައިނަލްއަގުވާމީ މެޑަލްތައް ހޯދޭ ފެންވަރަށް އެތުލީޓުން ތަމްރީނުކޮށްދިނުމަށް ޗައިނާއިން އެއްބަސްވެފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ޗައިނާގެ ރައީސް ޝީ ޖިންޕިންގެ ދައުވަތަކަށް އެ ގައުމަށް ވަޑައިގެންނެވުމަށްފަހު، އެނބުރި ރާއްޖެ ވަޑައިގެން ނޫސްވެރިންނާ ވާހަކަފުޅުދައްކަވަމުން ރައީސް ވިދާޅުވީ ކުޅިވަރުގެ ދާއިރާއިން ޗައިނާއިން ރާއްޖެއަށް އެހީވާން ނިންމާފައިވާ ކަމަށާއި އެގޮތުން ރާއްޖޭގެ އެކިއެކި ކުޅިވަރު އެސޯސިއޭޝަންތަކަށް އެހީތެރިކަން ދިނުމަށް ވެސް އެއްބަސްވެފައިވާ ކަމަށެވެ.
"އަދި ވަކިވަކި އެތުލީޓުން ޓްރެއިން ކުރުމަށްޓަކައި އެކި ކަހަލަ ފުރުސަތުތައް ދިނުމާއި، ކްލަބުތައް ތަރައްގީކުރުމަށް ކްލަބުތަކުން ފަރިތަކޮށް އިންޓަނޭޝަނަލް ފެންވަރުގެ މެޑަލްތައް ހޯދޭ ފެންވަރަށް ޗައިނާއަށް ގެންގޮސް ތަމްރީނުދިނުމާ ބެހޭ ހުރިހާ މަސައްކަތްތަކެއް ކުރުމަށް ޗައިނާއިން ހުށަހަޅައި އެކަމަށް އަޅުގަނޑުމެން އެއްބަސްވިން،" އެ މަނިކުފާނު ވިދާޅުވިއެވެ.
ރާއްޖޭގެ އެތުލީޓުންނަށް ތަމްރީނުވުމުގެ ފުރުސަތު ޗައިނާއިން ދޭން ނިންމާފައިވާ އިރު، ރާއްޖޭގައި އެންމެ އެކަށީގެންވާ ވަރަށް ތަމްރީނުކުރުމަށް ވަސީލަތްތައް ނެތް މައްސަލައަކީ އެތުލީޓުން އާންމުކޮށް ކުރަމުންދާ ޝަކުވާއެކެވެ. އެހެންކަމުން އެސޯސިއޭޝަންތަކުން އަދި ސަރުކާރުގެ ހަރަދުގައި ކުޅިވަރު މުބާރާތްތަކާ ދިމާކޮށް، މީގެ ކުރިން ވަނީ ގައުމުތަކަށް ތަމްރީނުތަކަށް ފޮނުވައިފައެވެ. ނަމަވެސް ދާއިމީ ގޮތެއްގައި އެކަން ކުރެވޭ ގޮތް ވަނީ ނުވެފައެވެ.
ކުޅިވަރު އެތުލީޓުންގެ އިތުރުން ކުޅިވަރު އެސޯސިއޭޝަންތަކާއި ކްލަބުތަކަށް ވެސް ވަނީ ވަރަށް ބޮޑަށް އެހީތެރިކަމަށް ބޭނުންވެފައެވެ. އެސޯސިއޭޝަންތަކާއި ކްލަބުތައް ހިންގުމަށް އެންމެ ބޮޑު އުނދަގުލަކާ ކުރިމަތިލާން ޖެހެނީ ފައިސާގެ ދަތިކަމާ ގުޅިގެންނެވެ.