14 Jan 2024, 09:08
ޑައިރެކްޓަރު އިލްޔާސް ވަހީދު (އިއްލެ)ގެ އައިފިލްމްސް ޕްރޮޑަކްޝަނުން އުފައްދާ ތިންވަނަ ފީޗާ ފިލްމު "ކަންބަޅި"ގެ އާ ޕޯސްޓަރުތަކެއް އާންމުކޮށްފިއެވެ.
އައިފިލްމްސްއިން މިދިޔަ އަހަރުގެ ފަހުކޮޅުގައި އިއުލާނުކޮށްފައިވާ ފިލްމުގެ މަސައްކަތް ވަަރަށް ހަލުވިކަމާ އެކު ކުރިއަށް ގެންގޮސް މިހާރު ދައްކަން ފެށުމަށް ވަނީ ގާތްވެފައެވެ.
އެއާއެކު ފިލްމުގެ ޕްރޮމޯޝަނަށް އަންނަނީ އެކި މަސައްކަތްތައް ކުރަމުންނެވެ. އެންމެފަހުން ވަނީ ފިލްމުގެ ކެރެކްޓަރުންގެ ޕޯސްޓަރުތަކެއް އާންމުކޮށްފައެވެ. އަދި ކެރެކްޓަރުންގެ ޕޯސްޓަރުތަކާއެކު ކެރެކްޓަރުންނަށް ކިޔާނެ ނަންތައް ވެސް ވަނީ ޕޯސްޓަރާއެކު ހާމަކޮށްފައެވެ.
އަލަށް އާންމުކުރި ޕޯސްޓަރުތަކުގައި ކޮންމެ ކެރެކްޓަރެއްގެ ނިތްކުރި މަތީގައި ކަންބަޅީގެ ދަޅައެއް އިނދެއެވެ.
ފިލްމުގެ ލީޑު ކާސްޓުގެ ގޮތުގައި ހިމެނެނީ އިއްލެގެ ހުރިހާ ފީޗާ ފިލްމުތަކުން ވެސް ލީޑުން ފެނިފައިވާ ނުޒުހަތު ޝުއައިބު (ނުޒޫ)އެވެ. ފިލްމުގެ އިތުރު ރޯލުތަކުން ދެން ފެންނާނީ އަހުމަދު އިފްނާޒުގެ އިތުރުން ޝަރަފް އަބްދުﷲ އާއި ވާޝިޔާ މުހައްމަދާއި ރަވީ ފާރޫގާއި މުހައްމަދު އިޝްފާނާއި ހާޒިފް މުހައްމަދާއި މޫސާ އަލީފެވެ.
ފިލްމުގެ ޓްރެއިލާތަކާއި ބައެއް ޓީޒާތައް އާންމުކޮށްފައިވާއިރު މި ފިލްމު ވެގެންދާނީ ބިރުވެރި ފިލްމަކަށެވެ.
މީގެ ކުރީން ވެސް އައިފިލްމްސްއިން ތުރިލާ ފަދަ ފިލްމުތައް ވަނީ ނެރެފައެވެ. ނަމަވެސް މިއީ އައިފިލްމްސްއިން ނެރޭ ފުރަތަމަ ބިރުވެރި ފިލްމެވެ. އެހެންވީމާ މިއީ އައިފިލްމްސްއަށް ތަފާތުވާނެ ފިލްމެއްކަން ޔަގީނެވެ.
އިއްލެގެ އިތުރުން ފިލްމުގެ ޑައިރެކްޝަނުގައި އިފްނާޒް ހަރަކާތްތެރިވާނެއެވެ. ފިލްމުގެ މިއުޒިކްގެ މަސައްކަތް ކުރާނީ ޝާހިދު ލެގަސީއެވެ. އަދި, ފިލްމްގެ ޕްރޮޑަކްޝަންގައި އިއްލެއާއި އާޝިމް އަލީ މަސައްކަތް ކުރާނެއެވެ. މި ފިލްމުގެ ޕޯސްޓް ޕްރޮޑަކްޝަންގެ މަސައްކަތް ކުރާނީ "އޯކޭޒް އިންކް" އިންނެވެ.
އަންނަ މަހުގެ އެއްވަނަ ދުވަހުން ފެށިގެން މި ފިލްމު އޮލިމްޕަހުގައި ދައްކަން ފެށުމަށް ވަނީ ހަމަޖެހިފައެވެ.
View this post on Instagram