13 Jan 2024, 16:19
ރާއްޖެއިން ޗައިނާއަށް ދައްކަންޖެހޭ ލޯނުތައް ދެއްކުމުގައި ކުރިއަށް އޮތް ފަސް އަހަރުތެރޭ ވީހާ ވެސް ލުއި ގޮތްތަކެއް ހޯދައިދޭނެ ކަމަށް ދެ ގައުމުގެ ދެމެދު އެއްބަސްވެފައިވާ ކަމަށާއި އެކަމާ ގުޅިގެން މަޝްވަރާތައް ވަރަށް އަވަހަށް ފަށަން ހަމަޖެހިފައިވާ ކަމަށް ރައީސުލްޖުމްޙޫރިއްޔާ ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ، ޗައިނާއަށް ކުރެއްވި ފުރަމާނަ ދަތުރުފުޅު ނިންމަވާލެއްވުމަށް ފަހު ރާއްޖެ ވަޑައިގެން ނޫސްވެރިންނާ ބައްދަލުކުރައްވާ ވެލާނާ އިންޓަނޭޝަނަލް އެއާޕޯޓުގައި ހުންނަވައެވެ.
އެ މަނިކުފާނު ވިދާޅުވީ އެ ދަތުރުފުޅުގައި ޗައިނާއަށް ދައްކަންޖެހޭ ލޯނު ދެއްކުމަށް ލުއި ގޮތްތަކެއް ހޯއްދަވައިދެއްވުމަށް އެ ގައުމުގެ ރައީސް ޝީ ޖިންޕިންގެ އަރިހުގައި އެދިވަޑައިގެންފައިވާނެ ކަމަށެވެ.
އެމަނިކުފާނު ވިދާޅުވީ މިހާރު ޗައިނާއަށް ދައްކަންޖެހޭ ލޯނުތަކަކީ ޑައިރެކްޓް ލޯނުތަކެއް ކަމަށެވެ. އެއާއެކު ދެ ގައުމު ދެމެދު ވެވުނު އެއްބަސްވުމުގެ ދަށުން ފަސް އަހަރު ދުވަހުގެ ތެރޭގައި ވީހާ ވެސް ލުއި ގޮތަކަށް އެ ލޯނުތަކުގެ ކަންތައް ހަމަޖެއްސޭނެ ގޮތްތަކެއް ދިރާސާކޮށް ކަނޑައެޅުމަށް ޓަކައި ވަރަށް އަވަހަށް ޗައިނާގެ ޓީމެއް ރާއްޖެ އައުމަށް ހަމަޖެހިފައިވާ ކަމަށް އެ މަނިކުފާނު ވިދާޅުވިއެވެ.
"ވަރަށް އަވަހަށް އެ ތަނުގެ [ޗައިނާގެ] ފިނޭންސް މިނިސްޓްރީއާ ފިނޭންސް ދާއިރާގެ ޓެކްނިކަލް ޓީމެއް ފޮނުއްވަވާނެ. އެކަން ވެސް ހަމަޖެހިގެން ދިޔަ،" ރައީސް ވިދާޅުވިއެވެ.
"އޭރުން އަޅުގަނޑުމެންނަށް ވަރަށް ބޮޑު ލުއިތަކެއް ލިބިގެން އެބަދޭ ލޯނުތައް ދެއްކުމުގަ ވެސް،" ރައީސް ވިދާޅުވިއެވެ.
އެ މަނިކުފާނު ވިދާޅުވީ ދެ ގައުމުގެ ދެމެދުގައި އެންމެ މަތީ ލެވަލްގައި އެ ކަމުގެ މަޝްވަރާތައް ކުރެވުނު ކަމަށެވެ.
ރާއްޖެއިން ޗައިނާއަށް ދައްކަންޖެހޭ ދަރަނީގެ އަދަދަކީ 1.52 ބިލިއަން ޑޮލަރެވެ.