13 Jan 2024, 15:30
ޗައިނާއިން 130 މިލިއަން އެމެރިކާ ޑޮލަރުގެ ހިލޭ އެހީ ހަމަޖެހިފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ޗައިނާއަށް ކުރެއްވި ފުރަމާނަ ދަތުރުފުޅު ނިންމަވައިލެއްވުމަށް ފަހުގައި ރައީސް މުއިއްޒު މިއަދު ވަނީ އެނބުރި މާލެ ވަޑައިގެންފައެވެ.
ޗައިނާއަށް ކުރެއްވި ތާރީޚީ ދަތުރުފުޅު ނިންމަވައިލެއްވުމަށް ފަހު ވެލާނާ އިންޓަނޭޝަނަލް އެއާޕޯޓުގައި ހުންނަވައި މީޑީއާތަކަށް ދެއްވި ސްޓޭޓްމަންޓެއްގައި ރައީސް ވިދާޅުވީ، ޗައިނާއިން 130 މިލިއަން އެމެރިކާ ޑޮލަރުގެ ހިލޭ އެހީ ހަމަޖެހިފައިވާ ކަމަށެވެ. އެ އެހީގެ ތެރެއިން އެންމެ ބޮޑު އަދަދެއް ހޭދަކުރާނީ މާލޭގެ މަގުތައް ހަދަން ކަމަށް އެ މަނިކުފާނު ވިދާޅުވިއެވެ.
"އެއީ ގާތްގަނޑަކަށް 130 މިލިއަން ޑޮލަރުގެ ހިލޭ އެހީ ވަނީ ހަމަޖެހިފައި. ރާއްޖޭގަ އަޅުގަނޑުމެން ކަނޑައަޅާ ތަރައްގީގެ މަޝްރޫތަކަށް ޚަރަދު ކުރަން. އޭގެ ތެރެއިން އެންމެ ބޮޑު އެއްޗެއް ޚަރަދު ކުރަން ކަނޑައެޅިފައިވަނީ މާލޭގެ މަގުތައް ހެދުމަށް،" ރައީސް ވިދާޅުވިއެވެ.
އެ ފައިސާ ބޭނުންކުރާނީ ސަރުކާރުން ކަނޑައަޅާ ތަރައްގީގެ އެކި މަޝްރޫތަކަށް ކަމަށް ވެސް ރައީސް ވަނީ ވިދާޅުވެފައެވެ.
ވިއްސާރަ ވެލާއިރަށް މިހާރު ވެސް މާލޭގެ މަގުތަކުގައި ފެންބޮޑުވެއެވެ. އަދި، ބައެއް މަގުތަކުގެ ފެންވަރު ހުރީ ވަރަށް ދަށް ކޮށެވެ.
މާލެއަށް މި ފަހުން ކުރި ވިއްސާރައިގައި އަސަރުކުރި ގެތަކަށް ޒިޔާރާތް ކުރެއްވުމަށް ފަހު މީގެ ކުރިން ނޫސްވެރިންނާ ބައްދަލުކުރައްވާ ވާހަކަ ދައްކަވަމުން ރައީސް ވަނީ، ފެން ބޮޑުވުމުގެ މައްސަލަ ހައްލުވާނީ މަލޭގެ މަގުތަށް ރަނގަޅު ފެންވަރުގައި ހަދައިގެން ކަމަށް ވިދާޅުވެފައެވެ.
ރައީސް ވިދާޅުވީ އެކަން ހައްލުވާނީ މާލޭގެ މަގުތަކުގައި ރަނގަޅު ސްޓޯމްވޯޓާ ނިޒާމެއް ގާއިމު ކުރެވިގެން ކަމަށެވެ.
ރައީސް މުއިއްޒުގެ ފުރަތަމަ ފުރަމާނަ ދަތުރުފުޅު ޗައިނާއަށް ކުރެއްވުމަށް ފަހުގައި އެނބުރި މާލެ ވަޑައިގެންނެވީ މިއަދުއެވެ. އެ މަނިކުފާނުގެ ދަތުރުފުޅުގައި ރާއްޖެއަށް ފައިދާހުރި 20 އެއްބަސްވުމެއްގައި ސޮއިކުރުމުގެ އިތުރުން ވެސް، މުހިއްމު ކަންކަމާ ގުޅޭ ގޮތުން ދެ ގައުމުގެ މެދުގައި ވަނީ ރަސްމީ މަޝްވަރާތައް ކުރައްވައިފައެވެ.
އެގޮތުން، ޗައިނާއިން ވަނީ ރާއްޖެއަށް 130 މިލިއަން ޑޮލަރުގެ ހިލޭ އެހީ ދޭން ނިންމައިފައެވެ. އަދި، ރާއްޖެއިން އެ ގައުމަށް ދައްކަން ޖެހިފައި އޮތް ދަރަނި ފަސް އަހަރަށް ފަސްކުރުމުގެ ރަސްމީ މަޝްވަރާތައް ވެސް ވަނީ ފަށައިފައެވެ.