13 Jan 2024, 15:14
އިންޓަނޭޝަނަލް ޓެނިސް ފެޑެރޭޝަން (އައިޓީއެފް) އޭޝިއާ ޗެމްޕިއަންޝިޕްގެ 14 އަހަރުންދަށުގެ އަންހެން ސިންގަލްސް ޗެމްޕިއަންކަން ރާއްޖޭގެ ނަބާ ނިޝާން ހޯދައިފިއެވެ.
ވިއެޓްނާމްގެ ހަނޯއީގައި ކުރިއަށްގެންދާ އައިޓީއެފް ޗެމްޕިއަންޝިޕްގެ ފައިނަލުގައި ނަބާ ހޯދި މޮޅާ އެކު އެއީ ޓެނިސްގައި ރާއްޖެއަށް ލިބުނު ތާރީޚީ ކާމިޔާބަކަށް ވަނީ ވެފައެވެ.
އެ މުބާރާތުގެ ފައިނަލަށް ނަބާ ދަތުރުކުރީ ސެމީ ފައިނަލުގައި ސްރީލަންކާގެ ހިރުންޑީ ދިޔުނުއާ ވާދަކޮށްގެންނެވެ. އެ މެޗު ފަސޭހަކަމާއެކު 6-1 އަދި 6-3ގެ ނަތީޖާއަކުން ނަބާ ވަނީ ކާމިޔާބުކޮށްފައެވެ.
އިއްޔެ ކުޅުނު ފައިނަލުގައި ވެސް ނަބާ ނުކުތީ ސްރީލަންކާގެ ކުޅުންތެރިޔަކާ ދެކޮޅަށެވެ. ލަންކާގެ އަންނަޔާ ނޯބެޓްއާ ދެކޮޅަށް ކުޅުނު އެ މެޗު ވެސް ފަސޭހަކަމާ އެކު 6-1 އަދި 6-0ގެ ނަތީޖާއަކުން ނަބާ ވަނީ ކާމިޔާބުކޮށްފައެވެ.
އެ މުބާރާތުގައި ރާއްޖެއިން ވާދަކުރަނީ ދެ ފިރިހެން ކުޅުންތެރިންނާއި ދެ އަންހެން ކުޅުންތެރިންނެވެ. އެއީ، ނަބާ ނިޝާންގެ އިތުރުން މަންހާ މުހައްމަދު އަލީއާއި އާދަމް އާލް ނިޔާޒް އަދި މީކާ މުހައްމަދު ކަލީމެވެ.
އައިޓީއެފުން އިންތިޒާމުކޮށްގެން ކޮންމެ އަހަރަކު ބާއްވާ އެ މުބާރާތުގައި ރާއްޖޭގެ އިތުރުން ވިއެޓްނާމް، ބޫޓާން، ސްރީލަންކާ، ކެމްބޯޑިއާ، ލާއޯސް، މޮންގޯލިއާ އަދި ބުރުނާއީ ހިމެނޭހެން ޖުމުލަ އަށް ގައުމަކުން ވާދަކުރެއެވެ. އެ މުބާރާތުގައި ސިންގަލްސް އަދި ޑަބަލްސް ހިމެނޭހެން ވަކިވަކި މެޗުތަކުން އެންމެ މަތިން ރޭންކު ކުރެވޭ ދެ ގައުމަށް ފައިނަލް ބުރުން ޖާގަ ލިބިގެންދާނެއެވެ. ފައިނަލް ބުރު ކުޅުމަށް ހަމަޖެހިފައިވަނީ އަންނަ އޭޕްރީލް މަހު އިންޑިއާގައެވެ.
އެ މުބާރާތުގައި ވާދަކުރާ ރާއްޖޭގެ ކުޅުންތެރިން އެނބުރި ގައުމަށް އައުމަށް ހަމަޖެހިފައިވަނީ މި މަހުގެ 20 ވަނަ ދުވަހުއެވެ.