13 Jan 2024, 13:59
މާލޭ ސިޓީގެ ހުސްވެފައިވާ މޭޔަރު ކަމާއި، މާފަންނު ދެކުރު ދާއިރާ، މެދުހެންވޭރު ދާއިރާ، ހެންވޭރު ދެކުނު ދާއިރާގެ ކައުންސިލް މެންބަރު އިންތިޚާބުކުރަން ބާއްވާ ބައި އިލެކްޝަންގެ ވޯޓުލުން މިއަދު ހެނދުނު 8:00 ގައި ފަށައިގެން ކުރިއަށްދާއިރު މެންދުރު 1:00 އާ ހަމައަށް ވެސް 85.92 އިންސައްތަ މީހުން ވޯޓުނުލައި ކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަން (އީސީ)ން ވަނީ މިއަދު ވިއްސާރަވުމުގެ ސަބަބުން ވޯޓުލުން ހެނދުނު 8:00 އިން ފެށިގެން ހަވީރު 5:00 އާ ހަމައަށް ކުރިއަށް ގެންދަން ނިންމައިފައެވެ.
ވޯޓުލުން ހެނދުނު 8:00 އިން ފެށިގެން ކުރިއަށްދާއިރު އީސީން އާންމު ކުރި އެންމެ ފަހުގެ ތަފާސްހިސާބުތައް ދައްކާގޮތުން 1:00އާ ހަމައަށް ވޯޓުލާފައިވަނީ 7،883 މީހުންނެވެ. އެއީ، ވޯޓުލުމުގެ ހައްގު ލިބިގެންވާ 56،002 މީހުންގެ ތެރެއިން 14.08 އިންސައްތަ މީހުންނެވެ.
އީސީގެ ނައިބު ރައީސް އިސްމާއީލް ހަބީބު މިއަދު ހެނދުނު "ސަން"އަށް ވިދާޅުވީ، އާންމު ގޮތެއްގައި ބައި އިލެކްޝަންތަކުގައި ވޯޓުލާން ނުކުންނަނީ 40 ޕަސެންޓް މީހުން ކަމަށެވެ. އެހެންކަމުން އުންމީދުކުރައްވަނީ ކުރިއަށް ހުރި ވަގުތުތަކުގައި ވޯޓުލާ މީހުންގެ އަދަދު 30 ޕަސެންޓުން މަތިވާނެކަމަށް ކަމުގައި ހަބީބު ވިދާޅުވިއެވެ.
"އަޅުގަނޑުމެންނަށް އުންމީދު ކުރެވެނީ މެންދުރުފަހުން މީހުން އަންނާނެކަމަށް،" އޭނާ ވިދާޅުވިއެވެ.
އޭނާ ވިދާޅުވީ، އާންމު ގޮތެއްގައި މީހުން ވޯޓުލާން ނުކުންނަނީ މެންދުރުފަހުން ކަމަށެވެ. އެހެންކަމުން އެ ވަގުތު މީހުން އިތުރުވާނެކަމަށް ބެލެވޭކަމަށް ވެސް އޭނާ ވިދާޅުވިއެވެ.
މާލޭ ސިޓީގެ މޭޔަރުކަން ހުސްވެފައިވަނީ ކުރިން އެ މަގާމުގައި ހުންނެވި މިހާރުގެ ރައީސް ޑރ. މުހައްމަދު މުއިއްޒު ރިޔާސީ އިންތިޚާބު ކާމިޔާބު ކުރެއްވުމާ ގުޅިގެންނެވެ. އެ މަނިކުފާނު ވެރިކަމާ ހަވާލުވެވަޑައިގަތުމަށް ނޮބެމްބަރު 17 ގައި ވަނީ މޭޔަރުކަމުން އިސްތިއުފާ ދެއްވައިފައެވެ.
އޭގެ ފަހުން، މާލޭ ސިޓީ ކައުންސިލްގެ ތިން ދާއިރާއެއްގެ ކައުންސިލަރުން ވެސް ވަނީ ސަރުކާރުގެ ބައެއް މަގާމުތަކާ ހަވާލުވެވަޑައިގަންނަވަން މަގާމުން އިސްތިއުފާ ދެއްވައިފައެވެ. އެހެންވެ، އެ ދާއިރާތަކަށް ކައުންސިލަރުން އިންތިޚާބުކުރުން ވެސް މިއަދު އޮންނާނެއެވެ.
މިއަދުގެ ވޯޓުލުން މިއަދު ހަވީރު 4:00 އާ ޖެހެންދެން ކުރިއަށް ގެންދަން ކުރިން ނިންމާފައި އޮތް ނަމަވެސް، މާލެއަށް އިއްޔެ ވަރަށް ގިނައިން ވިއްސާރަކުރުމުގެ ސަބަބުން ރޭ އީސީން ވަނީ ވޯޓުލުން މިއަދުގެ ހަވީރު 5:00 އާ ހަމައަށް ކުރިއަށް ގެންދަން ނިންމައިފައެވެ.
މާލޭގެ މޭޔަރުކަމަށް މި އިންތިޚާބުގައި ފަސް ކެންޑިޑޭޓުން ވާދަކުރައްވައެވެ. އެއީ،
ޝުއައިބު އަލީ (ފުރަހަނި) - އަމިއްލަ ގޮތުން
- ހުސައިން ވަހީދު - ޕީއެންއެފްގެ ތާއީދާއެކު އަމިއްލަ ގޮތުން
- މުހައްމަދު ސައިފް ފާތިހު - ދަ ޑިމޮކްރެޓްސް
- އާދަމް އާޒިމް - އެމްޑީޕީ
- އާއިޝަތު އާޒިމާ ޝަކޫރު - ޕީއެންސީ