13 Jan 2024, 12:20

މާލެއަށް މޭޔަރަކު ހޮވުމަށް ބާއްވާ ބައި އިލެކްޝަނަށް އަދި މިހާތަނަށް މާ ބޮޑު ތަރުހީބެއް ލިބިފައިނުވާ ކަމަށާއި ވޯޓު ލީ އެންމެ ހަތް ޕަސެންޓް މީހުން ކަމަށް އިލެކްޝަންސް ކޮމިޝަނުން ދެންމެ ބުނެފިއެވެ.

އެ ކޮމިޝަންގެ ނައިބު ރައީސް އިސްމާއީލް ހަބީބު "ސަން"އަށް ވިދާޅުވީ، މިހާތަނަށް ވޯޓުލީ 4،000 އެއްހައި މީހުން ކަމަށެވެ. އެއީ, އަދި މަދު އަދަދެއް ކަމަށް ވިދާޅުވިއެވެ.

"އަޅުގަނޑުމެންނަށް އުންމީދު ކުރެވެނީ މެންދުރުފަހުން މީހުން އަންނާނެކަމަށް،" އޭނާ ވިދާޅުވިއެވެ.

ހަބީބު ވިދާޅުވީ އާންމު ގޮތެއްގައި ބައި އިލެކްޝަންތަކުގައި ވޯޓުލާން ނުކުންނަނީ 40 ޕަސެންޓް މީހުން ކަމަށެވެ. އެހެންކަމުން އުންމީދުކުރައްވަނީ ކުރިއަށް ހުރި ވަގުތުތަކުގައި ވޯޓުލާ މީހުންގެ އަދަދު 30 ޕަސެންޓުން މަތިވާނެކަމަށް ކަމުގައި ހަބީބު ވިދާޅުވިއެވެ.

އޭނާ ވިދާޅުވީ، އާންމު ގޮތެއްގައި މީހުން ވޯޓުލާން ނުކުންނަނީ މެންދުރުފަހުން ކަމަށެވެ. އެހެންކަމުން ވަގުތު މީހުން އިތުރުވާނެކަމަށް ބެލެވޭކަމަށް ވެސް އޭނާ ވިދާޅުވިއެވެ.

އީސީން ވަނީ މިއަދު ވިއްސާރަވުމުގެ ސަބަބުން ވޯޓުލުން ހެނދުނު 8:00 އިން ފެށިގެން ހަވީރު 5:00 އާ ހަމައަށް ކުރިއަށް ގެންދަން ނިންމައިފައެވެ.

އިންތިޚާބުގެ ވޯޓުލުން މިހާރު ވަނީ ފަށައިފައެވެ. މި އިންތިޚާބުގައި ވޯޓުދިނުމުގެ ހައްގު 54,680 އަށްވުރެ ގިނަ މީހުންނަށް ލިބެއެވެ. ވޯޓުލާތަން ޗެކް ކުރުމަށް VR (space) NID ޖެއްސުމަށްފަހު 1414 އަށް އެސްއެމްއެސް ކުރުމަށް އީސީން އެދެއެވެ.

މާލޭ ސިޓީގެ މޭޔަރުކަން ހުސްވެފައިވަނީ ކުރިން އެ މަގާމުގައި ހުންނެވި މިހާރުގެ ރައީސް ޑރ. މުހައްމަދު މުއިއްޒު ރިޔާސީ އިންތިޚާބު ކާމިޔާބު ކުރެއްވުމާ ގުޅިގެންނެވެ. އެ މަނިކުފާނު ވެރިކަމާ ހަވާލުވެވަޑައިގަތުމަށް ނޮބެމްބަރު 17 ގައި ވަނީ މޭޔަރުކަމުން އިސްތިއުފާ ދެއްވައިފައެވެ.

އޭގެ ފަހުން، މާލޭ ސިޓީ ކައުންސިލްގެ ތިން ދާއިރާއެއްގެ ކައުންސިލަރުން ވެސް ވަނީ ސަރުކާރުގެ ބައެއް މަގާމުތަކާ ހަވާލުވެވަޑައިގަންނަވަން މަގާމުން އިސްތިއުފާ ދެއްވައިފައެވެ. އެހެންވެ، އެ ދާއިރާތަކަށް ކައުންސިލަރުން އިންތިޚާބުކުރުން ވެސް މިއަދު އޮންނާނެއެވެ.

މިއަދުގެ ވޯޓުލުން މިއަދު ހަވީރު 4:00 އާ ޖެހެންދެން ކުރިއަށް ގެންދަން ކުރިން ނިންމާފައި އޮތް ނަމަވެސް، މާލެއަށް އިއްޔެ ވަރަށް ގިނައިން ވިއްސާރަކުރުމުގެ ސަބަބުން ރޭ އީސީން ވަނީ ވޯޓުލުން މިއަދުގެ ހަވީރު 5:00 އާ ހަމައަށް ކުރިއަށް ގެންދަން ނިންމައިފައެވެ.

މާލޭގެ މޭޔަރުކަމަށް މި އިންތިޚާބުގައި ފަސް ކެންޑިޑޭޓުން ވާދަކުރައްވައެވެ. އެއީ،

  • ޝުއައިބު އަލީ (ފުރަހަނި) - އަމިއްލަ ގޮތުން

  • ހުސައިން ވަހީދު - ޕީއެންއެފްގެ ތާއީދާއެކު އަމިއްލަ ގޮތުން
  • މުހައްމަދު ސައިފް ފާތިހު - ދަ ޑިމޮކްރެޓްސް
  • އާދަމް އާޒިމް - އެމްޑީޕީ
  • އާއިޝަތު އާޒިމާ ޝަކޫރު - ޕީއެންސީ