14 Jan 2024, 00:09
އެންބީއޭ ބާސްކެޓްބޯޅަ މުބާރާތުގައި އެންމެ ފަހުގެ ޗެމްޕިއަން ޑެންވާ ނަގެޓްސް އާއި ނިއުއޯލިއަންސް ޕެލިކަންސް ބައްދަލުކުރި މެޗު ނަގެޓްސް ކާމިޔާބު ކޮށްފިއެވެ.
ޑެންވާގެ ބޯލް އެރީނާގައި ކުޅުނު މިމެޗު ނަގެޓްސް ކާމިޔާބު ކޮށްފައިވަނީ 125 ޕޮއިންޓް 113 ޕޮއިންޓުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނުނު އެ މެޗުގައި ނަގެޓްސްގެ ނިކޮލާ ޔޮކިޗްވަނީ 27 ޕޮއިންޓް ހޯދައިދީ 10 ރީބައުންޑް ނަގައިދީ 14 އެސިސްޓް ކޮށް މިމެޗުގައި ޓްރިޕްލް ޑަބަލްއެއް ހަދާފައެވެ. އަދި ޕެލިކަންސްއަށް އެންމެ ރަނގަޅު ކުޅުމެއް ދެއްކީ 30 ޕޮއިންޓް ހޯދައިދީ ހަ ރީބައުންޑް ނަގައިދީ ފަސް އެސިސްޓް ދިން ޒިއޮން ވިލިއަމްސަންއެވެ.
މިމުބާރާތުގައި މިނެސޯޓާ ޓިމްބާވުލްވްސް އާއި ޕޯޓްލަންޑް ޓްރެއިލް ބްލޭޒާސް ބައްދަލުކުރިމެޗު 116 ޕޮއިންޓް 93 ޕޮއިންޓުން ކާމިޔާބު ކޮށްފައިވަނީ ޓީމްބާވުލްވްސްއެވެ. މިމެޗުގައި ވުލްވްސްގެ ރޫޑީ ގޮބާޓްވަނީ 24 ޕޮއިންޓް ހޯދައިދީ 17 ރީބައުންޑް ނަގައިދީފައެވެ. އަދި ޓްރެއިލް ބްލޭޒާސްއަށް އެންމެ ރަނގަޅު ކުޅުމެއް ދެއްކީ 17 ޕޮއިންޓް ހޯދައިދީ 13 ރީބައުންޑް ނަގައިދީ ތިން އެސިސްޓް ދިން ޖަބާރީ ވޯކާއެވެ. މީގެއިތުރުން ލޮސް އެންއެންޖަލިސް ކްލިޕާސް އާއި މެމްފިސް ގްރިޒްލީސް ބައްދަލުކުރި 128 ޕޮއިންޓް 119 ޕޮއިންޓުން ކާމިޔާބު ކޮށްފައިވަނީ ކްލިޕާސްއެވެ. މިމެޗުގައި ކްލިޕާސްގެ ޕޯލް ޖޯޖްވަނީ 37 ޕޮއިންޓް ހޯދައިދީ ތިން ރީބައުންޑް ނަގައިދީ އެއް އެސިސްޓް ކޮށްފައެވެ. އަދި ގްރިޒްލީސްއަށް އެންމެ ރަނގަޅު ކުޅުމެއް ދެއްކީ 20 ޕޮއިންޓް ހޯދައިދީ ނުވަ ރީބައުންޑް ނަގައިދީ ދެ އެސިސްޓް ދިން ޒާވިއޭ ޓިލްމަންއެވެ.
މިމުބާރާތުގައި ކުޅުނު އެހެން މެޗުތަކަށް ބަލާލާއިރު ހިއުސްޓަން ރޮކެޓްސް އާއި ޑެޓްރޮއިޓް ޕިސްޓަންސް ބައްދަލުކުރިމެޗު 112 ޕޮއިންޓް 110 ޕޮއިންޓުން ރޮކެޓްސް ކާމިޔާބު ކުރިއިރު އިންޑިއާނާ ޕޭސާސް އާއި އެޓްލާންޓާ ހޯކްސް ބައްދަލުކުރި މެޗު 126 ޕޮއިންޓް 108 ޕޮއިންޓުން ކާމިޔާބު ކޮށްފައިވަނީ ޕޭސާސްއެވެ. ފިލަޑެލްފިއާ ސެވަންޓީ ސިކްސާސް އާއި ސެކްރެމެންޓޯ ކިންގްސް ބައްދަލުކުރި މެޗު 112 ޕޮއިންޓް 93 ޕޮއިންޓުން ސިކްސާސް ކާމިޔާބު ކޮށްފައިވާއިރު ސެން އެންޓޯނިއޯ ސްޕާސް އާއި ޗާލޮޓް ހޯނެޓްސް ބައްދަލުކުރި މެޗު 135 ޕޮއިންޓް 99 ޕޮއިންޓުން ކާމިޔާބު ކޮށްފައިވަނީ ސްޕާސްއެވެ.
މީގެއިތުރުން ގޯލްޑަން ސްޓޭޓް ވޮރިއާސް އާއި ޝިކާގޯ ބުލްސް ބައްދަލުކުރި މެޗު 140 ޕޮއިންޓް 131 ޕޮއިންޓުން ވޮރިއާސް ކާމިޔާބު ކޮށްފައިވާއިރު މައޭމީ ހީޓް އާއި އޯލާންޑޯ މެޖިކް ބައްދަލުކުރިމެޗު 99 ޕޮއިންޓް 96 ޕޮއިންޓުން ކާމިޔާބު ކޮށްފައިވަނީ ހީޓްއެވެ. އަދި ޔޫޓާ ޖޭޒް އާއި ޓޮރޮންޓޯ ރެޕްޓާސް ބައްދަލުކުރި މެޗު 145 ޕޮއިންޓް 113 ޕޮއިންޓުން ކާމިޔާބު ކޮށްފައިވަނީ ޖޭޒްއެވެ.