13 Jan 2024, 11:53
ސްޕެނިޝް ލަލީގާގައި އަލަވޭޒް އާއި ސެވިއްޔާ ބައްދަލުކުރި މެޗު އަލަވޭޒްއިން ކާމިޔާބު ކޮށްފިއެވެ.
ސެވިއްޔާގެ ދަނޑުގައި ކުޅުނު މި މެޗު އަލަވޭޒް ކާމިޔާބު ކޮށްފައިވަނީ އެންމެ ފަހު ވަގުތު ކާމިޔާބު ކުރި ލަނޑަކާއެކު ތިން ލަނޑު ދެ ލަނޑުންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސެވިއްޔާއިންނެވެ. ނަމަވެސް މި މެޗުގެ ދެ ހާފު ވެގެންދިޔައީ ދެ ޓީމުގެ ދެ ހާފަކަށެވެ.
މިގޮތުން ފުރަތަމަ ހާފުގައި އަލަވޭޒްއިން މޮޅަށް ކުލުނުއިރު ދެވަނަ ހާފުގައި މޮޅަށް ކުޅެފައިވަނީ ސެވިއްޔާއިންނެވެ. މި މެޗުގެ ފުރަތަމަ ލަނޑު މެޗުގެ 26 ވަނަ މިނެޓްގައި ޖަހާ ލީޑު ނަގާފައިވަނީ އަލަވޭޒްއިންނެވެ. މި ލަނޑު އެ ޓީމަށް ކާމިޔާބު ކޮށްދިނީ ނަހުއެލް ޓެނަގްލިއާއެވެ. އަދި މެޗުގެ 40 ވަނަ މިނެޓްގައި ކީކޭ ގާސިއާ ކާމިޔާބު ކުރި ލަނޑާއެކު އަލަވޭޒްއިން ވަނީ އެޓީމުގެ ލީޑު ފުޅާކޮށްފައެވެ.
މި ހާފުގައި ސެވިއްޔާއަށް ލަނޑު ޖަހާނެ ފުރުސަތު ލިބުނު ނަމަވެސް ލަނޑެއް ކާމިޔާބު ކުރެވޭގޮތެއް ނުވިއެވެ. މިމެޗުގެ ދެވަނަ ހާފަށް ސެވިއްޔާ ނިކުތީ ފުރަތަމަ ހާފަށް ވުރެ ވަރުގަދަ ކޮށެވެ. މިގޮތުން މެޗުގެ 70 ވަނަ މިނެޓްގައި ރަފާ މީރު ވަނީ ލަނޑެއް ޖަހާ ދެޓީމުގެ ދެމެޗުގައިވާ ފަރަގު އެއް ލަނޑަށް ކުޑަކޮށްފައެވެ. އަދި މެޗު ނިމެން 8 މިނެޓަށް ވެފައިވަނިކޮށް ސެވިއްޔާއިން މެޗުގެ ނަތީޖާ ހަމަހަމަ ކުރީ ލިބުނު ޕެނަލްޓީ އަކުންނެވެ.
މި ޕެނަލްޓީ އެ ޓީމަށް ކާމިޔާބު ކޮށްދިނީ ލޫކަސް އޮކަމްޕޯސްއެވެ. މި ލަނޑާއެކު މިމެޗު ސެވިއްޔާ ކާމިޔާބު ކޮށް ނުވަތަ އެއްވަރު ވެގެން ނިމިދާނެކަމަށް ހީވި ނަމަވެސް ގިނަ ބަޔަކު ހީކުރި ގޮތާ ހިލާފަށް ދެން ފެނިގެންދިޔައީ މެޗުގެ 90 ވަނަ މިނެޓްގައި އަލަވޭޒް މި މެޗުން މޮޅުވި ލަނޑު ކާމިޔާބު ކުރި ތަނެވެ. މި ލަނޑު އެ ޓީމަށް ކާމިޔާބު ކޮށްދިނީ ރުބެން ޑުއާޓޭއެވެ.
މި ކާމިޔާބީއާއެކު އަލަވޭޒް މިހާރު އުޅެނީ 20 މެޗުން ލިބިފައިވާ 20 ޕޮއިންޓާއެކު ތާވަލްގެ 13 ވަނައިގައެވެ. އަދި ސެވިއްޔާ އުޅެނީ 16 ޕޮއިންޓާއެކު ތާވަލްގެ 16 ވަނައިގައެވެ.