13 Jan 2024, 11:49
އިނގިރޭސި ޕްރިމިއާ ލީގުގައި ރެލިގޭޝަނުން ސަލާމަތްވުމަށް މަސައްކަތް ކުރަމުންދާ ދެ ޓީމު ކަމަށްވާ ބާންލީއާއި ލޫޓަން ޓައުން ބައްދަލުކުރި މެޗު އެއްވަރުވެއްޖެއެވެ.
ބާންލީގެ ދަނޑުގައި ކުޅުނު މި މެޗު ނިމުނީ 1-1 އިން ދެ ޓީމު އެއްވަރު ވެގެންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާއުފައްދާފައިވަނީ ލޫޓަންއިންނެވެ. ދެ ޓީމުގެ ފަރާތުން ވަރަށް ހަމަހަމަ ކުޅުމެއް ފެނިގެންދިޔައިރު ފުރަތަމަ ހާފުގައި ދެ ޓީމަށް ވެސް ލަނޑު ޖަހާނެ ރަނގަޅު ފުރުސަތު ދެ ޓީމަށް ވެސް ލިބި ބޭކާރު ވެގެންދިޔަ ތަން ފެނިގެންދިޔައެވެ.
މެޗުގެ ފުރަތަމަ ލަނޑު ޖަހާ މެޗުގެ ލީޑު ނަގާފައިވަނީ ބާންލީންނެވެ. މި ލަނޑު މެޗުގެ 36 ވަނަ މިނެޓުގައި އުފެއްދި ހަމަލާއެއްގައި ކާމިޔާބު ކޮށްދީފައިވަނީ ޒެކީ އަމްދޫނީއެވެ. މި ލަނޑާއެކު ބާންލީން ބޮޑަށް ޑިފެންސަށް އިސްކަން ދީގެން މި ލީޑުގައި އޮވެ މެޗު ނިންމައިލެވޭތޯ މަސައްކަތް ކުރި ނަމަވެސް މެޗުގެ އިތުރު ވަގުތުގެ ދެވަނަ މިނެޓުގައި ލޫޓަންގެ ކާލްޓާން މޮރިސް ޖެހި ލަނޑާ އެކު މެޗުގެ ނަތީޖާ ހަމަހަމަ ވެގެން ދިޔައެވެ. މި ލަނޑު ޖެހި ވަގުތު ލޫޓާންގެ ފޯވަޑް އެލިޖާ އަޑެބަޔޯ ބަންލީގެ ކީޕާ ޖޭމްސް ޓްރަފޯޑަށް ހުރަސް އަޅާފައިވާކަމަށް ބުނެ ބާންލީއިން މައްސަލަ ޖެއްސި ނަމަވެސް ވިއޭއާރުން ވަރަށް ގިނައިރު ބެލުމަށް ފަހު ވަނީ ރެފްރީގެ ނިންމުމަށް ތާއީދު ކޮށްފައެވެ.
މެޗު އެއްވަރު ވުމުން ބާންލީ މިހާރު އޮތީ 21 މެޗުން ލިބިފައިވާ 12 ޕޮއިންޓާ އެކު ތާވަލުގެ 19 ވަނައިގައެވެ. އަދި، ލޫޓަން އޮތީ 16 ޕޮއިންޓާ އެކު ތާވަލުގެ 18 ވަނައިގައެވެ.