13 Jan 2024, 21:50
ޖަރުމަނު ބުންޑަސްލީގާގައި އެންމެ ފަހުގެ ޗެމްޕިއަން ބަޔޭން މިޔުނިކާއި އެއިޓީން ނައިޓީ ނައިން ހޯފެންހައިމް ބައްދަލުކުރި މެޗު ބަޔޭން ކާމިޔާބު ކޮށްފިއެވެ.
ބަޔޭންގެ ދަނޑުގައި ކުޅުނު މިމެޗު އެޓީމް ކާމިޔާބު ކޮށްފައިވަނީ ތިން ލަނޑު ސުންލަނޑުންނެވެ. މިމެޗު ފެށުމުގެ ކުރިން ބަޔޭންއިން ވަނީ ވަރަށް ފަހުން މަރުވި އެޓީމްގެ ކުރީގެ ތަރި ފްރާންޒް ބެކެންބައުއާގެ ހަނދާން އާކޮށް އޭނާއަށް އިހްތިރާމް އަދާކޮށްފައެެވެ. މިގޮތުން މިމެޗު ފެށުމުގެ ކުރިން ޓީމްގެ ހުރިހާ ކުޅުންތެރިން ވޯމްއަޕް ކޮށްފައިވަނީ ބެކެންބައުއާ އާންމުކޮށް ލީ ފަސް ނަންބަރު ޖާޒީ ޖަހާފައިވާ ޖާޒީލައިގެންނެވެ. އަދި މެޗު ކުޅުނު ޖާޒީގެ ކުރިމަތީވެސް ވަނީ ކަންޑާ ފްރާންޒް ޖަހާފައެވެ.
ދެޓީމްގެ ފަރާތުން ވާދަވެރި ކުޅުމެއް ފެނުނު މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބަޔޭންއިންނެވެ. މިމެޗުގައި ބަޔޭންއިން ކާމިޔާބު ކުރި ފުރަތަމަ ލަނޑު މެޗުގެ 18 ވަނަ މިނެޓްގައި އެޓީމަށް ކާމިޔާބު ކޮށްދިނީ ޖަމާލް މުސިއެލާއެވެ.
ބަޔޭންއިން މެޗުގެ ކުރީކޮޅު ލަނޑެއް ޖެހި ނަމަވެސް މިމެޗުގައި އެޓީމަށް އެންމެ މޮޅު ކުޅުން ދެއްކޭ ގޮތެއްނުވިއެވެ. މިގޮތުން ލިބުނު ގިނަ ފުރުސަތުތަކެއް ވަނީ ބޭކާރު ވެފައެވެ. މީގެތެރޭގައި އެޓީމަށް މިސީޒަންގައި އެންމެ ގިނަ ލަނޑު ޖަހާދީފައިވާ ހެރީ ކޭން ވެސް ހިމެނެއެވެ. މިމެޗުގައި ބަޔޭން އިން ކާމިޔާބުކުރި ދެވަނަ ލަނޑު މެޗުގެ 70 ވަނަ މިނެޓްގައި ޖަހާދިނީވެސް ފުރަތަމަ ލަނޑު ޖަހައިދިން މުސިއެލާއެވެ. މިލަނޑު ޖެހިތާ ހަތަރު މިނެޓް ފަހުން ހޯފެންހައިމްގެ ގްރީޗާ ޕްރޮމެލްއަށް ވަނީ ދެވަނަ ރީނދޫ ކާޑާއެކު ރަތް ކާޑު ދައްކާފައެވެ.
މިމެޗުގައި ބަޔޭންގެ ފަހު ލަނޑު މެޗުގެ ފަހު މިނެޓްގައި އެޓީމަށް ކާމިޔާބު ކޮށްދިނީ ކޭންއެވެ. މިއީ މިސީޒަންގައި ބުންޑަސްލީގާގައި އޭނާ ކާމިޔާބުކުރި 22 ވަނަ ލަނޑެވެ.
މިކާމިޔާބީއާއެކު ބާޔެން މިހާރު އުޅެނީ ކުޅުނު 16 މެޗުން ލިބިފައިވާ 41 ޕޮއިންޓާއެކު ތާވަލްގެ ދެ ވަނައިގައެވެ. ތާވަލްގެ އެއްވަނައިގައި އުޅެނީ 42 ޕޮއިންޓާއެކު ބަޔާ ޒީރޯ ފޯ ލެވަކޫސެންއެވެ. އަދި ހޯފެންހައިމް އުޅެނީ 17 މެޗުން ލިބިފައިވާ 24 ޕޮއިންޓާއެކު ތާވަލްގެ ހަތް ވަނައިގައެވެ.