13 Jan 2024, 09:54
ފާއިތުވި 24 ގަޑިއިރު ތެރޭ، އެންމެ ގިނައިން ވާރޭ ވެހުނީ މާލޭ ސިޓީއަށް ކަމަށް މޫސުމާ ބެހޭ ގައުމީ އިދާރާ (މެޓު) އޮފީހުން މިއަދު ބުނެފިއެވެ.
އިއްޔެގެ ފަތިހުން ފެށިގެން މާލެއަށް ބޯކޮށް ވާރޭ ވެހުމުގެ ސަަބަބުން ބައެއް މަގުތަކުގައި ފެން ބޮޑުވިއެވެ. އަދި ބައެއް ގޭގެއަށް ފެން ވަދެ، މުދަލަށް ވެސް ވަނީ ގެއްލުންވެފައެވެ.
މެޓު އޮފީހުން އާންމު ކުރި ތަފާސްހިސާބުތައް ދައްކާގޮތުގައި، އެންމެ ގިނައިން ވާރޭވެހުނީ މާލެއަށެވެ. އެއީ، 159.3 މިލިމީޓަރުގެ ވާރެއެވެ.
ވިއްސާރައިގެ ސަބަބުން އަށް ގެއެއްގެ 57 މީހުންނަށް ވަގުތީ ހިޔާވަހިކަން ފޯރުކޮށްދީފައިވާ ކަަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)އިން ރޭ ވަނީ ބުނެފައެވެ.
އެންޑީއެމްއޭއިން ބުނީ، އިއްޔެ ކުރި ވިއްސާރައިގެ ސަބަބުން 144 ގެއަކުން ގުޅައި އެހީތެރިކަމަށް އެދިފައިވާ ކަމަށެވެ. އޭގެ ތެރެއިން ރެއާ ހަމައަށް 132 ގެއަކަށް އެހީތެރިކަން ފޯރުކޮށްދެވިފައިވާ ކަމަށާއި ފެންވަނުން ކުޑަކުރުމަށް 91 ގެއެއްގައި ވެލި ބަސްތާ ޖަހާފައިވާ ކަމަށެވެ.
މާލޭގެ އިތުރުން ދެން އެންމެ ގިނައިން ވާރޭ ވެހިފައިވަނީ ހުޅުމާލެ އަދި ހުޅުލެއަށެވެ. ހުޅުމާލެއަށް 105.4 މިލިމީޓަރުގެ ވާރޭ ވެހިފައިވާއިރު، ހުޅުލެއަށް ވެހިފައިވަނީ 143.4 މިލިމީޓަރުގެ ވާރޭއެވެ.
މެޓު އޮފީހުން އާންމު ކުރި މައުލޫމާތުން ދައްކާގޮތުގައި އިއްޔެ އެންމެ ގިނައިން ވާރޭ ވެހިފައިވަނީ މެދު ރާއްޖެތެރޭގެ އަތޮޅުތަކަށެވެ. އެގޮތުން ކ. ކާށިދޫއަށް ވެސް 68.3 މިލިމީޓަރުގެ ވާރޭ ވެހުނެވެ. އަދި، އދ. މާމިގިއްޔަށް 62.5 މިލިމީޓަރުގެ ވާރޭ ވެހިފައިވާއިރު، އއ. ތޮއްޑޫއަށް ވެސް ވަނީ 54.6 މިލިމީޓަރުގެ ވާރޭ ވަނީ ވެހިފައެވެ.
ވިއްސާރަ ދުވަސްތަކަކަށް ފަހު ކުޑަކޮށް މޫސުން ރަނގަޅު ވެލާފައި އަނެއްކާ ވެސް މޫސުން ގޯސްވެ، ބޯކޮށް ވާރޭވެހި އިއްޔެ މާލޭގެ މަގުތަކުގައި ވެސް ވަނީ ފެންބޮޑުވެފައެވެ.