13 Jan 2024, 09:34
ޗައިނާގެ ރައީސް ޗީ ޖިން ޕިންގެ ސިޔާސަތުތަކާ އެއްގޮތްވާ ގޮތަށް ރާއްޖޭގެ ތަރައްގީގެ ޕްލޭން ބައްޓަންކުރާނަަމަ އިތުރު މަޝްރޫއުތަކަށް އެ ގައުމުގެ އެހީ ލިބޭނެކަމަށް ޗައިނާއިން ރާއްޖެއަށް ކަނޑައަޅުއްވައިފައި ހުންނަވާ ސަފީރު ވަންގް ލިޒިން މިއަދު ވިދާޅުވެއްޖެއެވެ.
ލިޒިން މިފަދައިން ވިދާޅުވެފައި މިވަނީ، ޗައިނާގެ ރައީސް ޝީގެ ރަސްމީ ދައުވަތަކަށް، ރައީސް ޑރ. މުޙައްމަދު މުއިއްޒު އެ ގައުމަށް ކުރެއްވި ރަސްމީ ފުރަމާނަ ދަތުރުފުޅު ރޭ ނިންމަވައިލައްވައިފައި ވަނިކޮށެވެ. މި ދަތުރުފުޅުގައި ލިޒިން ވެސް ބައިވެރިވެލެއްވިއެވެ.
އެއާއެކު ދެ ގައުމުގެ ދެމެދުގައި އޮތް ބަދަހި ގުޅުމާ ގުޅޭގޮތުން، ޗައިނާގެ ސީޖީޓީއެންއަށް ދެއްވި އިންޓަވިއުއެއްގައި ލިޒިން ވިދާޅުވީ، ރާއްޖެއާއި ޗައިނާގެ ގުޅުން ބަދަހިވުމުގެ ފަހަތުގައި އޮތީ މައިގަނޑު ތިން ކަމެއް ކަމަށެވެ.
އެންމެ މުހިންމީ ދެ ގައުމުގެ ދެމެދުގައި ސިޔާސީ ގޮތުން އޮތް އިތުބާރާއި ބަދަހިގުޅުން ކަމަށް ލިޒިން ފާހަގަކުރެއްވިއެވެ. އެގޮތުން ރައީސް މުއިއްޒު ޗައިނާއަށް ކުރެއްވި ރަސްމީ ދަތުރުފުޅުގައި އެ ގައުމުގެ އެންމެ އިސްވެރިންނާއެކު ގުޅުން ބަދަހިކުރުމުގެ މަޝްވަރާތައް ކުރިއަށް ގެންދެވިކަމަށް ފާހަގަކުރެއްވިއެވެ.
"މި ދަތުރުފުޅުގައި ދެ ގައުމުގެ ވެރިންވަނީ މި ބަދަހި ގުޅުން އިތުރު ހަރުފަތަކަށް ގެންދިއުމަށް ސްޓްރެޓެޖިކް ކޯޕަރޭޝަނާއި، ޕާޓްނާޝިޕްގެ ގޮތުން މަސައްކަތް ކުރުމަށް އިއުލާންކޮށްފައި،" ލިޒިން ފާހަގަކުރެއްވިއެވެ.
އޭނާ ވިދާޅުވީ މީގެ ނަތީޖާއަކަށް ވާނީ ދެ ގައުމުގެ ދެމެދުގައި އެކުގައި މަސައްކަތްކުރުމުގެ ޔަގީންކަން ސިޔާސީ ގުޅުމުގެ ތެރެއިން މިހާރަށްވުރެ އިތުރުވުން ކަމަށެވެ.
ހަމައެއާއެކު ރައީސް ޝީ ޖިން ޕިންގެ ތަރައްގީގެ ސިޔާސަތުތަކާ އެއްގޮތަށް ރާއްޖޭގެ ގައުމީ ތަރައްގީގެ ޕްލޭން ކުރިއަށް ގެންދިއުމަކީ، ދިވެހިންނަށް ފައިދާވާ އިތުރު މަޝްރޫއުތައް ހިންގުމާމެދު ގޮތް ނިންމަން އެޅޭނެ ބާރެއްކަމަށް ވެސް ލިޒިން ފާހަގަކުރެއްވިއެވެ.
"އަޅުގަނޑަށް ހީވަނީ މި ގޮތަށް ސިޔާސަތުތައް ބައްޓަންކުރުމުން އަޅުގަނޑުމެންނަށް ނިންމޭނެހެން ދިވެހިންނަށް ފައިދާވާނެ އިތުރު މަޝްރޫއުތައް ކުރިއަށް ގެންދިއުމާ ގުޅޭގޮތުން،" ލިޒިން ވިދާޅުވިއެވެ.
ތިންވަނަ ކަމެއްގެ ގޮތުގައި ލިޒިން ފާހަގަކުރެއްވީ ދެ ގައުމުގެ މެދުގައި ރަނގަޅު މުއާމަލާތްތައް ކުރުމާއި، ދެ ގައުމަށް ވެސް ފައިދާވާނެ ބިނާކުރަނިވި ކަންކަން ކުރުން ކަމަށެވެ.
"އަޅުގަނޑަށް ހީވަނީ މި ތިން އަސާސްގެ ތެރެއިން، ކުރިއަށް އޮތް ތަނުގައި އަޅުގަނޑުމެންނަށް ވަރަށް ކާމިޔާބު، ދެމެހެއްޓެނިވި މަސައްކަތްތަކެއް އެކުގައި ކުރެވޭނެ ކަމަށް،" އޭނާ ވިދާޅުވިއެވެ.