12 Jan 2024, 22:37
ވެރިރަށް މާލެގެ މަގުތަކުގައި ފެންބޮޑުވެފައިވާތީ, ފެން ހިނދައި ނިމެންދެން މަގުތަކުގައި ބަރު އުޅަނދު ނުދުއްވުމަށް ފުލުހުން މިރޭ އިލްތިމާސްކޮށްފިއެވެ.
މިކަމާ ގުޅިގެން ފުލުހުން ބުނީ ބައެއް ގޭގެއަށް ފެން ވަނުމުގެ ހާދިސާތައް ހިނގަމުންދާތީ ޒަރުރީ ބޭނުމެއްގަ ނޫނީ ހަތަރު ފުރޮޅުލީ އުޅަނދު ފަހަރާއި ބަރު އުޅަނދުތައް ނުދުއްވުމަށް އެދޭ ކަމަށެވެ.
އަދި މިފަދަ ހާލަތްތަކުގައި ރައްޔިތުންގެ ފަރާތުން ލިބެމުންދާ އެއްބާރުލުމަށް ފުލުހުން ވަނީ ޝުކުރު އަދާކޮށްފައެެވެ.
މަގުތަކުގައި ފެންބޮޑުވުމާ ގުޅިގެން ރައްޔިތުންގެ ހާލަތު ބެއްލެވުމަށް ނައިބު ރައީސް ހުސައިން މުޙައްމަދު ލަތީފް މިއަދުވަނީ މާލޭގެ ގޭގެއަށް ޒިޔާރަތް ވެސް ކުރައްވައިފައިވެއެވެ.
އަދި ރައްޔިތުންނަށް ލިބުނު ގެއްލުން ދެނެގަތުމަށް ނައިބު ރައީސާއެކު ހޯމް މިނިސްޓަރު އަލީ އިހުސާނާއި ފުލުސް ކޮމިޝަނަރު އަލީ ޝުޖާއު ވެސް ބައިވެރިވެލެއްވިއެވެ.
ވިއްސާރަ ދުވަސްތަކަކަށް ފަހު މި ދޭތެރެއިން މޫސުން ރަނގަޅުވެފައި އޮތުމަށް ފަހު އަނެއްކާ ވެސް މި އަންނަނީ ވިއްސާރަކުރަމުންނެވެ. މިއަދު ހެނދުނުން ފެށިގެން ވިއްސާރަ ކުރާއިރު، މާލޭގެ މަގުތަކުގައި ވަރަށް ބޮޑަށް ވަނީ ފެންބޮޑުވެފައެވެ.
މެޓް އޮފީހުން ވަނީ ވިއްސާރަ ވާނެ ކަމަށް ލަފާކޮށް މިރޭ 10:00 އިން ފަތިހު 4:00 އާ ހަމައަށް ހއ. އަތޮޅުން ފެށިގެން ވ.އަތޮޅާ ހަމައަށް ހުދު ސަމާލު ނެރެފައިވެއެވެ.
އުތުރު އަތޮޅުތަކަށް ގަޑިއަކު 19 މޭލާއި މޭލަށް ވައި ޖެހޭނެ ކަމަށާއި ވިލާގަނޑުގައި ގަޑިއަކު 40 މޭލަށް ވައި ގަދަވާނެކަމަށް އެ އޮފީހުން ބުނެއެވެ.
އަދި މެޓް އޮފީހުން ވަނީ އެ އަތޮޅުތަކުގެ ކަނޑުތައް ގަދަވާނެ ކަމަށް ލަފާކޮށްފައެވެ.