12 Jan 2024, 21:31
ވެރިރަށް މާލޭގެ ސަރަހައްދަށް ކުރަމުންދާ ވިއްސާރައިގައި މަގުތަކުގައި ފެންބޮޑުވުމާ ގުޅިގެން ރައްޔިތުންގެ ހާލަތު ބެއްލެވުމަށް ނައިބު ރައީސް ހުސައިން މުޙައްމަދު ލަތީފް މިއަދު ގެތަަކަށް ޒިޔާރަތް ކުރައްވައިފިއެވެ.
ހޯމް މިނިސްޓްރީން މިއަދު އެކްސްގައި ކުރި ޕޯސްޓެއްގައި ވަނީ މިހާރު ކުރަމުންދާ ވިއްސާރައިގައި މާލެ ގިނަ ސަރަހައްދުތަކުގައި ފެންބޮޑުވެ އެކި ވަރުގެ ގެއްލުންތައް ލިބިފައިވާ ކަމަށެވެ.
އެހެންވެ އެ ކަންކަން ބަލައި، ރައްޔިތުންނަށް ލިބުނު ގެއްލުން ދެނެގަތުމަށް ނައިބު ރައީސާއެކު ހޯމް މިނިސްޓަރު އަލީ އިހުސާން ވެސް ބައިވެރިވެލެއްވިއެވެ. އަދި ފުލުސް ކޮމިޝަނަރު އަލީ ޝުޖާއު ވެސް ބައިވެރިވެލެއްވިއެވެ.
ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިރޭ ބުނީ ވިއްސާރައިގެ ސަބަބުން އަށް ގެއެއްގެ 57 މީހުންނަށް ވަގުތީ ހިޔާވަހިކަން ފޯރުކޮށްދީފައިވާ ކަމަށެވެ.
144 ގެއަކުން ގުޅައި އެހީތެރިކަމަށް އެދިފައިވާ ކަމަށާއި އޭގެތެރެއިން މިވަގުތާއި ހަމައަށް 132 ގެއަކަށް އެހީތެރިކަން ފޯރުކޮށްދެވިފައިވާ ކަމަށް އެންޑީއެމްއޭއިން ބުނެއެވެ.
އަދި ފެން ވަނުން ކުޑަކުރުމަށް 91 ގެއެއްގައި ވެލި ބަސްތާ ޖަހައިފައިވާ ކަމަށް އެންޑީއެމްއޭއިން ވަނީ ބުނެފައެވެ.
އެންޑީއެމްއޭއިން ބުނި ގޮތުގައި މާލޭގެ އިތުރުން ރާއްޖޭގެ އެހެނިހެން ރަށްތަކުގައި ވެސް ފެންބޮޑުވެ އެކި ވަރުގެ ގެއްލުންތައް ވަނީ ލިބިފައިވާ ކަމަށެވެ.
އެގޮތުން މާލެގެ އިތުރުން ތ. ގުރައިދޫ، ތ. ދިޔަމިގިލި، ލ. މާމެންދޫ ގެ އިތުރުން ދ. ކުޑަހުވަދޫ ފެންބޮޑުވެ އެކި ވަރުގެ ގެއްލުންތައް ވަނީ ލިބިފައެވެ.
މިއަދު ހެނދުނުން ފެށިގެން މާލެއާއި މެދުރާއްޖެ ތެރޭގެ ބައެއް ރަށްރަށަށް ވެސް އަންނަނީ ވިއްސާރަ ކުރަމުންނެވެ. ވިއްސާރައިގައި މާލޭގެ މަގުތަކުގައި ފެންބޮޑުވެފައިވާއިރު، ބައެއް ތަންތަނަށް ވަނީ ގެއްލުންތައް ވެސް ވެފައެވެ.