12 Jan 2024, 20:36

މޫސުން ގޯސްވެ، މިހާރު މާލޭ ސަރަހައްދަށް ކުރަމުން އަންނަ ވިއްސާރާގެ ސަބަބުން، މާދަމާ ބާއްވާ މާލޭ މޭޔަރު ބައި އިލެކްޝަންގެ ވޯޓުލުމުގެ ވަގުތު އިތުރުކުރަން އިލެކްޝަންސް ކޮމިޥޝަން (އީސީ)އިން ނިންމައިފިއެވެ.

މި އިންތިޚާބު މާދަމާ އޮންނައިރު، މާދަމާ ހެނދުނު ވެސް މާލޭ ސަރަހައްދަށް ގުގުރުމާއެކު ވިއްސާރަކުރާނެ ކަމަށް މޫސުމާ ބެހޭ ގައުމީ އިދާރާ (މެޓު) އޮފީހުން ވަނީ ލަފާކޮށްފައެވެ.

އެކަމާ ގުޅިގެން 'ސަން' އިން ސުވާލުކުރުމުން އީސީގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވީ މާދަމާ ބާއްވާ އިންތިޚާބުގައި ވޯޓުލާ ރައްޔިތުންނަށް ފަސޭހަކުރުމުގެ ގޮތުން އިންތިޚާބުގައި ވޯޓު ލެވޭނެ ވަގުތު އިތުރުކޮށްފައިވާ ކަމަށެވެ.

އިތުރުކޮށްފައިވަނީ އެއް ގަޑިއިރުކަމަށް އޭނާ ވިދާޅުވިއެވެ. އެހެންކަމުން ވޯޓުލުން މާދަމާ ހަވީރު 17:00 އާ ހަމައަށް ކުރިއަށްދާނެއެވެ.

އެއާއެކު އެ ކޮމިޝަނުން އެކްސްގައި ކުރި ބުނީ، މުޅި ރާއްޖޭގެ މޫސުން ގޯސްވެ، ވިއްސާރަވެ، ވައިގަދަވެ އަދި ކަނޑުގަދަވުމުގެ ސަބަބުން އާންމު ދަތުރުފަތުރަށް ބުރޫއަރައިފައިވާ ކަމަށެވެ.

އެހެންވެ ވޯޓުލުމަށް މީހުން ނިކުތުމަށް ދަތިވާނެތީ، މާދަމާގެ އިންތިޚާބުގެ ވޯޓުލުމުގެ ވަގުތަށް އެއް ގަޑިއިރު އިތުރުކުރީ ކަމަށެވެ.

މާދަމާ އޮންނާނީ މާލެ ސިޓީ ކައުންސިލްގެ މޭޔަރަކު އިންތިޚާބުކުރުމުގެ އިތުރުން އެ ކައުންސިލްގެ ހުސްވެފައިވާ މާފަންނު ދެކުނު ދާއިރާ، މެދުހެންވޭރު ދާއިރާ، ހެންވޭރު ދެކުނު ދާއިރާގެ މެންބަރަކު އައްޔަނުކުރުމަށް ވޯޓުލުމެވެ.

މީގެ އިތުރުން މާދަމާ ބާއްވާ މ. މުލަކު އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރު އިންތިޚާބު ކުރުމަށް ބާއްވާ ބައި އިލެކްޝަންގެ ވޯޓުލުމުގެ ވަގުތު ވެސް ވަނީ ހަވީރު 17:00 އަށް އިތުރުކޮށްފައެވެ.

މާލޭ މޭޔަރު އިންތިޚާބު މާދަމާ އޮންނައިރު، އެ މަގާމަށް ފަސް ކެންޑިޑޭޓަކު ވާދަކުރައްވައެވެ. އެއީ:

  • ޕީއެންސީގެ ކެންޑިޑޭޓު އައިޝަތު އާޒިމާ ޝުކޫރު

  • އެމްޑީޕީގެ ކެންޑިޑޭޓް އާދަމް އާޒިމް
  • ދަ ޑިމޮކްރެޓްސްގެ ކެންޑިޑޭޓް ސައިފް ފާތިހު
  • ކުރީގެ ރައީސް އަބްދުﷲ ޔާމީން އުފައްދަވާ ޕީޕަލްސް ނެޝަނަލް ފްރޮންޓްގައި އިސްކޮށް ހަރަކާތްތެރިވާ ކުރީގެ ފުލުސް ކޮމިޝަނަރު ހުސައިން ވަހީދު
  • އަމިއްލަ ގޮތުން ވާދަ ކުރައްވާ ޝުއައިބު އަލީ (ފުރަހަނި ޝުއައިބު)

މެޓު އޮފީހުން ބުނީ މާލެއަށް މާދަމާގެ ހެނދުނު 10:00 އާ ހަމައަށް ގުގުރުމާ އެކު ބޯކޮށް ވާރޭ ވެހޭނެ ކަމަށް ލަފާކުރެވޭ ކަމަށެވެ. ނަމަވެސް މާދަމާގެ މެންދުރު ފަހު، ވާރޭ ވެހޭނެކަމަށް ލަފާނުކުރެވޭ ކަމަށް ވެސް މެޓު އޮފީހުން ބުންޏެވެ.