13 Jan 2024, 06:20
ދިގު ދަތުރަކަށްފަހު، ލޯންޗު މާލޭގެ ފަޅުތެރެއަށް ވަނެވެ. ފަތިހުގެ ފިނި ވައިރޯޅި ބީހިލުމުން ލިޝާ ހީކަރުވައިގަތެވެ. ލޯންޗު ކައިރިކުރިއިރު، ޖެޓީ ކައިރީގައި ކާރެއް އޮތެވެ. ޑްރައިވަރު ކާރުން ފައިބައިގެން އައިސް ލޯންޗުން މީހުން ފޭބުމަށް އެހީތެރިވެދިނެވެ. ފޮށިތައް ބޭލުމުން ކާރަށް ފޮށިތައް އެރުވީވެސް ޑްރައިވަރެވެ.
********
ލޯންޗުން ފޭބިގޮތަށް އަކްރަމް ހުރީ ސިނގިރޭޓު ބޯށެވެ. އެންމެ ވަގުތުކޮޅަކަށްވެސް އެއާއި ނުލާ ކެތް ނުކުރެވޭ ކަހަލައެވެ. ދުން ބުރުވާލާއިރު ކައިރީގައި ތިބި މީހުންނަށް ބަލައިލުމެއް ނެތެވެ. އެހެން މީހުންވެސް އެކަން މާ ބޮޑު ކަމަކަށްވެގެން ނޫޅެއެވެ. މައްސަލައަކަށްވީ ހަމައެކަނި ލިޝާއަށެވެ. ސިނގިރޭޓުބޯ މީހުންދެކެ ލިޝާ އަބަދުވެސް ފޫހިވެއެވެ. އޭގެ ވަސް ޖެހުމުން އުނދަގޫވެއެވެ. އެ ސިފަ އަކުރަމާއި ނުވެސް ގުޅެއެވެ. ކުރިއަށްވުރެ ބޮޑަށް އޭނާ އަކްރަމްދެކެ ފޫހިވިއެވެ. ރީތި ސިފައެއް ލިބިފައި ހުއްޓަސް، އަކްރަމްގެ އުޅުމެއް ނެތެވެ. ލިޝާއަށް ފެންނަމުން ދިޔައީ މުޅީންވެސް އަކްރަމްގެ ގޯސް ސިފަތަކެވެ. އެކުގައި އުޅެވޭނެކަމުގެ އުއްމީދު ލިބޭ ކަހަލަ އެއްވެސް ސިފައެއް ނުފެނުނެވެ.
ކާރަށް އަރައަރާ ހުއްޓާ ލިޝާގެ ފޯނު ރިންގްވާން ފެށިއެވެ. ގުޅީ މަދީހާއެވެ. މާލެ ދެވުނުކަން ކަށަވަރު ކުރުމަށެވެ. އެހެން ބައެއްގެ އަތްމައްޗަށް ދަރިފުޅު ދޫކޮށްލެވުމުން، މަދީހާ ހުރީ ނުތަނަވަސްވެފައެވެ. ރޭގައި އޭނާއަށް އެންމެ ލޮލުފިޔައެއްވެސް ނުޖެހެއެވެ.
"ކާރަށް މިއަރަނީ... ގެއަށް ގޮސް ގުޅާނަން އިނގޭ މަންމާ..." ލިޝާ ފޯނު ކަނޑައިލިއެވެ. ހަމަޖެހިގެން ވާހަކަ ދައްކަން އުޅުނަސް، އޭނާގެ އަޑުގައި ނޭނގޭ ރިހުމެއްގެ އަސަރުވިއެވެ. މަންމަގެ އަޑު އިވުމުން، ލިޝާ މާބޮޑަށް ހިތުގައިޖެހުނީއެވެ. ޝަކުވާތައް ބަންޑުންކޮށްލަން ހިތް އެދުނީއެވެ.
ލިޝާ ފޯނު ކަނޑާލިގޮތުން މަދީހާ ހުރީ ހުއްޓުން އަރާފައެވެ. އެނދުގައި އިށީންގޮތަށް ކަންފަތުން ފޯނު ވަކިކޮށްލަންވެސް ނޭނގުނެވެ. ދަރިފުޅުގެ އަޑުގައިވި ނުތަނަވަސްކަން އޭނާއަށް ސިއްރެއް ނުވިއެވެ. ފިކުރުތަކުގެ ފުން ކަނޑެއްގެ ތެރޭގައި މަދީހާ އިންދާ ނައީމު އެތެރެއަށް ވަނެވެ.
"އަހަންނަށް ހީވަނީ ކޮންމެސް ކަމެއް ވާންއުޅޭހެން..." ނައީމު ދެތިންފަހަރަކު ގޮވާލުމުން، މަދީހާ ބުންޏެވެ.
"ކޮންކަހަލަ ކަމެއް؟..." ދަބަސް މޭޒުމަތީގައި ބާއްވާފައި މަދީހާއާއި ދިމާއަށް ދަމުން ނައީމު ސުވާލުކުރިއެވެ.
"އަހަންނަށް ހީވަނީ ލިޝާ..." މަދީހާއަށް އޭނާޖެ ޖުމުލަ ފުރިހަމައެއް ނުކުރެވުނެވެ. ނައީމު އޭނާގެ ވާހަކަ ހުއްޓުވިއެވެ.
"އަދިވެސް އެކަމާ ވިސްނަނީ؟... މާބޮޑަށް ގޯސްކޮށް ވިސްނާތީއޭ ތިހެން ތިވަނީ..." ނައީމު މަސައްކަތްކުރީ މަދީހާ ހަމައަކަށް އަޅުވާށެވެ. "އެމީހުން ކިހާ ރަނގަޅު... މަދީ ތި ވިސްނަނީ ކޮންމެ ކަމެއްގެވެސް ގޯސް ގޮތަށޭ..."
"ކޮންމެސް ކަމެއްވެއްޖެ... އެހެންނޫނީ ލިޝާ އެހެން ނުހަދާނެ... އަހަރެން ގުޅީމަ އެގޮތަށް ފޯނު ކަނޑައެއް ނުލާނެ..." މަދީހާ ހުރީ ހިތުގައިޖެހިފައެވެ.
"ހިނގާބަލަ އަހަންނާއެކީ ފިހާރައަށް... އަށެއްގަ ހުޅުވަން ވާއިރަށް ގެނެއްސަ ހުރި މުދާކޮޅަށް ގޮތެއް ހަދަން އެބަޖެހޭ... އެކަނި ގޭގަ އިންނަންވީމަ ވެގެންއުޅޭގޮތެކޭ ތީ..." މަދީހާގެ އަތުގައި ހިފައި ނަގަމުން ނައީމު ބުންޏެވެ.
ކާރު ގޮސް ހުއްޓައިލީ ޒަމާނީ ފެންވަރަކަށް ހަދާފައިވާ ރީތި ގެއެއްގެ ކުރިމައްޗަށެވެ. ޑްރައިވަރު ކާރުން ފައިބައިގެން އައިސް އަކްރަމް ނުކުތުމަށް ދޮރު ހުޅުވައިދިނެވެ. އަކްރަމް ފޭބުމުން، ލިޝާ އިން ދިމާއިން ދޮރު ހުޅުވައިދިނުމަށް ޑްރައިވަރު އަވަސްވެގަތެވެ. ޑްރައިވަރަށް މަޑުކުރުމެއްނެތި، ކާރުގެ ދޮރު ހުޅުވާފައި ލިޝާ ނުކުތެވެ.
"އަޅުގަނޑު އަންނަންދެން މަޑުނުކުރެއްވީ ކީއްވެތޯ؟..." އަވަސް އަވަހަށް ލިޝާގެ ކައިރިއަށް ގޮސް، ކާރުގެ ދޮރު ލައްޕައިލިއިރު ޑްރައިވަރު ހުރީ ހާސްވެފައެވެ. އޭނާ ވާހަކަ ދެއްކީ އަކްރަމަށް އަވަސް ނަޒަރެއް ދެމުންނެވެ.
"އެއީ މައްސަލައެއް ނޫން..." ލިޝާއަށް އެކަން މާބޮޑު ކަމަކަށް ނުވިއެވެ. އެވަރުގެ ކުޑަ ކަމަކާ ޑްރައިވަރު އެހާ ހާސްވުމުން، ލިޝާ ހުރީ ހައިރާންވެފައެވެ.
ފޮށިތައް ކޮޓަރިއަށް ވައްދާފައި ޑްރައިވަރު ދިޔުމުން، އަކްރަމާއި ލިޝާ އެކަނިވިއެވެ. ލިޝާ ހުރީ ފިޔަވަޅެއްވެސް އަޅަން ނޭނގިފައެވެ. ކޮޓަރީގައި ހުންނާކަށް ނުކެރުނެވެ. ނުކުންނާކަށްވެސް ނުކެރުނެވެ. ލިޝާ ދެފިކުރެއްގައި ހުއްޓާ، އަކްރަމް ކޮޓަރީގެ ދޮރު ލައްޕާ ތަޅުލިއެވެ. ލައިގެން ހުރި ގަމީހުގެ ގޮށްތައް ނައްޓުވަމުން ލިޝާއާއި ދިމާއަށް އޭނާ ހިނގައިގަތެވެ. ލިޝާގެ ހިތް ނެގިނެގިފައި ޖެހެން ފެށިއެވެ. އެވަގުތުކޮޅުވެސް އޭނާ ހަނދާންވީ ޝަފާޒުގެ މަތިންނެވެ. ޝަފާޒަށް ބޭވަފާތެރިވެވޭކަމުގެ އިހުސާސް ކުރެވުމުން، ލިޝާގެ މޭގައި ދިލަ ރިހުމެއް އުފެދިގެން ދިޔައެވެ. ލިޝާއަށް އިތުރު ކަމަކާއި ވިސްނާނުލެވެނީސް، އަކްރަމް ގޮސް ލިޝާއާއި ނުހަނު ކައިރީގައި ހުއްޓިލިއެވެ.
"ލަދުންތަ ތިހުރީ؟..." ލިޝާގެ ދަތްދޮޅީގައި ހިފައި އުފުލައިލަމުން އަކްރަމް އަހައިލިއެވެ. "އަހަރެން މީ ލިޝާގެ ފިރިމީހާއޭ...."
އަކްރަމްގެ ދޫ ހަރަކާތްކޮށްލުމުން ދުވި ސިނގިރޭޓުގެ ނުބައި ވަހުން، ލިޝާގެ ބޮލަށް އެނބުރުން އަރައިގަތެވެ. ބޭއިހުތިޔާރުގައި އޭނާއަށް އެހެން ދިމާއަކަށް މޫނު އަނބުރައިލެވުނެވެ.
"ލަދުގަތީމަ މާ ކިއުޓް..." ލިޝާގެ ކޯތާފަތުގައި ޝަހާދަތް އިނގިލި ހިންގައިލަމުން އަކްރަމް ބުންޏެވެ.
ލިޝާ ހުރީ އުނދަގޫވެފައިކަން އެނގުމުން، އަކްރަމަށް އިތުރު ހިތްވަރު ލިބުނެވެ. އޭނާއަށް ވީ މަޖާކަމަކަށެވެ. ލިޝާގެ އުނަގަނޑުގައި ހިފައި، ގަޔާއި ކައިރިކޮށްލިއެވެ. މޫނާއި ކައިރިވިއެވެ. އެވަގުތު ކޮޓަރި ދޮރުގައި ޓަކި ޖަހައިލި އަޑު އިވުނެވެ. އެ އަޑަށް ބީރު ކަންފަތެއް ދީފައި، ކުރަން އުޅުނު ކަންތަކަށް އަކްރަމް ސަމާލުކަން ދިނެވެ. ގަމީސް ބާލާފައި އެނދުމައްޗަށް ހޫރައިލިއެވެ. އޭނާގެ މަގުސަދު ހާސިލުވުމުގެ ކުރިން އެމީހަކު އަނެއްކާވެސް ޓަކި ޖަހައިލި އަޑު އިވުނެވެ.
"ކާކުތަ؟..." އަކްރަމް ހިތްހަމަނުޖެހިފައި ތަންކޮޅެއް ބާރަށް ބުންޏެވެ.
ކުރިއަށްވުރެ ބާރަށް އެމީހަކު ޓަކިޖަހަން ފެށިއެވެ. ލިޝާ ދުރުކޮށްފައި އަކްރަމް ގޮސް ދޮރު ހުޅުވައިލިއެވެ. ދޮރުމަތީގައި ހުރީ އަކްރަމްގެ މަންމަ ނަސީރާއެވެ. ނަސީރާ ފެނުމުން، އަކްރަމް އެނބުރި އައިސް އޭނާ ބޭލި ގަމީސް ނެގިއެވެ. އޭރުވެސް ލިޝާ ހުރި ފިޔަވަޅުމަތީގައި ހުއްޓެވެ. ގަމީސް ލަމުން އަކްރަމް ދޮރު ކައިރިއަށް ދިޔައީ ލިޝާއަށް އަވަސް ނަޒަރެއް ދީފައެވެ.
"ހާދަ އިރަކު ޓަކިޖަހައިފީމޭ..." ޝަކުވާގެ ރާގަކަށް ނަސީރާ ބުންޏެވެ. ލިޝާއަށް ނީވޭ ވަރަށް މަޑުންނެވެ.
ނަސީރާ އަކްރަމްގެ އަތުގައި ހިފައި ބޭރަށް ނެރުމަށްފަހު، ކޮޓަރީގެ ދޮރު ލައްޕައިލިއެވެ. ލިޝާ ހިފަހައްޓައިގެން ހުރި ނޭވާ ދޫކޮށްލެވުނީ ދެނެވެ. އޭނާއަށް ހަމަޖެހުމެއް ލިބުނުއިރު، ދިމާވި ކަންތަކުން ނުތަނަވަސްކަމެއްވެސް ލިބުނެވެ. ނަސީރާ ޓަކިޖެހިގޮތުން ހީވަނީ ބޮޑު ކަމެއްވެގެން ނޫނީ ބޮޑުކަމެއް ވާންއުޅޭތީ ކަންބޮޑުވެގެން އުޅުނު ހެންނެވެ. ދޮރު ހުޅުވުނު ވަގުތު ނަސީރާގެ މޫނުމަތިން ފެނުނު ނުތަނަވަސްކަން އެކަމަށް ހެކިދެއެވެ.
"މަންމަ ކިހިނެއްވެގެންތަ ތިއުޅެނީ؟..." ކުރަން ބޭނުންވި ކަންތައް ނުވުމުން، އަކްރަމް ހުރީ މޫޑު ގޮއްސައެވެ.
"އަކްރަމް ނިދަންވާނީ އެހެން ކޮޓަރިއެއްގަ...." ނަސީރާ އަމުރުވެރި ރާގަކަށް ބުނެލިއެވެ.
"އޭނ؟... ކީއްވެ؟...." ޝަކުވާގެ ރާގަކަށް އަކްރަމް އެހިއެވެ.
"އެއީ އަމުރު އައި ގޮތް..." ނަސީރާ ޖަވާބުދިނެވެ. "އަހަރެމެންނަށް އޮތީ އޭނަގެ އަމުރަށް ކިޔަމަންވުން..."
"ތީ ކޮންކަހަލަ އަމުރެއް؟... އަހަރެން މިހުރީ އޭނަޔާ އިނދެގެނެއް ނޫންތަ؟..." އަކްރަމް ހުރީ ރުޅިއައިސްފައެވެ. "އަހަންނަށް ހައްގު އޮންނާނެ އޭނަ ގައިގަ އަތްލާން..."
"އެހެންވިޔަސް ހެވޭ... ބުނެފީމެއްނު މިހާރު ކަންތައްކުރަންވީގޮތް..." ނަސީރާ ހިތްހަމަނުޖެހުނެވެ.
"ކީއްވެ ކުރިން ތިވާހަކަ ނުބުނީ؟..." އަކްރަމްގެ ނޭވާ އަވަސްވިއެވެ. ލޭ ކެކިގަތެވެ. "މަންމަމެން ކީއްވެ އަހަންނަށް އޮޅުވާލީ؟..."
"ޝްޝްޝް..." ނަސީރާ އޭނާގެ ތުންފަތުގައި އިނގިލި ޖައްސައިލިއެވެ. "އަކްރަމަށް ހެދޭ އެންމެ ގޯހަކުން، މި އާއިލާ އެއްކޮށް ހަލާކުވެދާނެ... މި މުއްސަނދިކަމާ، އަރާމާ އުފާ ގުރުބާންކުރަން ބޭނުން ނުވަންޏާ، އަހަރެން ބުނާގޮތަށް ހަދާ..."
"އަހަރެން ހިތްހަމަނުޖެހިގެން މިއުޅެނީ މަންމަމެން އަހަންނަށް އޮޅުވާލީމަ..." އަކްރަމްގެ އަޑު މަޑުވި ނަމަވެސް އޭނާ ހުރީ ހިތްހަމަނުޖެހިފައެވެ.
"މީ މިކަން ވާން އޮތް ގޮތޭ ދަރިފުޅާ..." ވިސްނައިދޭ ރާގެއްގައި ނަސީރާ ބުންޏެވެ.
"މަންމަމެން އަހަރެންލައްވާ ތި ކުރުވީ ބޭކާރު ކައިވެންޏެއްނު... އޭނަގެ ފަރާތުން އުފަލެއް ނުލިބެންޏާ، ކީއްކުރަން އިނދެފަ ބަހައްޓާ މީހެއް؟... އަހަންނަކަށް މިހެން ނޫޅެވެނެ..." އަކްރަމް އައި ރުޅީގައި އަތުގައި އޮތް ފޯނު ހޫރައިލާފައި އެތަނުން ނުކުމެގެން ދިޔައެވެ.
ލިޝާ އޮތީ ނިދަންވެސް ނުކެރިފައެވެ. ދެންމެދެންމެ ދޮރު ހުޅުވާލާފައި އަކްރަމް އެތެރެއަށް ވަދެފާނެހެން އޭނާއަށް ހީވަނީއެވެ. އަކްރަމާއި ކައިވެނި ކުރެވުނަސް، އެއީ ފިރިމީހާގެ ގޮތުގައި ބަލައިގަންނަން ލިޝާގެ ހިތް ދެކޮޅު ހަދަމުން ދިޔައެވެ. އެތައް އިރެއް ފާއިތުވީއިރުވެސް އަކްރަމް ނައުމުން ލިޝާއަށް ހަމަޖެހުމެއް ލިބުނެވެ.
ފޯނުން އިވުނު ފަތިސްނަމާދު ބަންގީގެ އަޑަށް، ނިދިފައި އޮތް ލިޝާއަށް ތެދުވެވުނީ ފުންމައިގެންނެވެ. އޭނާއަށް ފުރަތަމަވެސް ނަޒަރު ހިންގައިލެވުނީ ކޮޓަރިއަށެވެ. ކޮޓަރި އޮތީ ލިޝާ ވަންއިރުވެސް އޮތް ގޮތަށެވެ. ހުރިހާ ބޮކިތަކެއް ދިއްލާފައެވެ. އިތުރު މީހަކު ކޮޓަރިއަކު ނެތެވެ. އޭރު ނުކުތްގޮތަށް އަކްރަމް އެނބުރި ނާންނަނީކަން ލިޝާއަށް އެނގުނެވެ.
އާދައިގެމަތިން ނަމާދުކޮށް ނިންމާފައި ލިޝާއަށް ނެގުނީ ފޯނެވެ. ޝަފާޒުގެ ނަންބަރަށް ފިތާލިގޮތަށް އޭނާ ހުއްޓުން އެރިއެވެ. ހުރިހާ ކަމެއް ހަނދާނަށް އައެވެ. ކައިވެންޏެއް ކުރެވުނުކަމާއި، ޝަފާޒް އޭނާގެ ދިރިއުޅުމުން ބޭރުކޮށްލެވުނުކަން ހަނދާންވިއެވެ. ލިޝާގެ ދެލޮލަށް ކަރުނަ ޖަމާވިއެވެ. ކޮންމެ ދުވަހަކު ޝަފާޒްގެ އުފާވެރި ބަސްތަކުން ނޫނީ ދުވަސް ނުފަށާ ލިޝާއަށް ޝަފާޒާއި ނުލާ އުޅެވިދާނެ ހެއްޔެވެ؟ ފާހާނާގައި ހުރެގެން ލިޝާ އެތައް އިރަކު ރުޔެވެ. މައިންބަފައިންނާއި އެކުވެރިންގެ މަތިން ހަނދާންވާ ވަރަކަށް ލިޝާގެ ހިތުގެ ވޭން ދިޔައީ ގަދަވަމުންނެވެ. ފެންވަރައިގެން ނުކުތްއިރު، ލިޝާގެ ދެލޯ ވަނީ ރަތްވެފައެވެ. އެ ދެލޯ އެހެން މީހަކަށް ފެންނާކަށް ލިޝާ ބޭނުމެއް ނުވިއެވެ.
********
ހެނދުނުގެ ހިތްގައިމު ވަގުތެވެ. މާހައުލު ފިންޏެވެ. ނޫކުލައިގެ އަތްދިގު ޓީޝާޓަކާއި ހުދު ސޯޓުގައި ދުވަމުން އައި އާރިޒް ސިލްވާވޫޑް ގޭގެ ކުރިމައްޗަށް މަޑުކުރިއެވެ. ވަރުބަލިވެފައި ހުރިވަރުން، ދެކަކުލުގައި އަތް އަޅުވައިލާފައި ގުދުވިއެވެ. އެތައް އިރަކު ދުވެފައި އައުމުން އާރިޒް ހުރީ ރަނގަޅަށްވެސް ދާހިއްލާ ފޯވެފައެވެ. އާރިޒް ފަސްއެނބުރި ބަލައިލިއެވެ. ތަންކޮޅެއް ދުރުން އެދިމާއަށް އައި މާނަވް ފެނުމުން އޭނާގެ ކައިރިއަށް ހިނިއައެވެ.
"ނުވާނެ މިކަމެއް..." މާނޭވާލަމުން މާނަވް ބުންޏެވެ.
"ތިވަރު މީހުން ގޮވައިގެން އެކްސަސައިޒް ކުރާނީ ކިހިނެއް؟..." އާރިޒް ބޯ ހޫރައިލިއެވެ. "ޖިމަކަށް އަދި ނުދެވޭނެ ތިވަރުން..."
"މިކަންކަން ނުކޮށޭ ތިކަހަލަ ބޮޑީއެއް ބޭނުންވަނީ..." އާރިޒްގެ އަތުގެ މުލައްދަނޑީގައި ހިފައި، އަތުގެ މަސްގަނޑުގައި ޖަހައިލަމުން، މާނަވް ބުންޏެވެ.
ދެމީހުން ހެމުން އެތެރެއަށް ވަނެވެ. ގޭތެރޭގައި މަސައްކަތް ކުރަން އުޅުނު މީހުން އެބަޔަކު ކުރަން ތިބި ކަމެއް ހުއްޓާލާފައި އާރިޒްމެން ކަމަކަށް ބޭނުންވެދާނެތީ، މަޑުކޮށްލައިގެން ތިއްބެވެ.
"ތިހާ ވަރަށް ހަށިގަނޑު ރީތިކުރާއިރު، ކޮން ދުވަހަކުންތަ މި ތުނބުޅިގަނޑު ބާލާނީ؟... މިސްޓަރ އާރިޒްއަކާ ނުވެސް ގުޅޭ... ހީވަނީ މަގުމަތީގަ އުޅޭ ސަލާންޖަހާ މީހެއް ހެން..." މާނަވް އާރިޒާއި ދިމާކުރިއެވެ.
"ތުނބުޅިއެއް ނުބޭލޭނެ... ވަރިހަމަ ކޮންމެ މީހަކު ބުންޏަސް..." އާރިޒް ގަދަބަސް ބުނެލިއެވެ.
(ނުނިމޭ)