12 Jan 2024, 14:42
ވިއްސާރަވެ، މޫސުން ގޯސްވުމުގެ ސަބަބުން މާލެ އަތޮޅުން ފެށިގެން ދ. އަތޮޅާ ހިސާބަށް މޫސުމާ ބެހޭ ގައުމީ އިދާރާ (މެޓު އޮފީސް)އިން މިއަދު އިރުއޮއްސި 6:00އާ ހަމައަށް ރީނދޫ ސަމާލެއް ނެރެފިއެވެ.
މިއަދު ހެނދުނުން ފެށިގެން މާލެއާއި ރާއްޖެ ތެރޭގެ ބައެއް ރަށްރަށަށް ވެސް އަންނަނީ ވިއްސާރަކުރަމުންނެވެ. ވިއްސާރައިގައި މާލޭގެ މަގުތަކުގައި ފެންބޮޑުވެފައިވާއިރު، ބައެއް ތަންތަނަށް ވަނީ ގެއްލުންތައް ވެސް ވެފައެވެ.
މެޓު އޮފީހުން ވަނީ ގުގުރުމާ އެކު ބޯކޮށް ވާރޭވެހި، ވިލާގަނޑުގައި ގަޑިއަކު 45 މޭލަށް ވައިގަދަވާނެ ކަމަށް ލަފާކޮށް، މާލެ އަތޮޅުން ފެށިގެން ދ. އަތޮޅާ ހިސާބަށް ރީނދޫ ސަމާލު ނެރެފައެވެ. އެއީ، މިއަދުގެ 2:30 އިން ފެށިގެން އިރުއޮއްސި 6:00 އާ ހަމައަށެވެ.
ރީނދޫ ސަމާލު ނެރުނު އަތޮޅުތަކަކީ:
ކ. އަތޮޅު
- ވ. އަތޮޅު
- މ. އަތޮޅު
- އއ. އަތޮޅު
- އދ. އަތޮޅު
- ފ. އަތޮޅު
- ދ. އަތޮޅު
މާލޭގައި ފެންބޮޑުވެފައި: ފެން ހިންދުމުގެ މަސައްކަތް ސިފައިން އަންނަނީ ކުރަމުން -- ސަން ފޮޓޯ/ މުހައްމަދު މާވީ
މި ސަރަހައްދުތަކުގައި ކަނޑުތައް ވެސް އާދައިގެ ވަރަކަށް ގަދަވާނެ ކަމަށް މެޓު އޮފީހުން ވަނީ ލަފާކޮށްފައެވެ.
ފާހަގަކޮށްލަން ޖެހޭ ގޮތުގައި ވިއްސާރަ ދުވަސްތަކަކަށް ފަހު މި ދޭތެރެއިން މޫސުން ރަނގަޅުވެފައި އޮތުމަށް ފަހު އަނެއްކާ ވެސް މި ތިން ދުވަހު އަންނަނީ ވިއްސާރަކުރަމުންނެވެ. މިއަދު ހެނދުނުން ފެށިގެން ވިއްސާރަ ކުރާއިރު، މާލޭގެ މަގުތަކުގައި ވަނީ ފެންބޮޑުވެފައެވެ.
މަގުމަތިން ފެން ހިންދުމުގެ މަސައްކަތް އަދި، ފެން ވަންނަ ގޭގެއާ ދިމާލުގައި ވެލިބަސްތާ ޖެހުމުގެ މަސައްކަތް ފުލުހުންނާއި ސިފައިން ގުޅިގެން އަންނަނީ ކުރަމުންނެވެ.