12 Jan 2024, 13:46
ބުއްދީގެ ބޭނުން ހެޔޮ ގޮތުގައި ނުހިފާ މީހުންގެ ދަރަޖަ ﷲގެ ހަޒުރަތުގައި ހައިވާނުންގެ ދަރަޖައަށް ވުރެ ވެސް ދަށްވާނެ ކަމަށް މިއަދުގެ ހުކުރު ޚުތުބާގައި ބުނެފިއެވެ.
ޚުތުބާގައި ބުނީ ހުރިހާ މަޚުލޫގުންގެ ތެރެއިން ވެސް އެންމެ މާތް ކުރައްވާފައިވަނީ އިންސާނުން ކަމަށެވެ. އެއީ، އިންސާނުންނަށް ﷲ ދެއްވި ބުއްދީގެ ނިއުމަތުގެ ސަބަބުން ކަމަށް ވެސް ޚުތުބާގައި ވަނީ ބުނެފައެވެ.
އިންސާނުންނަށް ބުއްދި ދެއްވާފައިވަނީ ވިސްނާ ފިކުރުކޮށް، ހެވާއި ނުބައި ވަކިކޮށް ދެނެގަތުމަށް ކަމަށާއި ބުއްދީގެ ބެނުން ހެޔޮ ގޮތުގައި ނުހިފާ މީހުންގެ ދަރަޖައަކީ ވަރަށް ދަށު ދަރަޖައެއް ކަމަށް ޚުތުބާގައި ވަނީ ފާހަގަކޮށްފައެެވެ.
"އެހެންކަމުން ރަނގަޅު ގޮތުގައި ބުއްދީގެ ބޭނުން ނުހިފާ މީހުންގެ ދަރަޖަ ﷲ ގެ ހަޒުރަތުގައި، ހައިވާނުންނަށް ވުރެ ވެސް ދަށްވެގެންވެއެވެ. އެހެންވެ ބުއްދިއަށް ރައްކާތެރިވުމަކީ އިސްލާމީ ޝަރީއަތުގެ އެންމެ މުހިންމު މަޤުސަދުތަކުގެ ތެރޭގައި ލައްވައިފައިވާ ކަމެކެވެ." ޚުތުބާގައި ބުންޏެވެ.
މިއަދުގެ ޚުތުބާގައި ދެން އަލި އަޅުވައިލީ މަސްތުވާތަކެއްޗަށެވެ. އެގޮތުން މަސްތުވާތަކެއްޗަކީ ހަމަބުއްދިއާއި ހެޔޮ ވިސްނުމުން މީހާ ދުރުކުރާ އެއްޗެއްކަން ޚުތުބާގައި ވަނީ ފާހަގަކޮށްފައެވެ.
އޭގެ ސަބަބުން ސިކުނޑިއަށް ބޮޑެތި ބަދަލުތަކެއް އައިސް، ރަނގަޅު ނޫން މެސެޖުތަކެއް ދޭނެ ކަމަށް ވެސް ޚުތުބާގައި ވަނީ ބުނެފައެވެ. މަސްތުވާތަކެތި ބޭނުންކުރާ މީހުންގެ ފަރާތުން އާދަޔާޚިލާފު އަމަލުތައް ފެނި، އަމިއްލައަށް މީހާ މަރުވާ ހިސާބަށްދާ ކަމަށާއި އެއީ އިންސާނާގެ ހަށިގަނޑުގެ އެންމެ ހިމަ ނާރުތަކަށް ވެސް ގެއްލުން ފޯރުވާ އެއްޗެއް ކަމަށް ޚުުތުބާގައި ބުންޏެވެ.
މީގެ އިތުރުން، ޚުތުބާގައި ބުނީ މަސްތުވާތަކެތީގެ ވަބާއަކީ މިހާރު ކުރިމަތިވެފައިވާ އެންމެ ނުރައްކާތެރި އެއް ވަބާ ކަމަށެވެ. އެގޮތުން މަސްތުވާތަކެއްޗަކީ ހުރިހާ ފާފައަކަށް އަރައިގަތުމުގެ އަސްލު ކަމަށް ވެސް ޚުތުބާގައި ވަނީ ބުނެފައެވެ.
"މަސްތުވާތަކެތި ބޭނުންކުރާ މީހަކު، އެކަމުން ސަލާމަތްވާން މަސައްކަތް ކުރާކަން، އެކަމުގެ ވިޔަފާރީގައި އުޅޭ މީހަކަށް އެނގޭއިރަށް، ކަންބޮޑުވެ، އޭނާ އެކަމުން ދުރަށް ދިޔަ ނުދިނުމަށް ކުރެވެން އޮތް ހުރިހާ ކަމެއް ކުރާނެއެވެ. އެހެން ގޮތެއް ނެތް ނަމަ އެ މީހަކު މަރަން ވެސް ފަހެއް ނުޖެހޭނެއެވެ. އެހެން ކަމުން މިއީ ހުރިހާ ފާފައަކަށް އަރައިގަތުމުގެ އަސްލެވެ،" ޚުތުބާގައި ބުންޏެވެ.
މަސްތުވާތަކެތީގެ ސަބަބުން ގެއްލުން ލިބެނީ ހަމައެކަނި އެ ބޭނުންކުރާ މީހާއަށް ނޫންކަން ފާހަގަކޮށް ޚުތުބާގައި ބުނީ، އޭގެ ސަބަބުން އެ މީހެއްގެ އާއިލާއަށާއި މުޅި މުޖުތަމައަށާއި، މުޅި އުންމަތަށް ވެސް ނުރަނގަޅު އަސަރު ކުރާނެ ކަމަށެވެ. އިސްލާމްދީނުގައި މަސްތުވާތަކެތި ހަރާމްކޮށް ބުއްދީގެ ބޭނުން ހެޔޮ ގޮތުގައި ހިފުމަށް ގޮވާލަނީ ވެސް އެފަދަ ސަބަބުތަކާ ހުރެ ކަމަށް ޚުތުބާގައި ވަނީ ބުނެފައެވެ.