13 Jan 2024, 20:25
އެޕަލްގެ ސީއީއޯ ޓިމް ކުކްއަށް މިދިޔަ އަހަރު ލިބުނު އާމްދަނީ އޭގެ ކުރީ އަހަރާ އަޅައިބަލާއިރު ވަރަށް ބޮޑަށް ދަށްވެއްޖެއެވެ.
އެޕަލްގެ މާލީ ބަޔާނުން ދައްކާ ގޮތުގައި ޓިމް ކުކްއަށް މިދިޔަ އަހަރު މުސާރައިގެ ގޮތުގައި 63.2 މިލިއަން ޑޮލަރު ލިބިފައިވާއިރު އެއީ އޭގެ ކުރީ އަހަރާ އަޅައިބަލާއިރު 31 މިލިއަން ޑޮލަރުގެ ދަށްވުމެކެވެ. އެގޮތުން 2022 ވަނަ އަހަރު އޭނާއަށް 99.4 މިލިއަން ޑޮލަރު ލިބިފައިވެއެވެ.
ކުކްގެ މުސާރައިގެ ތެރޭގައި ހިމެނެނީ ތިން މިލިއަން ޑޮލަރުގެ އަސާސީ މުސާރައާއި ސްޓޮކް އެވޯޑްސްގެ ގޮތުގައި 47 މިލިއަން ޑޮލަރާއި، ޕާފޯމަންސް ބޭސްޑް ބޯނަސް އެވޯޑްސްގެ ގޮތުގައި 10.7 މިލިއަން ޑޮލަރާއި އެހެނިހެން އިނާޔަތުގެ ގޮތުގައި ލިބޭ 2.5 މިލިއަން ޑޮލަރެވެ. މީގެ އިތުރުން ރިޓަޔާމެންޓް ސޭވިންސްގެ ގޮތުގައި ދޭ ފައިސާއައި އިންޝުއަރެންސްތަކާއި އާއި ޗުއްޓީގެ ޚަރަދަށް ދޭ ފައިސާއާއި ސެކިއުރިޓީ ޚަރަދާއި އަމިއްލަ ދަތުރުތަކަށްދާ ޚަރަދުގެ ފައިސާ ހިމެނެއެވެ.
އެޕަލްގެ ޖުމްލަ 3،280،053 ހިއްސާއަކީ ކުކްގެ ހިއްސާ ކަމަށްވާއިރު މިހާތަނަށް ހަވާލުނުވެ ހުރި އިތުރު 1،291،086 ރެސްޓްރިކްޓެޑް ސްޓޮކް ޔުނިޓް (އާރުއެސްޔޫ) ހިމެނެއެވެ.
މިދިޔަ އަހަރު އެޕަލްގެ ޑިރެކްޓަރުންގެ ބޯޑާއި ހިއްސާދާރުންގެ އިތުރުން ކުކް އަމިއްލައަށް ވެސް ވަނީ އޭނާގެ މުސާރަ ކުޑަކުރަން ނިންމައިފައެވެ. އޭނާގެ ޓާގެޓް އެވޯޑަކީ 49 މިލިއަން ޑޮލަރަށް ވާއިރު، އެޕަލްގެ ޕާފޯމަންސްގެ ސަބަބުން އެންމެ ފަހުން އެ އެވޯޑް ވަނީ ފަހަނައަޅައި ގޮސްފައެވެ. މިއަހަރަށް ކުކްގެ ޓާގެޓް އިކުއިޓީ އެވޯޑް 50 މިލިއަން ޑޮލަރަށް ކަނޑައަޅާފައިވާއިރު އޭގެ ތެރެއިން 75 އިންސައްތަ އަކީ ޕާފޯމަންސް ބޭސްޑް ވެސްޓިންގެ ދަށުން ދޭ އެވޯޑެކެވެ.
އެޕަލްގެ ލޫކާ މެސްޓްރީ، ކޭޓް އެޑަމްސް، ޑެއިޑްރޭ އޯބްރައިން އަދި ޖެފް ވިލިއަމްސް ފަދަ ސީނިއާ އެގްޒެކެޓިވުންނަށް ގާތްގަނޑަކަށް 27 މިލިއަން ޑޮލަރު ލިބިފައިވާއިރު، އޭގެ ތެރެއިން އެންމެ ބޮޑު އާމްދަނީއެއް އެމީހުންނަށް ވެސް ލިބިފައިވަނީ ސްޓޮކް އެވޯޑުގެ ގޮތުގައެވެ.