12 Jan 2024, 11:21
ރަތްކަނޑުން އިސްރާއީލުގެ ރަށްތަކަށް ދަތުރުކުރާ މުދާ އުފުލާ ބޯޓުތަކަށް ޔަމަންގައި ހަރަކާތްތެރިވާ ހަތިޔާރުއެޅި ޖަމާޢަތް، ޙޫޘީން ދެމުންގެންދާ ހަމަލާތައް މިހާރުން މިހާރަށް ހުއްޓައިލުމަށް ގޮވައިލައި އދ ގެ ސަލާމަތީ މަޖިލީހުން ގަރާރެއް ފާސްކޮށްފިއެވެ.
އިސްރާއީލުގެ ފައުޖުތަކާއި ޣައްޒާގެ ވެރިކަންކުރާ ހަމާސް ޖަމާއަތާ ދެމެދު ހިނގަމުންދާ ހަނގުރާމަ ފެށިފަހުން ޔަހޫދީންގެ ރަށްތަކަށް ރަތް ކަނޑުން ދަތުރުކުރާ ބޯޓުތަކަށް ޙޫޘީން އަންނަނީ ހަމަލާތައް އަމާޒުކުރަމުންނެވެ. ރަތް ކަނޑަކީ ބައިނަލްއަގުވާމީ ވިޔަފާރީގައި ކަނޑުމަގުން އުފުލާ މުދަލުގެ 12 އިންސައްތަ އުފުލަން ބޭނުންކުރާ ކަނޑުގެ ސަރަހައްދެކެވެ. ޙޫޘީން އެގޮތަށް އަމަލު ކުރަނީ ފަލަސްތީނަށް ތާއީދުކުރުމުގެ ގޮތުންނެވެ.
ސަލާމަތީ މަޖިލީހުގެ 11 މެންބަރު ޤައުމަކުން ވަނީ އެ ގަރާރަށް ވޯޓު ދީފައެވެ. ރަޝިޔާ، ޗައިނާ، އަލްޖީރިއާ އަދި މޮޒެމްބީކުން ވަކި ކޮޅަކަށް ވޯޓުދީފައެއްނުވެއެވެ. ގަރާރާ ދެކޮޅަށް އެއްވެސް ގައުމަކުން ވޯޓެއް ނުދެއެވެ.
ސަލާމަތީ މަޖިލީހުން ހުށަހަޅައިފައިވާ އެ ގަރާރުގައި ވަނީ ދުނިޔޭގެ ވިޔަފާރިއާއި ދަތުރުފަތުރުގެ ހައްގުތަކާއި މިނިވަންކަމުގެ އިތުރުން ސަރަހައްދީ ސުލްހައަށް ހުރަސްއެޅޭ ގޮތަށް ރަތް ކަނޑުގައި ޙޫޘީން ދޭ ހުރިހާ ހަމަލާތަކެއް ވަގުތުން ހުއްޓާލުމަށެވެ.
ނޮވެމްބަރު މަހުގެ ފަހުކޮޅުން ފެށިގެން ރަތް ކަނޑާއި ޙަރީޖް ޢަދުނުން ދަތުރުކުރި 25 ބޯޓަކަށް ޙޫޘީން ވަނީ ޙަމަލާ ދީފައެވެ.
ބޯޓުތަކަށް އަމާޒުކޮށް ޙޫޘީން ފޮނުވި 20 އަށް ވުރެ ގިނަ ޙަމަލާ އެމެރިކާއާއި އިނގިރޭސިވިލާތުގެ ސިފައިން ވަނީ ނާކާމިޔާބު ކޮށްލައިފައެވެ. އެގޮތުން ޖަނަވަރީ މަހުގެ 10 ވަނަ ދުވަހު ޙޫޘީން ދިން ޙަމަލާއެއް ވެސް ވަނީ ނާކާމިޔާބު ކޮށްލައިފައެވެ. އެ ޙަމަލާއަކީ ޙޫޘީން މިހާތަނަށް ދިން އެންމެ ވަރުގަދަ ޙަމަލާ ކަމަށް އިނގިރޭސިވިލާތުން ބުނެއެވެ.
ޙޫޘީންގެ ޙަމަލާތަކުގެ ސަބަބުން ދުނިޔޭ ގިނަ ޝިޕިން ކުންފުނިތަކުން ވަނީ ރަތް ކަނޑުގައި ކުރާ ދަތުރުތައް އެފްރިކާގެ ވަށައިގެން އޮންނަ ދުރު މަގެއް ކަމަށްވާ، ކޭޕް އޮފް ގުޑް ހޯޕަށް ބަދަލުކޮށްފައެވެ.
ބޯޓުތައް ހިމާޔަތްކުރުމުގެ މަސައްކަތް އެމެރިކާއިން އިސްނަގައިގެން އެކުލަވައިލީ އަސްކަރީ އިއްތިޙާދުން ކުރި ނަމަވެސް ޝިޕިން ކުންފުނިތަކުން އަންނަނީ ރަތް ކަނޑުން ކުރާ ދަތުރުތައް ހުއްޓައިލަމުންނެވެ.
ޙޫޘީންގެ އަމަލުތައް ހިންގުމަށް މާލީ އަދި އަސްކަރީ ގޮތުން ވެސް އީރާނުން ވާގިވެރިވާ ކަމަށް އެމެރިކާއިން ތުހުމަތުކުރެއެވެ. ނަމަވެސް އީރާނުން އަންނަނީ އެ ތުހުމަތުތައް ދޮގުކުރަމުންނެވެ.