11 Jan 2024, 23:51
ޗައިނާއާއި ރާއްޖެއާ ދެމެދު އޮތް ފްރީ ޓްރޭޑް އެގްރިމަންޓުގެ ދަށުން ރާއްޖޭގެ ގައުމީ އެއާލައިން މޯލްޑިވިއަނަށް، ޗައިނާގައި އެތެރޭގެ އުދުހުންތައް ކުރިއަށް ގެންދަން ފުރުސަތު ލިބިފައިވާކަމަށް އިކޮނޮމިކް މިނިސްޓަރު މުޙައްމަދު ސައީދު ވިދާޅުވެއްޖެއެވެ.
މިނިސްޓަރު އެ ފަދައިން ވިދާޅުވީ ޗައިނާގައި ހުންނަވައި، ދައުލަތުގެ މީޑިއާއަށް ދެއްވި އިންޓަވިއުއެއްގައެވެ.
ސައީދު ވިދާޅުވީ ރާއްޖޭގެ ގައުމީ އެއާލައިނެއް މެދުވެރިކޮށް ގައުމަށް ފަތުރުވެރިން ގެންނަން މަސައްކަތް ކުރާ މި ދަނޑިވަޅުގައި ފްރީ ޓްރޭޑް އެގްރިމަންޓަކުން މި ފުރުސަތު ލިބުމަކީ ވަރަށް ފައިދާ ބޮޑު ކަމެއް ކަމަށެވެ.
ނަތީޖާއަކަށް ވާނީ އިތުރު ދަތުރުތައް ކުރަން ފަހިވުންކަމަށް ވިދާޅުވިއެވެ.
"ދެން އަޅުގަނޑުމެންނަށް އެފްޓީއޭގެ ދަށުން ނުވަތަ ފްރީ ޓްރޭޑް އެގްރިމަންޓްގެ ދަށުން އެބަ ލިބޭ އެެހެން ފުރުސަތެއް. އެއީ ޗައިނާގެ އެއް މަންޒިލުން އަނެއް މަންޒިލުން މީހުން އުފުލަން ވެސް،" މިނިސްޓަރު ސައީދު ވިދާޅުވިއެވެ.
މިނިސްޓަރު ވިދާޅުވީ މިއީ، ފުރަތަމަ ފަހަރަށް ބޭރު ގައުމަކަށް އެ ގައުމުގެ އެއާލައިން މެދުވެރިކޮށް ޗައިނާގައި އެތެރޭގެ އުދުހުންތައް ކުރިއަށްގެންދަން ފުރުސަަތު ދޭ ފުރަތަމަ ފަހަރުކަމަށެވެ.
"ދިވެހިރާއްޖެއަށް އެކަނި އަޅުގަނޑަށް މައުލޫމާތު ލިބިފައި އޮތް ގޮތުން ނަަމަ. މިކަން ކުށް ނޫންނަމަ ދިވެހިރާއްޖެއަށް އެކަނި ޗައިނާގެ އެއް ސިޓީން އަނެއް ސިޓީއަށް އަޅުގަނޑުމެންގެ އެއާލައިނަކުން މީހުން އުފުއްލަން ހުއްދަ މި ދިނީ،" އޭނާ ވިދާޅުވިއެވެ.
މިނިސްޓަރު ވިދާޅުވީ މިއީ ޗައިނާއާއެކު އޮތް ފްރީ ޓްރޭޑް އެގްރިމަންޓުގެ އެންމެ މުހިންމު އެއް ކަންތައް ކަމަށެވެ.