12 Jan 2024, 07:33
އާންމުންގެ މަގުބޫލުކަމުން ހޮވާ އެންމެ ބޮޑު އެވޯޑު ކަމަށްވާ "ޕީޕަލްސް ޗޮއިސް" އެވޯޑުގެ މި އަހަރުގެ އިވެންޓުގެ ނޯމިނޭޝަން އާންމުކޮށްފިއެވެ.
ސީބީއެސްއިން އިންތިޒާމުކޮށްގެން ކުރިއަށް ގެންދާ ޕީޕަލްސް ޗޮއިސް އަކީ އާންމު އޯޑިއަންސްއާއި ފޭނުންގެ މަގުބޫލުކަމަށް ބަލައި ފޭނުން ހޮވާ އުފެއްދުންތަކަށް ދެވޭ އެވޯޑެކެވެ. އެހެން އެވޯޑުތަކަކީ ހާއްސަ ޕެނަލް އެއް އެކަމަށް ހާއްސަކޮށްގެން ދެވޭ އެވޯޑެކެވެ.
މި އަހަރުގެ އެވޯޑު ހަފުލާގެ ނޯމިނޭޝަންގެ އެންމެ ކުރީގައި އުޅެނީ މިދިޔަ އަހަރުގެ އެންމެ ބޮޑު ފިލްމު "ބާބީ" އެވެ. ގްރެޓާ ގާވިގް ޑައިރެކްޓް ކޮށްފައިވާ ފިލްމު ވަނީ ޖުމްލަ ނުވަ އެވޯޑަކަށް ނޯމިނޭޓް ވެފައެވެ. ނޯމިނޭޓް ވެފައިވާ ދާއިރާތަކުގެ ތެރޭގައި އެންމެ މޮޅު ފިލްމާއި އެކްޓަރުންގެ އިތުރުން އެންމެ މޮޅު ޑިރެކްޓަރުގެ އެވޯޑުވެސް ހިމެނެއެވެ.
ފިލްމުގެ ދާއިރާއިން ދެވަނައިގައި އެންމެ ގިނަ ނޯމިނޭޝަންއާ އެކު އޮތީ ބާބީއާ އެކު އެޅުވި "އޮޕެންހައިމާ" އެވެ. މި ފިލްމު ވަނީ ހަ ދާއިރާއަކުން ނޯމިނޭޓް ވެފައެވެ.
ފިލްމީ ދާއިރާގައި ދެން އެންމެ ކުރީގައި އުޅެނީ މާވެލްގެ "ގާޑިއަންސް އޮފް ގެލެކްސީ ވޮލިއުމް 3" އާއި "ހަންގަ ގޭމްސް" ފްރެންޗައިޒްގެ "ދަ ބަލާޑް އޮފް ސޯންގްބާޑް އެންޑް ސްނޭކްސް" އެވެ.
ޓީވީގެ ދާއިރާއިން އެންމެ ކުރީގައި އުޅެނީ ސެލީނާ ގޮމޭޒް ލީޑުން ފެންނަ ޝޯ "އޮންލީ މާޑާސް އިން ދަ ބިލްޑިން" އެވެ. މި ޝޯ ވަނީ ހަ ދާއިރާއަކުން ނޯމިނޭޓް ވެފައެވެ. ލިސްޓުގައި ދެން އެންމެ ކުރީގައި އުޅެނީ "ދަ ލާސްޓް އޮފް އަސް" އާއި "ދަ މޯނިން ޝޯ" އަދި "ޓެޑް ލެސޯ" އެވެ.
މި އަހަރުގެ ޕީޕަލްސް ޗޮއިސް އެވޯޑު އިވެންޓު ކުރިއަށް ގެންދިޔުމަށް ހަމަޖެހިފައިވަނީ އަންނަ މަހުގެ 18 ވަނަ ދުވަހުގައެވެ.