11 Jan 2024, 16:58
ނިމިދިޔަ އެމްޑީޕީ ސަރުކާރުން ހިންގި ގެދޮރުވެރިޔާ މަޝްރޫއުގެ ތެރެއިން ދޫކުރި ފްލެޓްތައް ރައްޔިތުންނަށް ދިނުން ލަސްކުރާކަމަށް ބުނެ އެ ޕާޓީން އެ ކަން ކުށްވެރިކޮށްފިއެވެ.
މި ކަމާ ގުޅޭގޮތުން، އެމްޑީޕީން މިއަދު ނެރުނު ބަޔާނެއްގައި ބުނެފައިވަނީ ސަރުކާރުން ދޫކުރި ގޯއްޗާއި ފްލެޓް ލިބޭނެކަމަށް ފައިނަލް ލިސްޓްގައި ހިމެނި ގެޒެޓް ކޮށްފައިވާ މީހުންނަށް ރަޖިސްޓްރީ ހަދައިދީ އެއްބަސްވުން ހަދައިފައިވާއިރު، ފްލެޓް ދިނުމުގެ އެއްވެސް މަސައްކަތެއް ސަރުކާރުން ކުރަމުން ނުގެންދާ ކަމަށެވެ.
މީގެ އިތުރުން، ފުލެޓް ލިބޭ މީހުން އެ ކަމުގައި ކަމާ ގުޅުންހުރި މުއައްސަސާތަކުގައި ތަކުރާރުކޮށް ޝަކުވާ ހުށަހަޅައި، ކަންބޮޑުވުން ފާޅުކުރަމުން އަންނައިރު އެއިން އެއްވެސް ކަމަކަށް އިޖާބަ ދީފައިނުވާތީ އެ ކަމުގެ ޝަކުވާ އެ ޕާޓީއަށް ވެސް ހުށަހަޅަމުން އަންނަކަމަށް އެ ބަޔާނުގައިވެއެވެ.
ހަމައެއާއެކު ރައްޔިތުންނަށް އޮޅޭގޮތަށް އެކި ފަހަރު އެކި ގޮތްގޮތަށް ފްލެޓްތަކުގެ ވާހަކަ ރައީސް ޑރ. މުޙައްމަދު މުއިއްޒު ދައްކަވަމުން ދިއުމަކީ ވެސް ރައްޔިތުން ކަންބޮޑުވާ ކަމެއް ކަމަށް އެ ބަޔާނުގައި ބުނެފައިވެއެވެ.
އަދި ބިންވެރިޔާ ސްކީމާއި ގެދޮރުވެރިޔާ ސްކީމުން ގޯއްޗާއި ފުލެޓް ލިބިފައިވާ މީހުންނަށް ފްލެޓާއި ބިން ހަވާލުކުރުން މި ސަރުކާރުން ހިންގުމާ ހަވާލުވީ ދުވަހުން ފެށިގެން ހުއްޓިފައިވާކަމަށް އެ ބަޔާނުގައިވެއެވެ.
ނިމުނު ސަރުކާރުގެ ގެދޮރުވެރިޔާ ސްކީމުގެ ތެރެއިން، ފުރަތަމަ އިއުލާންކުރި 4،000 ފުލެޓު ލިބޭ މީހުންގެ ލިސްޓުގެ ތަހުގީގު ބާރަށް ކުރިއަށްދިޔަ ނަމަވެސް، އެ މައްސަލައިގެ ތަހުގީގު އެއްކޮށް ނިމޭނެ ދުވަހެއް އަދި ނޭނގޭކަމަށް މައްސަލަ ބަލައި އޭސީސީން އޮތީ ބުނެފައެވެ.
އެހެންވެ އަދިވެސް އެ ފްލެޓްތައް ދިނުމުގެ މަސައްކަތް ހައުސިން މިނިސްޓްރީން އޮތީ މަޑުޖައްސައިލައިފައެވެ.